ຍິ່ງໃຫຍ່!!ໂດ້ໄດ້ລາງວັນ ບານລົງ ດໍ 2016

 

ຄຣິສຕຽນໂນ ໂຣເນົາໂດ ຊູເປີສະຕາຂອງ ເຣອັນ ມາດຣິດ ໄດ້ເປັນເຈົ້າຂອງລາງວັນ ບານລົງ ດໍ 2016 ໂດຍມັນເປັນຄັ້ງທີ່ 4 ຂອງເຂົາທີ່ໄດ້ຮັບລາງວັນນີ້.

 

ຄຣິສຕຽນໂນ ໂຣເນົາໂດ ຊູເປີສະຕາຂອງ ເຣອັນ ມາດຣິດ ແລະ ທີມຊາດປັອກຕຸຍການໄດ້ຮັບການໂຫວດໃຫ້ເປັນນັກເຕະ ບານລົງ ດໍ 2016 ຕາມຄວາມຄາດໝາຍ ນັບເປັນເທື່ອທີ 4 ທີ່ເຂົາໄດ້ຄອງລາງວັນນີ້ຈາກຜົນງານເດັ່ນໃນການນໍາທີມຊາດປັອກຕຸຍການໄດ້ແຊມ ຢູໂຣ 2016 ເມື່ອກາງປີທີ່ຜ່ານມາອີກທັງຍັງໄດ້ແຊມ ຢູຟາ ແຊມປຽນ ລີກ ກັບ ເຣອັນ ມາດຣິດ ອີກດ້ວຍ ໃນສ່ວນຂອງ ລີໂອເນວ ເມສຊີ ແຊມ ບານລົງ ດໍ 5 ສະໄໝຂອງ ບາເຊໂລນາ ແລະ ທີມຊາດອາເຈັນຕິນາກັບ ອອງຕວນ ກຣິສັມນ ຂອງຝຣັ່ງ ແລະ ແອັດ ມາດຣິດ ໄດ້ອັນດັບ 2 ແລະ 3 ຕາມລຳດັບ ຈາກການເປີດເຜີຍຂອງນິຕິຍະສານ ຟຣັອງ ຟຸດບອນ ເມື່ອວັນຈັນທີ່ຜ່ານມາ.

 

ນິຕິຍະສານ ຟຣັອງ ຟຸດບອນ ຂອງເມືອງນຳ້ຫອມໄດ້ປະກາດຜົນລາງວັນ ບານລົງ ດໍ 2016 ຫຼື ລາງວັນບານຄຳທີ່ໝາຍເຖິງນັກເຕະດີເດັ່ນຂອງໂລກຜ່ານທາງສະຖານີໂທລະພາບ “ເລກິບ” ສື່ກິລາຍັກໃຫຍ່ຮ່ວມຄ້າຍເມື່ອຄືນວັນຈັນທີ່ຜ່ານມາ ໂດຍການແຈກລາງວັນໃນປີນີ້ກັບຢູ່ໃນມືຂອງ ຟຣັອງ ຟຸດບອນ ເຈົ້າຂອງລາງວັນແຕ່ດັ້ງເດີມພຽງຜູ້ດຽວ ບໍ່ໄດ້ຮ່ວມແຈກລາງວັນກັບ ຟີຟາ ຄືກັບ 6 ປີທີ່ຜ່ານມາ ກຳມະການທີ່ຮ່ວມລົງຄະແນນຈຶ່ງເຫຼືອພຽງຜູ້ສື່ຂ່າວສະເພາະທາງ ຫຼື ສາຍບານເຕະຊາດລະ 1 ສຽງ ເຊິ່ງປີນີ້ມີຊື່ທີ່ຮ່ວມລົງຄະແນນທັງໝົດຈາກ 173 ປະເທດທົ່ວໂລກ.

 

ສຳລັບລາງວັນ ບານລົງ ດໍ 2016 ຕົກເປັນຂອງ ຄຣິສຕຽນໂນ ໂຣເນົາໂດ ຕາມຄາດໝາຍເນື່ອງຈາກວ່າກັບຕັນທີມຊາດປັອກຕຸຍການໄດ້ທັງຂັນລາຍການໃຫຍ່ກັບທີມຊາດ ແລະ ສະໂມສອນ ອີກທັງຍັງຫຼິ້ນໄດ້ຕາມມາດຕະຖານເຖິງວ່າຈະມີອາການບາດເຈັບລົບກວນ ໂດຍກັບທີມຊາດປັອກຕຸຍການ ຄຣິສຕຽນໂນ ໂຣເນົາໂດ ຮ່ວມຄວ້າແຊມ ຢູໂຣ 2016 ກັບທີມຊາດຂະນະທີ່ກັບສະໂມສອນ ເຣອັນ ມາດຣິດ ກໍຮ່ວມນຳທັບ ລາຊາຊຸດຂາວ ເປັນເຈົ້າເອີຣັບສະໄໝທີ 11 ໄດ້ສຳເລັດ ນອກຈາກນັ້ນຍັງເປັນ ດາວຊັນໂວ ສູງສຸດຂອງ ແຊມປຽນ ລີກ ຈາກການຍິງໄປເຖິງ 16 ປະຕູ.

 

ອະດີດແຄ່ງ ແມນ ຢູໄນເຕັດ ເຄີຍໄດ້ລາງວັນນີ້ຄັ້ງທຳອິດໃນປີ 2008 ກ່ອນມາໄດ້ເທື່ອທີ 2 ແລະ 3 ໃນປີ 2013 ແລະ 2014 ເຊິ່ງນັບຕັ້ງແຕ່ປີ 2008 ເປັນຕົ້ນມາລາງວັນນີ້ເປັນພຽງເລື່ອງຂອງເຂົາກັບ ລີໂອເນວ ເມສຊີ ດາວຈາກ ບາຊາ ແລະ ອາເຈັນຕິນາເທົ່ານັ້ນ.