ຍີ່ປຸ່ນເປີດໂຕສັດນຳໂຊກ ງານມະຫະກຳກິລາໂອແລມປິກເກມ 2020!!

ຍີ່ປຸ່ນເປີດໂຕສັດນຳໂຊກ ງານມະຫະກຳກິລາໂອແລມປິກເກມ 2020!!

ໃນມື້ວານນີ້ (28 ກຸມພາ 2018) ຍີ່ປຸ່ນ ເຈົ້າພາບງານມະຫະກຳກິລາໂອແລມປິກ ລະດູຮ້ອນ ປີ 2020 (2020 Summer Olympics) ພ້ອມກັບງານມະຫະກຳກິລາໂອແລມປິກ ລະດູຮ້ອນ ຂອງຄົນພິການ ປີ 2020 ໄດ້ເປີດໂຕສັດນຳໂຊກ ຫລື Mascot ປະຈຳການແຂ່ງຂັນ.

ຊຶ່ງໃນຮອບຕັດສິນ ມີ 3 ຮູບແບບສັດນຳໂຊກ ທີ່ຜ່ານການຄັດເລືອກຈາກທັງຫມົດ 2042 ແບບ ໂດຍໃຫ້ນ້ອງນັກຮຽນອານຸຊົນ-ເຍົາວະຊົນຍີ່ປຸ່ນໃນ 16,769 ໂຮງຮຽນ ຈຳນວນ 2 ແສນກວ່າຄົນ ຮ່ວມໂຫວດໃຫ້ຄະແນນແຕ່ລະແບບ.

ແລະ ຜົນການຕັດສິນປະກົດວ່າ: ຮູບແບບທີ 1 ສັດນຳໂຊກທີ່ອອກແບບໂດຍ Ryo Taniguchi ໄດ້ຖືກເລືອກໃຫ້ເປັນສັດນຳໂຊກທັງ 2 ງານ ທີ່ຍີ່ປຸນໄດ້ຮັບກຽດເປັນເຈົ້າພາບ ດ້ວຍຈຳນວນ 109,041 ຄະແນນ ເອົາຊະນະຮູບແບບທີ 2 ແລະ ທີ 3 ເຖິງ 40,000 ຄະແນນ.

ສັດນຳໂຊກທີ່ຖືກເລືອກຄັ້ງນີ້ ການອອກແບບມີລັກສະນະເປັນຕົວກາຕູນຫມາຈິງຈອກຫນ້າຮັກ ຖືວ່າເປັນສັດນຳໂຊກຂອງຍີ່ປຸ່ນ ໂດຍມີການແຕ້ມແຕ່ງລວດລາຍເປັນຕາກະໂລ້ ເຫມືອນກັບແປ້ນຫລິ້ນກິລາຫມາກເສິກ ສວຍງາມແບບລຽບງ່າຍ ເຂົ້າກັບສັນຍາລັກ ຫລື ໂລໂກ້ ຂອງທັງສອງງານ.

ຊຶ່ງສັດນຳໂຊກຂອງງານກິລາໂອແລມປິກ ລະດູຮ້ອນ ປີ 2020 ມີສີສັນເປັນສີຟ້່າ-ຂາວ, ສ່ວນສັດນຳໂຊກ ງານກິລາໂອແລມປິກ ລະດູຮ້ອນ ຂອງຄົນພິການ ປີ 2020 ເປັນສີຂາວ-ບົວ ຫນຶ່ງໃນສີດອກຊາກຸຣະ ດອກໄມ້ປະຈຳຊາດຂອງຍີ່ປຸ່ນ.

ທັງສອງສັດນຳໂຊກ ມີຮູບຮ່າງລັກສະນະ ສື່ໃຫ້ເຫັນເຖິງຄວາມເຂັ້ມແຂງ, ພະລັງ ແລະ ຄວາມຍຸດຕິທຳ. ນີ້ເປັນຄັ້ງທີ 2 ທີ່ຍີ່ປຸ່ນ ໄດ້ຮັບກຽດເປັນເຈົ້າພາບກິລາໂອແລມປິກທັງສອງງານ ຕໍ່ຈາກປີ 1964.

Photo: olympic.org