ຍົນໂດຍສານຂະໜາດໃຫຍ່ C919 ທີ່ຈີນຄົ້ນຄວ້າຜະລິດປາກົດຕົວຢູ່ນະຄອນຊຽງໄຮຂອງຈີນຄັ້ງທຳອິດ

ຜ່ານການອອກແບບແລະຄົ້ນຄວ້າຜະລິດເປັນເວລາ 7 ປີ, ຕອນເຊົ້າວັນທີ 2 ພະຈິກນີ້, ຍົນໂດຍສານ C919 ທີ່ໃຊ້ໃນທາງພົນລະເຮືອນໃນເສັ້ນທາງການບິນຕົ້ນຕໍທີ່ຈີນຄົ້ນຄວ້າຜະລິດຕາມມາດຕະຖານການບິນສາກົນຫຼ້າສຸດລຳທຳອິດໄດ້ປາກົດຕົວຢູ່ນະຄອນຊຽງໄຮຂອງຈີນເປັນຄັ້ງທຳອິດ, ນີ້ເປັນຂີດໝາຍສະແດງໃຫ້ເຫັນວ່າຍົນໂດຍສານດັ່ງກ່າວສາມາດດຳເນີນການທົດລອງຢູ່ເທິງພາກພື້ນດິນໄດ້.

ທ່ານຫວູຊິ່ງຊື້, ສະມາຊິກໜ່ວຍຊ່ຽວຊານໃຫ້ຄຳປຶກສາດ້ານໂຄງການຍົນໂດຍສານຂະໜາດໃຫຍ່ C919 ຂອງບໍລິສັດເຮືອບິນການຄ້າຈີນຈຳກັດກ່າວວ່າ: ຍົນໂດຍສານທີ່ໃຊ້ໃນທາງພົນລະເຮືອນຂະໜາດໃຫຍ່ທີ່ຈີນຄົ້ນຄວ້າຜະລິດເອງບໍ່ພຽງແຕ່ສາມາດຕອບສະໜອງຄວາມຕ້ອງການທາງພາຍໃນແລະຕ່າງປະເທດໃນດ້ານການຂົນສົ່ງທາງອາກາດທີ່ນັບມື້ນັບຂະຫຍາຍຕົວເທົ່ານັ້ນ, ແຕ່ຍັງໄດ້ເຮັດໃຫ້ຄວາມສາມາດໂດຍພື້ນຖານແລະຄວາມສາມາດໃຈກາງໃນດ້ານຕ່າງໆຂອງວິສາຫະກິດຜະລິດໄດ້ຮັບການຍົກສູງຂຶ້ນອີກດ້ວຍ, ຊຶ່ງເປັນການສະໜັບສະໜູນຕໍ່ຈີນຈາກປະເທດໃຫຍ່ດ້ານການບິນພັດທະນາໄປສູ່ປະເທດທີ່ເຂັ້ມແຂງດ້ານການບິນ.

ປັດຈຸບັນ, ຈຳນວນວິສາຫະກິດທີ່ຈະໃຊ້ຍົນໂດຍສານຂະໜາດໃຫຍ່ C919 ພາຍໃນແລະຕ່າງປະເທດມີ 21 ແຫ່ງ, ຊຶ່ງມີໃບຈອງຊື້ຍົນລວມທັງໝົດ 517 ລຳ. ຕາມແຜນການພັດທະນາຂອງໂຄງການ, ຍົນໂດຍສານຂະໜາດໃຫຍ່ C919 ຍັງຈະດຳເນີນການທົດລອງຫຼາຍລາຍການຕາມພາຍຫຼັງ, ເຊິ່ງຍົນລຳທຳອິດນີ້ຈະດຳເນີນການທົດລອງການບິນຄັ້ງທຳອິດໃນປີ 2016.