ຊຸດຂາວ ບອກຈະໄດ້ໂຕ ເລວານ ເສີມຄົມແນ່ນອນ

ຖາມ “ອ້າຍເສືອ” ລະຫວາ? ເຣອັນ ມາດຣິດ ໝັ້ນໃຈຈະໄດ້ ໂຣເບີດ ເລວານດອບສະກີ ດາວຍິງຂອງ ເສືອໃຕ້ ບາເຢິນ ມິວນິກ ມາປະຈຳການຢູ່ເກມບຸກລະດູການໜ້າ ຫຼັງຈາກເຊີນນາຍໜ້າຂອງອະດີດນັກເຕະ ດອດມູນ ເຂົ້າມາເບິ່ງເກມລີກ ແລະ ຍື່ນຂໍ້ສະເໜີໃຫ້ພິຈາລະນາແລ້ວ ພ້ອມກັບອັດເງິນກ້ອນໃຫຍ່ທາບທາມກັບ ບາເຢິນ ຫວັງດຶງໂຕມາແທນບ່ອນ ຄຣິສຕຽນໂນ ໂຣນັນໂດ ທີ່ອາດຈະຍ້າຍທີມຫຼັງຈົບລະດູການນີ້.

ເຣອັນ ມາດຣິດ ສະໂມສອນມະຫາເສດຖີຈາກ ລາ ລີກາ ສະເປນ ໝັ້ນໃຈວ່າ ຈະສາມາດດຶງໂຕ ໂຣເບີດ ເລວານດອບສະກີ ຫົວຫອກຟອມໄຟຂອງ ບາເຢິນ ມິວນິກ ສະໂມສອນດັງຈາກ ບຸນເດສລີກາ ເຢຍລະມັນ ເຂົ້າມາເສີມທັບໃນຊ່ວງພັກລະດູການນີ້ຢ່າງແນ່ນອນ ຈາກການລາຍງານຂອງ ອາສ ສື່ກິລາຂອງເມືອງກະທິງ ເມື່ອວັນທີ 7 ທັນວາ ທີ່ຜ່ານມາ.

ສະຕາກອງໜ້າທີມຊາດ ໂປໂລຍ ລະເບີດຜົນງານຍິງ 20 ປະຕູຈາກ 22 ນັດໃຫ້ກັບ “ເສືອໃຕ້” ໃນລະດູການນີ້ ຂະນະທີ່ຍິງໄປແລ້ວ 45 ປະຕູລວມທຸກລາຍການ ນັບຕັ້ງແຕ່ຍ້າຍມາຈາກ ດອດມູນ ເມື່ອປີ 2014 ໂດຍ “ລາຊາຊຸດຂາວ” ໄດ້ເຊີນ ເຊຊາຣີ ຄູຊາສກີ ນາຍໜ້າຂອງ ເລວານດອບສະກີ ເຂົ້າມານັ່ງເບິ່ງເກມລີກນັດທີ່ຖະລົ່ມ ເຄຕາເຟ 4-1 ນັ່ງຂ້າງກັບ ຟໍເລັນຕິໂນ ເປເຣດ ປະທານສະໂມສອນ ເມື່ອວັນເສົາທີ່ຜ່ານມາ ແລະ ຍື່ນຂໍ້ສະເໜີໃຫ້ ຄູຊາສກີ ພິຈາລະນາເຊັ່ນກັນ.

ທັງນີ້ ບາເຢິນ ໝັ້ນໃຈວ່າຈະສາມາດເກັບຫົວຫອກຄົນສຳຄັນເອົາໄວ້ໃນທີມຕໍ່ໄປ ຂະນະທີ່ມີການຄາດກັນວ່າ ເຣອັນ ມາດຣິດ ກຽມທີ່ຈະທຸ່ມເງິນກ້ອນໃຫຍ່ເພື່ອດຶງໂຕນັກເຕະ 27 ປີຄົນນີ້ເຂົ້າມາເສີມເກມບຸກຊ່ວງພັກລະດູການ ຢ່າງໃດກໍຕາມ ຂໍ້ສະເໜີສຳລັບການດຶງໂຕ ເລວານ ອາດຈະຂຶ້ນຢູ່ກັບອານາຄົດໃນຖິ່ນ ຊານດີເອໂກ ເບີນາເບວ ຂອງ ຄຣິສຕຽນໂນ ໂຣນັນໂດ ປີກໂຕຖະລົ່ມປະຕູທີ່ໄດ້ຮັບການຄາດໝາຍວ່າອາດຈະຕັດສິນໃຈເບິ່ງຫາຕົ້ນສັງກັດໃໝ່ຫຼັງຈາກຈົບລະດູການນີ້.

..................................................................................................................................................