ຍັງຈື່ເຫດການນີ້ໄດ້ບໍ່ 09.11.2001 ວັນທີ່ອາເມລິກາຖືກໂຈມຕີ

ເຖິງ​ວ່າ​ຈະ​ມີ​ໄລ​ຍະ​ຜ່ານ​ມາ 14 ປີ​, ແຕ່ວັນທີ 11 ເດືອນ​ກັນ​ຍາ​ປີ 2001 ຫຼື 9/11 ຍັງ​ຕິດ​ຢູ່​ໃນ​ຈິດ​ໃຈ​ຂອງ​ປະ​ຊາ​ຊົນ​ໃນ​ທົ່ວ​ໂລກ​.

9/11 ນີ້​ແມ່ນ​ການ​ກໍ່ການຮ້າຍທີ່​ຮ້າຍ​ແຮງ​ທີ່​ສຸດ​ໃນ​ປະ​ຫວັດ​ສາດ​. ໂດຍເປັນປະຕິບັດການທີ່ເກີດຂຶ້ນຢູ່ສີ່ີສະຖານທີ່ພ້ອມກັນຢູ່​ໃນ​ສະ​ຫະ​ລັດ​ອາ​ເມລິ​ກາ​, ໃນ​ຕອນ​ເຊົ້າ​ຂອງວັນທີ 11 ກັນ​ຍາ 2001 ໄດ້​ມີຜູ້​ກໍ່​ການ​ຮ້າຍ​ 19 ຄົນ ຈີ້ເຮືອບິນໂດຍສານ 4 ລໍາ​, ສອງລໍາທໍາ​ອິດ​ແມ່ນ​ບິນສະລະຊີບເຂົ້າຕຳ​ອາ​ຄານ​ຕຶກແຝດ World Trade Center ​ໃນ​ນະ​ຄອນ​ນິວ​ຢອກຈົນເຮັດໃຫ້ອາຄານທັງສອງຫຼັງພັງທະລາຍລົງພາຍໃນ​​ສອງ​ຊົ່ວ​ໂມງ​.

ເຮືອ​ບິນ​ລຳທີສາມ​ບິນຕຳກັບອາຄານ ເພັນຕາກ້ອນ ໃນ ອາລິງຕັ້ນ ລັດ ເວີຈິເນຍ​, ສ່ວນລຳທີ 4 ສາຍການບິນ ຢູໄນເຕັດ ແອລາຍ ຖ້ຽວບິນທີ 93 ຕົກໃນທົ່ງໃກ້ກັບ ແຊງວິວ ລັດ ເພັນຊິວເວເນຍ ກ່ອນຈະເຖິງເປົ້າໝາຍອາຄານລັດຖະສະພາໃນ ວໍຊິງຕັນ ດີຊີ ໂດຍມື້ນັ້ນມີຜູ້ເສຍຊີວິດເກືອບ 3000 ຄົນ​.

ເຊິ່ງການກໍ່ການຮ້າຍຄັ້ງນີ້ ພຸ່ງເປົ້າສົງໄສໄປທີ່ກຸ່ມຜູ້ກໍ່ການຮ້າຍ ອັນກໍອິດະ​. ຫຼັງ​ຈາກ​ນັ້ນ​ບໍ່​ດົນ​ຜູ້​ນໍາ​ກຸ່ມ ອູຊາມະ ບິນ ລາດິນ ໄດ້ອອກມາອ້າງຄວາມຮັບຜິດຊອບຕໍ່ເຫດການດັ່ງກ່າວ ເຊິ່ງເປັນເຫດໃຫ້ສະຫະລັດອາເມລິກາຕາມລ່າໂຕ ບິນ ລາດິນ ຢູ່ຫຼາຍປີ, ຈົນຮອດວັນທີ 2 ພຶດສະພາ ປີ 2011 ເຂົາເສຍຊີວິດບໍລິເວນບ້ານໃນ ແອບບອດທາບັດ ໂດຍປະຕິບັດການບຸກໂຈມຂອງໜ່ວຍ ຊິວ ຂອງສະຫະລັດອາເມລິກາ.

ແຕ່​ເຖິງ​ແມ່ນ​ວ່າໂຕຂອງ ອູຊາມະ ບິນ ລາດິນ ຈະບໍ່ຢູ່ແລ້ວແຕ່ເລື່ອງຂອງການກໍ່ການຮ້າຍຍັງມີໃຫ້ເຫັນຢູ່ເລື້ອຍໆ ເປັນບັນຫາທີ່ຍາກ ແລະ ເຊື່ອວ່າຍັງສ້າງຄວາມຫວັ່ນໄຫວໃຫ້ກັບລັດຖະບານອະເມລິກາໄປອີກດົນ.

 

.............................................................................................................................................................

ຮຽບຮຽງໂດຍ : ນາມມະທຳ ອອນລາຍ