ຊົວເຣດ ບອກຖ້າກັບອັງກິດຈະຫຼິ້ນໃຫ້ ຫົງແດງ ເທົ່ານັ້ນ

 

“ທີມນີ້ຂ້ອຍຮັກ” ຫຼຸຍ ຊົວເຣດ ຫົວຫອກ ບາເຊໂລນາ ເວົ້າກິນໃຈແຟນບານ “ເດິ ຄັອບ” ຫຼັງປະກາດຖ້າຈະກັບໄປຫຼິ້ນໃນເມືອງຜູ້ດີ ຂໍຍ້າຍໄປຫຼິ້ນໃຫ້ ລີເວີພູ ເທົ່ານັ້ນເພາະເປັນສະໂມສອນທີ່ຮັກທີ່ສຸດ ລະບຸຄິດຮອດແຟນບານ ແລະ ບັນຍາກາດທີ່ສຸດໜ້າເຫຼືອເຊື່ອໃນແອນຟິວສະເໝີ.

 

ຫຼຸຍ ຊົວເຣດ ກອງໜ້າຂອງ ບາເຊໂລນາ ມະຫາອຳນາດລູກໜັງຈາກ ລາ ລີກາ ສະເປນ ເປີດໃຈຖ້າມື້ໜຶ່ງຈະກັບໄປຫຼິ້ນໃນ ພຣີເມຍລີກ ອັງກິດ ສະໂມສອນດຽວທີ່ຈະໄປຫຼິ້ນກໍຄື “ຫົງແດງ” ລີເວີພູ ທີມຮັກທີມດຽວໃນດວງໃຈເທົ່ານັ້ນ.

 

ຫົວຫອກທີມຊາດ ອູລູກວາຍ ຍິງໄປແລ້ວ 29 ປະຕະຈາກການລົງຫຼິ້ນໃນລະດູການນີ້ ແລະ ບໍ່ມີຫຍງຕ້ອງສົງໄສເລີຍວ່ານັກເຕະຕົກເປັນເປົ້າໝາຍໃນການເສີມທັບຂອງບັນດາທີມຍັກໃຫຍ່ໃນລີກສູງສຸດເມືອງຜູ້ດີ ຢ່າງໃດກໍຕາມ ຊົວເຣດ ປະຕິເສດທີ່ຈະຍ້າຍໄປຫຼິ້ນໃຫ້ກັບ ແມນເຊສເຕີ ຢູໄນເຕັດ ຫຼື ເຊວຊີ ເພາະຖ້າຈະກັບໄປຫຼິ້ນໃນອັງກິດ ຈະຂໍນຸ່ງເສື້ອໃຫ້ກັບທີມຈາກຖິ່ນ ແອນຟິວ ເທົ່ານັ້ນ.

 

ຊົວເຣດ ເຊິ່ງຢູ່ຟາດແຄ່ງພາຍໃຕ້ສີເສື້ອ “ເດີ ເຣດ” ເປັນເວລາ 3 ປີເຄິ່ງ ກ່ອນທີ່ຈະຍ້າຍໄປຫຼິ້ນໃນ ແຄັມ ນູ ຍອມຮັບວ່າຍັງຄົງຄິດຮອດບັນຍາກາດໃນຖິ່ນ ແອນຟິວ ແລະ ແຟນບານ “ເດິ ຄັອບ” ຢູສະເໝີ “ເຈົ້າບໍ່ມີທາງຮູ້ດອກວ່າມີຫຍັງແນ່ຈະເກີດຂຶ້ນໃນອະນາຄົດ ຖ້າຂ້ອຍກັບໄປ ອັງກິດ ຂ້ອຍກໍຈະຫຼິ້ນໃຫ້ ລີເວີພູ ເທົ່ານັ້ນ ບໍ່ມີທາງຫຼິ້ນໃຫ້ສະໂມສອນອື່ນເດັດຂາດ”.

 

“ຂ້ອຍຄິດຮອດແຟນບານ ບັນຍາກາດທີ່ໜ້າເຫຼືອເຊື່ອ ທຸກໆຄົນທີ່ຫຼິ້ນໃຫ້ກັບ ລີເວີພູ ຮູ້ວ່າແຟນບານເປັນສິ່ງທີ່ມີຄວາມສຳຄັນຫຼາຍປານໃດ ພວກເຂົາຮູ້ວ່າພວກເຂົາຈະຢູ່ໃນໃຈຂ້ອຍຕະຫຼອດໄປ” ອະດີດດາວເຕະ ອາແຈັກ ອຳສະເຕີດຳ ກ່າວ.