ຊົວເຣດບອກດາວກລິດແມ່ນຄົນປ່ຽນຕົນໃຫ້ດີ

 

ຫຼຸຍ ຊົວເຣດ ຫົວຫອກ ບາເຊໂລນາ ຍົກ ເຄັນດີ ດາວກລິດ ຕຳນານ ລີເວີພູ ເປັນບຸກຄົນທີ່ປຽນແປງຕົນເອງຢ່າງແທ້ຈິງເພາະວ່າ “ຄິງ ເຄັນນີ” ໃຫ້ການໜຸນຫຼັງມາຕະຫຼອດໃນຊ່ວງທີ່ປະສົບບັນຫາກໍລະນີຢຽດຜິວພ້ອມຮັບ ຄາລອສ ເຕເວດ ຫົວຫອກອັກຊັງຕິນຄືແຮງບັນດານໃຈໃຫ້ຢາກລອງຍ້າຍມາຫຼິ້ນທີ່ລີກຜູ້ດີ.

 

ຫຼຸຍ ຊົວເຣດ ກອງໜ້າ ບາເຊໂລນາ ມະຫາອຳນາດລູກໜັງຈາກ ລາ ລີກາ ສະເປນ ກ່າວສັນລະເສີນ ເຄັນນີ ດາວກລິດ ຕຳນານນັກເຕະ ແລະ ຜູ້ຈັດການທີມ ລີເວີພູ ສະໂມສອນດັງຈາກ ພຣີເມຍລີກ ທີ່ຢືນຄຽງຂ້າງຕົນມາຕະຫຼອດໃນຊ່ວງປະສົບບັນຫາສ່ວນຕົວສະໄໝທີ່ຢູ່ກັບ “ລີເວີພູ”.

 

“ຄິງ ຊົວເຣດ” ຕົກເປັນເປົ້າໂຈມຕີຢ່າງໜັກຕອນທີ່ຖືກລົງໂທດເວົ້າຈາຢຽດຜິວ ພາຕຣິດ ເອຟຣາ ໃນເກມແດງເດືອດດວນກັບ ແມນເຊສເຕີ ຢູໄນເຕັດ ເມື່ອປີ 2011 ໂດຍໃນຊ່ວງເວລານັ້ນ ດາວກລິດ ຢູ່ຂ້າງນັກເຕະມາຕະຫຼອດເຖິງວ່າສຸດທ້າຍ ຊົວເຣດ ຈະຖືກສະມາຄົມບານເຕະອັງກິດສັ່ງລົງໂທດແບນຍາວ 8 ເດືອນກໍຕາມ.

 

ກອງໜ້າທີມຊາດ ອູລູກວາຍສະແດງຄວາມເຫັນວ່າ “ເຄັນນີ ປ່ຽນແປງຂ້ອຍ ສິ່ງທີ່ເຂົາເຮັດເພື່ອຂ້ອຍຕອນທີ່ຢູ່ກັບ ລີເວີພູ ສຳລັບແນວທາງທີ່ເຂົາເຮັດໃນຊ່ວງເວລານັ້ນ ເຂົາປຽບທຽບໂຕຂ້ອຍກັບເຂົາ ເຂົາໃຫ້ການສະໜັບສະໜູນຂ້ອຍໃນຊ່ວງເວລາທີ່ເກີດກໍລະນີຢຽດຜິວ ເຂົາປົກປ້ອງຂ້ອຍເພາະເຂົາເຊື່ອໝັ້ນໃນໂຕຂ້ອຍ ແລະ ຂ້ອຍຍັງຮູ້ສຶກປິຕິໃຈໃນໂຕເຂົາ”.

 

ນອກຈາກນີ້ ຊົວເຣດ ຍັງຍອມຮັບວ່າການເຫັນ ຄາລອສ ເຕເວດ ດາວຍິງຂອງອັກຊັງຕິນເຊິ່ງຮູບຮ່າງນ້ອຍຫຼາຍເປັນແຮງບັນດານໃຈໃຫ້ຕົນຍ້າຍມາຫຼິ້ນໃນລີກສູງສຸດຂອງເມືອງຜູ້ດີ “ຕອນທີ່ຂ້ອຍຫຼິ້ນໃຫ້ ອາແຈັກ ເວລານັ້ນ ຄາລອສ ເຕເວດ ເຊິ່ງເປັນແຮງບັນດານໃຈໃຫ້ກັບຂ້ອຍທີ່ຈະຍ້າຍໄປຫຼິ້ນໃນ ພຣີເມຍລີກ ຂ້ອຍມັກທີ່ຈະເບິ່ງເຂົາ ແລະ ຄິດວ່າຖ້າ ເຕເວດ ເຮັດໄດ້ເປັນຫຍັງຂ້ອຍສິເຮັດບໍ່ໄດ້ ເຂົາໂຕນ້ອຍແຕ່ວ່າສູ້ກັບກອງຫຼັງພວກນັ້ນໄດ້ສະບາຍ”.