ຊຽງຂວາງຫາລືການລົງທຶນສົ່ງເສີມການ ຜະລິດເປັນສິນຄ້າຮອດປີ 2020

ກອງປະຊຸມອົງການປົກຄອງທ້ອງຖິ່ນ​ ແຂວງຊຽງ​ຂວາງປະຈຳເດືອນກໍລະກົດຜ່ານ​ມາ​​ ໂດຍທ່ານ ດຣ. ບົວສອນ ສີນວນທອງ ຮອງເຈົ້າແຂວງດັ່ງກ່າວ​ແລະ ພາກສ່ວນ​ຕ່າງໆ ​ເຫັນ​ພ້ອມ​ການ​ລົງທຶນ​ຂະໜານ​ໃຫຍ່ ​ເພື່ອ​ສົ່ງ​ເສີມ​ການ​ຜະ ລິດກະສິກຳ​ເປັນ​ສິນຄ້າ ບັນລຸ​ຕາມ​ເປົ້າໝາຍ​ທີ່​ວາງ​ໄວ້.

ຜູ້​ເຂົ້າຮ່ວມກອງປະຊຸມເຫັນ​ວ່າ: ແຕ່ນີ້ຫາປີ 2020,​ ແຂ​ວງຂອງ​ຕົນຕ້ອງຜະລິດຊີ້ນ, ປາ ແລະ ໄຂ່ໃຫ້ໄດ້ 26.000 ໂຕນ​ໂດຍສູ້​ຊົນ​ເຮັດ​ໃຫ້ສັດໃຫຍ່ ຂະຫຍາຍ​ເພີ່ມ​ຂຶ້ນ 6%ຕໍ່ປີ​ເພື່ອ​ບັນລຸ​ການສົ່ງອອກຊີ້ນງົວຄວາຍ 4.000-5.000 ໂຕນ, ຂະນະ​ດຽວ​ກັນ​ກໍ​ຕ້ອງປູກຕົ້ນແປກພັນປັບປຸງ​, ສາລີອາຫານສັດໃຫ້ໄດ້ 150.000 ໂຕນ, ຜະລິດເຂົ້າເພື່ອສົ່ງອອກໃຫ້ໄດ້44.000ໂຕນ, ກາແຟ 1.000ໂຕນ, ຊາ 4.000ໂຕນ,ຜັກທຽມ 4.500 ໂຕນ, ຖົ່ວດິນ 920 ໂຕນ, ໝາກເຜັດ 2.200 ໂຕນ, ປູກພືດອາຫານສັດ, ການທອມສັດ ​ແລະ ຈັດຊື້ແນວພັນສັດ ​ແລະ ​ເພື່ອ​ບັນລຸ​ເປົ້າໝາຍ​ເຫລົ່າ​ນີ້ ​ຈຳ​ເ​ປັນ​ຕ້ອງ​ໄດ້ລົງທຶນ ກວ່າ10 ຕື້ກີບ ໃນນີ້​ເປ​ັນການ​ລົງທຶນຂອງ​ພາກລັດກວ່າ 4 ຕື້ກີບ.ຂະນະ​ທີ່ການຄຸ້ມຄອງສັດ ແລະ ບໍລິໂພກຊີ້ນພາຍໃນກໍ​ຕ້ອງ​ໄດ້ລົງທຶນກວ່າ 6 ຮ້ອຍລ້ານກີບ, ການສັກຢາກັນພະຍາດ ແລະ ຂຶ້ນທະບຽນພິມສັດກໍ​ຕ້ອງ​ໄດ້ລົງທຶນລວມກວ່າ 9ຕື້ກີບ, ການນຳເຂົ້າລູກງົວຊອດ ແລະ ປັບປຸງສາຍພັນ ກໍ​ຕ້ອງ​ໄດ້ລົງທຶນກວ່າ 1 ຕື້ກີບ.

ກອງ​ປະຊຸມ​ດັ່ງ​ກ່າວ ຍັງ​ຍົກ​ໃຫ້​ເຫັນ​ອີກ​ວ່າ: ສຳລັບການປູກສາລີເປັນສິນຄ້າຕິດພັນ ກັບການປັບປຸງດິນກໍ​ຕ້ອງ​ໄດ້​ລົງທຶນກວ່າ 34 ຕື້ກີບໃນນີ້​ເປັນທຶນຂອງ​ພາກລັດກວ່າ 8 ຕື້ກກີບ, ການສົ່ງເສີມການປູກເຂົ້າໄກ່ນ້ອຍ ເປັນສິນຄ້າກໍ​ຕ້ອງ ການລົງທຶນກວ່າ 246 ຕື້ກີບໃນນີ້​ເປັນ​ທຶນຂອງ​ພາກລັດກວ່າ 527 ລ້ານກີບ, ການປູກຜັກທຽມເປັນສິນຄ້າກໍ​ຕ້ອງ​ໄດ້​ລົງລົງທຶນກວ່າ 39 ຕື້ກີບ( ທຶນຂອງ​ພາກ​ລັດກວ່າ 3 ຕື້ກີບ), ການປູກກາແຟເປັນສິນກໍ​ຕ້ອງ​ໄດ້ລົງທຶນກວ່າ 6 ຕື້ກີບ​ໃນນັ້ນ​ເປັນທຶນຂອງ​ພາກລັດກວ່າ 175 ລ້ານກີບ, ການປູກ ແລະ ປຸງແຕ່ງຊາເປັນສິນຄ້າກໍ​ຕ້ອງ​ໄດ້ລົງທຶນກວ່າ 5 ຕື້ກີບໃນນັ້ນ ​ເປັນທຶນຂອງ​ພາກລັດກວ່າ 168 ລ້ານກີບ, ການປູກໄມ້ໃຫ້ໝາກເປັນສິນຄ້າ ກໍ​ຕ້ອງລົງທຶນກວ່າ 10 ຕື້ກີບໃນນັ້ນ​ເປັນທຶນຂອງ​ພາກລັດກວ່າ 4 ຕື້ກີບ, ການປູກໝາກກ້ວຍກໍ​ຕ້ອງ​ໄດ້ລົງທຶນກວ່າ 3 ຕື້ກີບໃນນັ້ນ​ເປັນທຶນຂອງ​ພາກລັດກວ່າ 426 ລ້ານກີບ.

..............................................................................................................................................................................................................

ທີ່ມາ: www.kpl.gov.la