ຍັງມີການໃຊ້ສານກັນບູດໃສ່ອາຫານ ຢ່າງແຜ່ຫລາຍ

ຜ່ານ​ການ​ກວດກາ​ ຂອງ​ເຈົ້າໜ້າ​ທີ່ກ່ຽວຂ້ອງ ​ໄດ້​ລົງ​ກວດ​ສິນຄ້າ, ​ອາຫານຢູ່​ຕະຫລາດ​ແຫ່ງ​ຕ່າງໆ​ ໃນ​ນະຄອນຫລວງ​ວຽງ​ຈັນ ​ພົບ​ວ່າ: ຍັງ​ມີ​ຊາວ​ຄ້າ​ຂາຍ​ຈຳນວນ​ໜຶ່ງ ​ນຳ​ໃຊ້​ສານ​ກັນ​ບູດ​(ຟອ໋ກ​ໂມນ)​ເຂົ້າ​ໃນ​ການ​ແຊ່​ອາຫານ​ຢ່າງ​ແຜ່​ຫລາຍ ​ແລະ ສ່ວນ​ຫລາຍ ​ແມ່ນ​ອາຫານ​ທະ​ເລ ​ເຊັ່ນ: ປາ​ມຶກ, ຢໍ່ຂາວ, ຊິ້ນສ່ວນ​ສັດ ​ແລະ ອື່ນໆ.

ທ່ານນາງ ພັດທະລີ ພິດສະໄໝ ຫົວໜ້າ​ຂະ​ແໜງ​ລ້ຽງສັດ ​ແລະ ການ​ປະມົງ, ນະຄອນຫລວງ​ວຽງ​ຈັນ ​​ໄດ້ແຈ້ງ​ຕໍ່​ນັກ​ຂ່າວ ​ໃນ​ວັນ 29ກັນຍາ 2015 ​ນີ້​ ວ່າ: ໄລຍະ​ຜ່ານ​ມາ ​ໜ່ວຍ​ງານ​ຂອງ​ຕົນ​ໄດ້​ເອົາ​ໃຈ​ໃສ່​ ​ລົງ​ກວດ​ກາ​ອາຫານຢູ່​ຕາມ​ຕະຫລາດ​ຕ່າງໆ​​​ຢ່າງ​ເປັນ​ປະຈຳ ເພື່ອ​​​ແນ່​ໃສ່​ຄວບ​ຄຸ​ມທາງ​ດ້ານ​ໂພ​ຊະນາ​ການ​ໃຫ້​ຖືກ​ຫລັກ​ອະນາ​ໄມ, ປາສະຈາກ​ສານ​ປົນ​ເປື້ອນຕ່າງໆ​ ທີ່​ອາດ​ສົ່ງ​ຜົນ​ກະທົບ​ບໍ່​ດີຕໍ່​ສຸຂະພາບ​ຂອງ​ປະຊາ​ຊົນ ​ແລະ ​ເຫັນ​ວ່າ​ຍັງ​ມີ​ຊາວ​ຄ້າຂາຍ​ຈຳນວນ​ໜຶ່ງ ຢູ່​ຕາມ​ຕະຫລາດ​ຍັງ​ນຳ​ໃຊ້​ສານ​ກັນ​ບູດ​​ແຊ່​ອາຫານ​ ໃຫ້​ສາມາດ​ຮັກສາ​​ໄວ້​ໄດ້​ດົນ ​ແລະ ​ເບິ່ງ​ຄື​ວ່າ​ສົດ​ຢູ່​ຕະຫລອດ​ເວລາ,​ ແຕ່​ສານ​ດັ່ງກ່າວ ​ມີ​ຜົນກະທົບ​ຮ້າຍ​ແຮງ​ຕໍ່​ສຸຂະພາບ​ຂອງ​ຜູ້​ບໍລິ​ໂພ​ກ. ​ເມື່ອກວດ​ພົບ​ເຫັນ ພາກສ່ວນ​ກ່ຽວຂ້ອງ​ກໍ​ໄດ້​​ຕັກ​ເຕືອນ​ແມ່​ຄ້າ​ຜູ້​ກະທຳ​ຜິດພ້ອມ​​ນຳ​ເອົາອາ​ຫານ​ທີ່​ປົນ​​ເປື້ອນ​ໄປ​ທຳລາຍ​ຖິ້ມ ຖ້າຫາກ​​ຍັງ​ລະເມີດກວດ​ພົບ​ເຫັນ ​​ໃນ​ຄັ້ງ​ຕໍ່​ໄປ ​ກໍ​ຈະ​ຖືກ​ດຳ​ເນີນ​ມາດ​ຕະການ​ຕາມ​ລະບຽບ​ກົດໝາຍ.

ເນື່ອງ​ຈາກ​ສານ​ດັ່ງກ່າວ​ ອັນ​ຕະລາຍ​ຕໍ່​ສຸຂະພາບ, ​ເຊິງ​ສ່ວນ​ຫລາຍ​ຈະ​ນຳ​ໃຊ້​ສະ​ເພາະ​ວຽກ​ງານ​ສາທາ​ລະນະ​ສຸກເທົ່າ​ນັ້ນ(​ໃຊ້​ແຊ່​ສົບ​ຄົນ​ຕາຍ) ​ແລະ ຖ້າ​ຫາກ​ມີການ​ສູບ​ດົມ ຫລື ກິນ​ສານ​ດັ່ງກ່າວ​ເຂົ້າ​ໄປ​ຈະ​ເຮັດ​ໃຫ້​ຮ່າງກາຍ​ໄດ້​ຮັບຜົນກະທົບ​ ຄື: ຈະ​ໄປ​ທຳລາຍ​ລະບົບ​ຫາຍ​ໃຈ,ສະໜອງ, ລະບົບ​ຍ່ອຍ​ອາຫານ ​ແລະ ຈຸ​ລັງ​ຕ່າງໆ​ ເຮັດ​ໃຫ້​ລະບົບ​ຍ່ອຍ​ອາຫານ​ເປັນ​ບາດ​​ແຜ່, ສົ່ງ​ຜົນ​ໃຫ້ສຸຂະພາບ​ຊຸດ​ໂຊມ​ ​ແລະ ​ເກີດ​ພະຍາດ​ຕ່າງໆ ​ແລະ ກໍ່​ໃຫ້​ເກີດ​ພະຍາດ​ມະ​ເຮັງ​ອີກ​ດ້ວຍ.

ທ່ານນາງ ພັດທະລີ ພິດສະໄໝ ​ເປີດ​ເຜີຍ​ໃຫ້​ຮູ້​ຕ່ືມ​ວ່າ: ​ເພື່ອ​​ປ້ອງ​ກັນ​ບໍ່​ໃຫ້​ມີ​ການ​ນຳ​ໃຊ້ສານ​ປົນ​ເປື່ອນຕ່າງໆ ​​ເຂົ້າ​ໃນການ​ແຊ່ອາຫານ​ ພາກສ່ວນ​ກ່ຽວຂ້ອງ​ຈະ​ເພີ່ມ​ຄວາມ​ເຂັ້ມ​ງວດ​ໃນ​ການ​ກວດກາ​ ຕາມທ້ອງຕະຫລາດ​ ​​ແລະ ​ຕໍ່​ຜູ້​ລະ​ເມີດ, ຖ້າ​ກວດ​ພົບ​ຈະ​​ດຳ​ເນີນ​ຄະດີ​ຕາມ​ລະບຽບ​ກົດໝາຍ