ຊຸດນັກຮຽນກັບຮ້ານເບຍ ບັນຫານີ້ຈະແກ້ໄຂແນວໃດ?

           

ຂປລ. ເປີດຊອງຈົດໝາຍຈາກປະຊາຊົນສົ່ງຂ່າວມາຫ້ອງຂ່າວໂດຍມີເນື້ອໃນລະບຸວ່າ: ມີນັກຮຽນຈໍານວນໜຶ່ງບໍ່ຂຶ້ນຫ້ອງຮຽນ ແລະ ຂີ້ຕົວະພໍ່ແມ່ຜູ້ປົກຄອງວ່າໄປໂຮງຮຽນ ແຕ່ສຸດທ້າຍພາກັນເຂົ້າຮ້ານກິນດື່ມ(ຊື່ຮ້ານຂໍສະຫງວນໄວ້) ຢູ່ບ້ານໂນນສະອາດ ເມືອງໄຊທານີ ໃນວັນທີ 9 ພຶດສະພາ 2016 ຜ່ານມາ ເວລາ 14:00 ໂມງ ໃນຮ້ານກິນດື່ມດັ່ງກ່າວມີການຂາຍສິ່ງມຶນເມົາ 1 ແກ້ວ ຕໍ່ 5.000 ກີບ ແຕ່ສິ່ງທີ່ໜ້າເປັນຫ່ວງກໍຄືນັກຮຽນພາກັນນຸ່ງຊຸດນັກຮຽນ ແລະ ຊາວໜຸ່ມເຂົ້າໄປຕັ້ງວົງເປັນກຸ່ມໃຫຍ່ໆດື່ມກັນຮ້ອງໂຫ່ດັງສະໜັ່ນຫວັ່ນໄຫວ. ສະນັ້ນ, ຂໍໃຫ້ເຈົ້າໜ້າທີ່ກ່ຽວຂ້ອງ ແລະ ພໍ່ແມ່ຜູ້ປົກຄອງຄູອາຈານຄວນກວດກາ ແລະ ເອົາໃຈໃສ່ເລື່ອງນີ້ຕື່ມ.

       ຜູ້ປົກຄອງຫຼາຍທ່ານອາດຈະບໍ່ສົງໄສຫຍັງ ເພາະຕ່າງຄົນກໍຕ່າງມີພາລະໜ້າທີ່ຂອງໃຜລາວ ບໍ່ມີເວລາທີ່ຈະໄປຕິດຕາມລູດທຸກກ້າວ ວ່າເຂົາເຈົ້າຈະໄປໃສ ຢູ່ໃສ ກິນຫຍັງກັບໃຜກໍຕາມ. ມັນເປັນເລື່ອງທີ່ເຮັດໃຫ້ຜູ້ປົກຄອງຫຼາຍຄົນໜັກໃຈ ເມື່ອເຫັນພາບນີ້ ແລະ ຄິດຢູ່ໃນໃຈວ່າ ໃນກຸ່ມດັ່ງກ່າວແມ່ນລູກຫຼານຂອງທ່ານ ຫຼື ບໍ? ມື້ໃດມື້ໜຶ່ງຖ້າມີໂອກາດລອງໃຫ້ທ່ານໄປແວ່ເບິ່ງຕາມຮ້ານເບຍທີ່ຢູ່ໃກ້ບ້ານເດີ ແລ້ວຈະຮູ້ວ່າມີລູກຫຼານໃຜແດ່.


        ສະນັ້ນ ຂໍອະນຸຍາດບໍ່ປິດບັງໃບໜ້າ ເພາະຕ້ອງການເອົາພາບດັ່ງກ່າວອອກເຜີຍແຜ່ ແລະ ຮັບຮູ້ໃນຄວາມເປັນຈິງ.

ແຫຼ່ງຂ່າວ: Pathedlao Lao