ດຣາມ້າສະເທືອນໂຊຊຽວ! ຈົນແອນນິຕ້າ ແລະໂຈໂຈ້ຢາກອຳລາວົງການ ເພາະຊາວເນັດເວົ້າແບບນີ້!


ດຣາມາອີກແລ້ວ ເມື່ອເພຈ໌ມືດີເພຈ໌ຫນຶ່ງອອກມາຕັ້ງກະທູ້ "ເປັນຫຍັງຈຶ່ງບໍ່ກີ໊ດດາລາລາວ?" ເຮັດໃຫ້ຊາວໂຊຊຽວທັງຫລາຍຫຸ້ມກັນເຂົ້າສະແດງຄຳຄິດເຫັນກັນໄປຕ່າງໆນາ ສ່ວນຫລາຍແມ່ນໃຫ້ຄຳຄິດເຫັນທຳນອງທີ່ວ່າທີ່ບໍ່ຊື່ນຊົມເພາະຜົນງານບໍ່ຫນ້າສົນໃຈ, ຜົນງານຍັງບໍ່ດີທຽບເທົ່າຕ່າງປະເທດ, ຄົນໃນວົງການບັນເທີງບາງຄົນຫຍິ່ງ, ຖືຕົວ, ບໍ່ເປັນມິດກັບແຟນຄັບ ແລະອື່ນໆ

 

ຈາກກະແສດັ່ງກ່າວນີ້ເຮັດໃຫ້ຄົນບັນເທີງຫລາຍຄົນອອກມາຈົ່ມນ້ອຍອົກນ້ອຍໃຈໄປຕາມກັນດັ່ງຫນຸ່ງໂຈ່ໆມິຣາເຄີລ ແລະສາວແອນນິຕ້າ ໄດ້ເວົ້າວ່າ ພວກເຮົາຄົນບັນເທີງກໍພະຍາຍາມສ້າງສັນຜົນງານຢ່າງເຕັມທີ່, ເຮັດວຽກດ້ວຍໃຈມັກຮັກແທ້ໆ, ເວລາໄປເຮັດວຽກຢູ່ຕ່າງປະເທດກໍມີຫລາຍຄົນຊື່ນຊົມໃນຜົນງານ ການຖືກກະແສວິພາກວິຈານແບບນີ້ມັນກໍບັນທອນກຳລັງໃຈ.


ແຕ່ເຖິງຢ່າງໃດກໍຕາມ! ກໍມີບັນດາແຟນຄຣັບດາລາລາວຈຳນວນຫນຶ່ງອອກມາປົກປ້ອງແລະຊື່ນຊົມໃນຜົນງານການບັນເທີງຂອງຄົນລາວທີ່ມີການພັດທະນາໄປໃນທາງທີ່ດີຂຶ້ນ. ຄິດອອກເອງໃນຖານະຜູ້ເປັນສື່ກາງກໍຮຽກຮ້ອງໃຫ້ຊາວໂຊຊຽວທຸກທ່ານເບິ່ງບັນຫາໃນຫລາຍແງ່ຫລາຍມຸມ, ຕ້ອງເຂົ້່າໃຈວ່າວົງການບັນເທີງບ້ານເຮົາຫາກໍເກີດຂຶ້ນມາບໍ່ພໍເທົ່າໃດປີ ຈະທຽບກັບຮໍລີວູດທີ່ມີມາກວ່າຮ້ອຍປີມັນກໍເປັນໄປບໍ່ໄດ້ ສະນັ້ນ, ຈະເປັນການດີທີ່ສຸດຫາກພວກເຮົາວິພາກວິຈານກັນໄປໃນທາງສ້າງສັນ , ຮ່ວມສະຫນັບສະຫນູນ ແລະໃຫ້ກຳລັງໃຈກັນ. ສ່ວນຄົນບັນເທີງເອງກໍຄວນນຳເອົາຄຳເຫັນຂອງມວນຊົນໄປປັບປຸງແກ້ໄຂຕາມຄວາມເຫມາະສົມ ເພື່ອພັດທະນາຝີມື ແລະຜົນງານໃຫ້ດີຂຶ້ນຢ່າງບໍ່ຢຸດຢັ້ງ.