ຍ່າງເພື່ອລະນຶກວັນສາກົນຢຸດຕິຄວາມຮຸນແຮງຕໍ່ແມ່ຍິງ ຄົບຮອບ 22 ປີ

ຕອນເຊົ້າວັນທີ 5 ທັນວານີ້, ທີ່ສວນປະຕູໄຊ ນະຄອນຫຼວງວຽງຈັນ ຄະນະກຳມະການເພື່ອຄວາມກ້າວໜ້າແມ່ຍິງແຫ່ງຊາດລາວ ໄດ້ຈັດພິທີຍ່າງມິນິມາລາທອນ ເພື່ອລະນຶກວັນສາກົນຢຸດຕິຄວາມຮຸນແຮງຕໍ່ແມ່ຍິງ 25 ພະຈິກ ຄົບຮອບ 22 ປີ, ເປັນກຽດເຂົ້າຮ່ວມໂດຍ ທ່ານ ສອນໄຊ ສີພັນດອນ ລັດຖະມົນຕີຫົວໜ້າຫ້ອງວ່າການລັດຖະບານ, ມີບັນດາທ່ານລັດຖະມົນຕີວ່າການ, ຮອງລັດຖະມົນຕີວ່າການ, ປະທານອົງການອ້ອມຂ້າງ, ບັນດາຜູ້ຕາງໜ້າອົງການຈັດຕັ້ງສາກົນປະຈຳລາວ, ພາກສ່ວນກ່ຽວຂ້ອງ ພ້ອມດ້ວຍມວນຊົນຊາວນະຄອນຫຼວງວຽງຈັນ 300 ກວ່າຄົນເຂົ້າຮ່ວມ
ທ່ານ ສອນໄຊ ສີພັນດອນ ກ່າວວ່າ: ການຍ່າງມິນິມາລາທອນຄັ້ງນີ້, ເພື່ອເປັນການສ້າງຂະບວນການ ການລະນຶກວັນສາກົນຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ແລະ ເປັນການໂຄສະນາເຜີຍແຜ່ແນວທາງນະໂຍບາຍຂອງພັກ ຍຸດທະສາດກົດໝາຍ ແລະ ແຜນດຳເນີນງານຂອງລັດ ກ່ຽວກັບການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ທັງເປັນການໂຄສະນາໃຫ້ທົ່ວສັງຄົມໄດ້ມີຄວາມຮັບຮູ້ ແລະ ເຂົ້າໃຈຖືກຕ້ອງ ແລະ ສອດຄ່ອງຕໍ່ກັບບັນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ.


ທ່ານກ່າວຕື່ມອີກວ່າ, ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ເປັນບັນຫາທີ່ເກີດຂື້ນດົນນານແລ້ວໃນທົ່ວໂລກ ແລະ ປັດຈຸບັນ, ກາຍເປັນປະກົດການຫຍໍ້ທໍ້ອັນໜື່ງໃນສັງຄົມ ແລະ ສົ່ງຜົນກະທົບທາງລົບຕໍ່ການພັດທະນາເສກດຖະກິດ-ສັງຄົມ, ໂດຍສະເພາະແມ່ນເປັນອັນຕະລາຍຕໍ່ຮ່າງກາຍ, ຊີວິດຈິດໃຈ, ອາລົມຂອງແມ່ຍິງ ແລະ ເດັກຍິງ, ການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງມີຫຼາຍສາເຫດຄື, ຍ້ອນຮີດຄອງປະເພນີ, ທຳນຽມປະຕິບັດ, ຄວາມເຊື່ອຖື, ຄວາມທຸກຍາກ, ທັດສະນະຂອງສັງຄົມຕໍ່ແມ່ຍິງ, ລະດັບການສຶກສາ ແລະ ອື່ນໆ. ສຳລັບ ສປປ ລາວ ພັກ-ລັດຖະບານ ຍາມໃດກໍ່ໃຫ້ຄວາມສຳຄັນຕໍ່ກັບບັນຫາດັ່ງກ່າວ ໂດຍໄດ້ເອົາໃຈໃສ່ໃນການສົ່ງເສີມຄວາມສະເໝີພາບຍິງ-ຊາຍ, ລຶບລ້າງທຸກຮູບການໃນການຈຳແນກຕໍ່ແມ່ຍິງ ແລະ ເດັກຍິງຕໍ່ຫຼອດມາ ເຊິ່ງໄດ້ສະແດງອອກໃນລັດຖະທຳມະນູນກົດໝາຍ, ແຜນຢຸດທະສາດ ແລະ ແຜນດຳເນີນງານແຫ່ງຊາດ ທີ່ສຳຄັນຈຳນວນໜື່ງ ເພື່ອຄຸ້ມຄອງ ແລະ ປົກປ້ອງສິດ, ຜົນປະໂຫຍດລວມຂອງແມ່ຍິງ ແລະ ສະກັດກັ້ນ ການໃຊ້ຄວາມຮຸນແຮງຕໍ່ແມ່ຍິງ-ເດັກຍິງທຸກຮູບການໃນຂອບເຂດທົ່ວປະເທດ. 
ຂະບວນຍ່າງມິນິມາລາທອນຄັ້ງນີ້, ປະກອບມີ, ກ້ອນເຍົາວະຊົນ, ກ້ອນການນຳພັກ-ລັດ ແລະ ມວນຊົນ. ຫຼັງຈາກນັ້ນ, ຂະບວນຍ່າງໄດ້ເລີ່ມແຕ່ສວນປະຕູໄຊສູ່ຫໍຄໍາແລ້ວໂຄ້ງກັບຄືນສູ່ສວນປະຕູໄຊ