ຊົວເຣດເທບ!!ບາຊາຈໍ່ຕໍ່ສັນຍາພ້ອມເພີ່ມຄ່າເມື່ອຍ

 

ບາຊາ ເຫັນຟອມເທບມາຕະຫຼອດເລີຍກຽມການຂະຫຍາຍສັນຍາກັບ ຫຼຸຍ ຊົວເຣດ ດາວຍິງຂອງທີມອີກ 1 ປີ ພ້ອມກັບເພີ່ມຄ່າເມື່ອຍໃຫ້ອີກ 100,000 ປອນຕໍ່ອາທິດເຮັດໃຫ້ ຊົວເຣດ ຈະໄດ້ຮັບຄ່າຈ້າງຂຶ້ນມາທຽບເທົ່າກັບ ເນມາ ຫົວຫອກອີກຄົນຂອງທີມໂດຍຮອງພຽງແຕ່ ລີໂອເນວ ເມສຊີ້ ທີ່ໄດ້ຮັບຄ່າເມື່ອຍຫຼາຍທີ່ສຸດຂອງສະໂມສອນເທົ່ານັ້ນ.

 

ຫຼຸຍ ຊົວເຣດ ກອງໜ້າຮ່າງຕັນຂອງ ບາເຊໂລນາ ສະໂມສອນຍັກໃຫຍ່ຂອງ ລາ ລີກາ ສະເປນກຽມຈົດປາກກາຂະຫຍາຍສັນຍາກັບຕົ້ນສັງກັດອີກ 1 ປີ ພ້ອມເພີ່ມຄ່າເມື່ອຍໃຫ້ອີກ 100,000 ປອນຕໍ່ອາທິດທຽບເທົ່າກັບ ເນມາ ຫົວຫອກເພື່ອນຮ່ວມທີມໃນໄວໆນີ້ ຈາກການລາຍງານຂອງ ສະປອດ ສື່ດັງແຄວ້ນກາຕາລັນເມື່ອວັນພຸດທີ່ຜ່ານມາ.

 

ນັບຕັ້ງແຕ່ຍ້າຍມາຈາກ ລີເວີພູ ມາຫຼິ້ນໃຫ້ກັບ ບາເຊໂລນາ ຊົວເຣດ ກໍເຮັດຜົນງານໄດ້ແບບຂັ້ນເທບໂດຍການທະລົ່ມປະຕູຄູ່ແຂ່ງຢ່າງມະຫາສານຈົນໄດ້ລາງວັນດາວຍິງສູງສຸດຂອງເອີຣົບລະດູການທີ່ຜ່ານມາໄປຄອງ ແລະ ຍັງປະສານງານກັບ ເນມາ ລວມທັງ ເມສຊີ້ ໄດ້ຢ່າງດີເຮັດໃຫ້ ບາຊາ ພ້ອມຕອບແທນ ຊົວເຣດ ໂດຍການເພີ່ມຄ່າເມື່ອຍໃຫ້ຈາກປັດຈຸບັນທີ່ເຂົາມີສັນຍາກັບ ບາຊາ ຮອດປີ 2019 ແລະ ຮັບຄ່າເມື່ອຍຢູ່ປະມານ 170,000 ປອນຕໍ່ອາທິດ.

 

ໝາຍຄວາມວ່າໃນສັນຍາໃໝ່ ຊົວເຣດ ຈະຢູ່ກັບ ບາຊາ ຈົນຮອດປີ 2020 ແລະ ຮັບເງິນເຖິງ 272,000 ປອນຕໍ່ອາທິດເທົ່າກັບ ເນມາ ເປັນຮອງພຽງແຕ່ ເມສຊີ ຫົວຫອກເບີ 1 ຂອງສະໂມສອນທີ່ໄດ້ປະມານ 360,000 ປອນຕໍ່ອາທິດເທົ່ານັ້ນ.