ຊຸດຂາວເລັງທຸ່ມ 100 ລ້ານເອີໂຣລ່າໂຕດິບາລາຫຼັງພົ້ນໂທດແບນ

 

ຢູເວັນຕຸດ ອາດຈະຕ້ອງຄິດໜັກເລື່ອງຈະຂາຍ ເປົາໂລ ດິບາລາ ຫົວຫອກໂຕເກັ່ງກໍເປັນໄດ້ເມື່ອ ເຣອັນ ມາດຣິດ ວາງແຜນລ່ວງໜ້າພ້ອມທຸ່ມເງິນ 100 ລ້ານເອີໂຣດຶງນັກເຕະມາເສີມຄົມທັນທີທີ່ພົ້ນໂທດແບນຫ້າມຊື້ນັກເຕະໃນປີ 2018.

 

ເຣອັນ ມາດຣິດ ຍັກໃຫຍ່ຂອງ ລາ ລີກາ ສະເປນ ວາງແຜນທຸ່ມຂໍ້ສະເໜີມະຫາສານເຖິງ 100 ລ້ານເອີໂຣເພື່ອດຶງໂຕ ເປົາໂລ ດິບາລາ ກອງໜ້າອະນາຄົດໄກ ຢູເວັນຕຸດ ມາເສີມຄົມໃນປີ 2018 ຈາກການລາຍງານຂອງ “ອາສ” ສື່ດັງແດນກະທິງເມື່ອວັນຈັນທີ່ຜ່ານມາ.

 

ສາເຫດທີ່ ລາຊາຊຸດຂາວ ຕ້ອງເດີນໜ້າດຶງນັກເຕະໃນອີກ 2 ປີຂ້າງໜ້ານັ້ນເປັນຍ້ອນຈະພົ້ນໂທດແບນຫ້າມຊື້ນັກເຕະຂອງສະຫະພັນບານເຕະນາໆຊາດ ຫຼື ຟີຟາ ໃນໄລຍະດັ່ງກ່າວພໍດີຫຼັງຈາກຖືກໂທດຫ້າມຫຍຸ້ງກ່ຽວກັບຕະຫຼາດນັກເຕະ 2 ຊ່ວງເນື່ອງຈາກວ່າເຮັດຜິດກົດເລື່ອງການຖ່າຍໂອນນັກເຕະທີ່ມີອາຍຸບໍ່ເກີນ 18 ປີ.

 

ອາສ ຕີຂ່າວວ່າ ຟໍເຣັນຕິໂນ ເປເຣດ ປະທານສະໂມສອນ ເຣອັນ ມາດຣິດ ເບິ່ງວ່າດາວຍິງອາຍຸ 22 ປີຄືແກນຫຼັກສຳລັບທີມຊຸດ ກາລາຕິກອສ ຍຸກຕໍ່ໄປເນື່ອງຈາກວ່າຊຸບເປີສະຕາເບີໜຶ່ງຄື ຄຣິສຕຽນໂນ ໂຣເນົາໂດ ຈະອາຍຸ 32 ປີແລ້ວໃນເດືອນກຸມພາປີໜ້າ ຢ່າງໃດກໍຕາມ ດິບາລາ ມີຂ່າວພົວພັນກັບ ບາເຊໂລນາ ທີ່ເບິ່ງວ່າເຂົາເໝາະທີ່ເປັນຕົວແທນໃນໄລຍະຍາວຂອງ ລີໂອເນວ ເມສຊີ ຫົວຫອກຮ່ວມຊາດດຽວກັນ.