ດຣາມາສະຫນັ່ນ! ສາວໄວ19 ກັບບ່າວການບິນ ຈົນເຖິງຂັ້ນຂ້າຕົວຕາຍປະຊົດຮັກ

ໃນເຊົ້າຂອງວັນທີ 27ສິງຫາ ແອັດມິ້ນເປີດຫນ້າເຟຊບຸກຂຶ້ນມາເຫັນໂພສຂອງຍິງສາວໄວ 19ຜູ້ຫນຶ່ງ ທີ່ຂຽນບັນຍາຍເຖິງຖືກຫນຸ່ມນິລະນາມທີ່ກ່າວຫາວ່າເປັນພະນັກງານຢູ່ບໍລິສັດການບິນແຫ່ງຫນຶ່ງ ຫັກອົກ ແລະຫນີຫນ້າໄປ ພ້ອມກັບສົ່ງຂໍ້ຄວາມໃນທຳນອງຕັດຂາດຄວາມຄວາມສຳພັນ ອັນເປັນເຫດໃຫ້ຍິງສາວຜູ້ດັ່ງກ່າວໂພສຂໍ້ຄວາມລະບາຍຄວາມອັດອັ້ນຕັນໃຈ ພ້ອມທັງຮູບພາບທີ່ມີທຳນອງວ່າຜູ້ກ່ຽວໃຊ້ມີດປາດແຂນຕົນເອງຫວັງທຳຮ້າຍຕົນເອງ. ຂໍ້ຄວາມດັ່ງກ່າວຖືກເຜີຍແຜ່ອອກໄປເຮັດໃຫ້ຊາວເນັດຕາດີຈັບຜິດໄດ້ວ່າ ໃນພາບນັ້ນບໍ່ແມ່ນເລືອດແຕ່ເປັນນ້ຳຫວານສີແດງ. ນອກຈາກນັ້ນກໍໄດ້ເຫັນຂໍ້ຄວາມຈາກຜູ້ທີ່ແອບອ້າງວ່າເປັນເອື້ອຍຂອງຝ່າຍຊາຍໂພສວ່າຍິງສາວຜູ້ນີ້ເຄີຍສົ່ງຂໍ້ຄວາມຫາຕົນວ່າມີຄວາມສຳພັນເລິກເຊິ່ງກັບຝ່າຍຊາຍຈົນຖືພາມານ ແຕ່ຖືກຝ່າຍຊາຍປັດປ່າຍຄວາມຮັບຜິດຊອບ ແຕ່ພໍຂໍພິສູດນາງຊ້ຳພັດຫລົບຫນ້າ ແລະລົບເອື້ອຍຂອງຝ່າຍຊາຍອອກຈາກການເປັນຫມູ່ໃນເຟຊບຸກ ແຕ່ເບິ່ງທ່າທີເລື່ອງລາວບໍຈົບສິ້ນງ່າຍໆເພາະພີ່ນ້ອງທາງຝ່າຍຍິງສາວກໍບໍ່ພໍໃຈເຊັ່ນດຽວກັນທີ່ຝ່າຍຊາຍມີການກະທຳປະເພດ "ຟັນແລ້ວຖິ້ມ". ເລື່ອງນີ້ກາຍເປັນທີ່ວິພາກວິຈານກັບຢ່າງເມົາມັນໃນໂລກອອນລາຍ ອາດຈະເບິ່ງຄືໄຮ້ສາລະ ແຕ່ຫາກລອງພິຈາລະນາບັນຫາເຂົ້າໄປເລິກໆແລ້ວ ມັນກໍເປັນປາກົດການຫຍໍ້ທໍ້ໃນສັງຄົມຢ່າງຫນຶ່ງ ໂດຍສະເພາະບັນຫາທີ່ກ່ຽວກັບຄວາມສຳພັນຊູ້ສາວ. ຍິ່ງຍຸກແຫ່ງການສື່ສານທັນສະໄຫມ ໃຜຢາກເວົ້າຢາກໂພສຫຍັງລົງໃນໂລກອອນລາຍກໍໄດ້ ແຕ່ບາງຄັ້ງການໂພສແບບບໍ່ໃຊ້ວິຈາລະນະຍານ ອາດຈະເປັນດັ່ງບູມເມີແຣງທີ່ແກວ່ງໄປແລ້ວກັບມາຟາດຫົວເຈົ້າຂອງເອງກໍເປັນໄດ້ ເພາະສັງຄົມມັກນຳກິ່ນຂ່າວ(ຄາວໆ)ໄດ້ຢ່າງວ່ອງໄວ ແລະຖ້າຈະເວົ້າໃນແງ່ກົດຫມາຍ ກໍຄືຜູ້ໂພສຈະມີຄວາມຜິດໃນຂໍ້ຫາຫມິ່ນປະຫມາດ (ເຖິງວ່າເລື່ອງຈະເປັນຄວາມຈິງຫລືບໍ່ກໍຕາມ). ດ້ວຍເຫດນັ້ນ. ຈິ່ງຮຽກຮ້ອງໃຫ້ຊາວຫນຸ່ມທຸກໆຄົນເບິ່ງໄວ້ເປັນອຸທາຫອນ ຮັກຢ່າງມີສະຕິ! ຮັກຢ່າງລະມັດລະວັງ! ມີຄວາມສຳພັນທີ່ຊື່ສັດຕໍ່ກັນ, ບໍ່ພາກັນໄປປະພຶດທີ່ຜິດຕໍ່ຮີດຄອງປະເພນີອັນດີງາມ ຖືກວ່າເປັນການໃຫ້ກຽດຄອບຄົວ,ວົງຕະກຸນ, ໃຫ້ກຽດຕົນເອງ ແລະຫນ້າທີ່ວຽກງານ. ແອັດມິ້ນເອງໃນຖານະຜູ້ຍິງຄົນຫນຶ່ງ ກໍຂໍເປັນກຳລັງໃຈໃຫ້ຜູ້ຍິງທີ່ກຳລັງປະສົບບັນຫາຄວາມຮັກທຸກໆຄົນ ຈົ່ງໃຊ້ສະຫມອງແກ້ໄຂບັນຫາດີກວ່າອາລົມຊົ່ວວູບ ແລະຫັນຫນ້າເອົາໃຈໃສ່ຕໍ່ການສຶກສາແລະວຽກງານຈະເປັນການດີທີ່ສຸດ! ແລະຜູ້ຊາຍກໍເຊັ່ນດຽວກັນຢຶດຫມັ້ນໃນຄວາມສຳພັນແບບຮັກດຽວໃຈດຽວ, ຫາກຈະຢຸດຄວາມສຳພັນໃດຫນຶ່ງກໍຈົ່ງຫັນຫນ້າໂອ້ລົມກັນໃຫ້ຕົກແຕກ ເພື່ອຮັບປະກັນການເກີດບັນຫາ "ປະຈານຜ່ານໂຊຊຽວ" ທີ່ອາດເຮັດໃຫ້ເສຍພາບພົດທີ່ດີກໍເປັນໄດ້. (ດ້ວຍຄວາມຫວັງດີ ຈາກແອັດມິ້ນ ກະເປົ໋າຫລູຍ ^^~)

ບົດຄວາມໃຫມ່ໆ