ຊຸດຂາວຢັນໂມດຣິດຂຶ້ນຂຽງຜ່າຕັດແນ່ນອນ

 

ຊີເນດີນ ຊີດານ ນາຍໃຫຍ່ ເຣອັນ ມາດຣິດ ຕ້ອງມີເຊັງໆແນ່ເລັກນ້ອຍເມື່ອ ລູກ້າ ໂມດຣິດ ມິດຟິວໂຕຄຸມເກມຂອງທີມຕ້ອງເຂົ້າຮັບການຜ່າຕັດກະດູກອ່ອນທີ່ຫົວເຂົ່າໝົດສິດລົງຊ່ວຍ ລາຊາຊຸດຂາວ ໃນເກມລີກ ກັບ ເອອິບາ ແລະ ອາດຈະອົດຊ່ວຍທີມຊາດໂຄເອເຊຍຫຼິ້ຍເກມຄັດເລືອກບານໂລກໃນອາທິດໜ້າພ້ອມ.

 

ເຣອັນ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນຢືນຢັນເມື່ອາທິດທີ່ຜ່ານມາວ່າ ລູກ້າ ໂມດຣິດ ກອງກາງຄົນສຳຄັນຂອງທີມເຂົ້າຮັບການຜ່າຕັດຮັກສາອາການເຈັບກະດູກອ່ອນບໍລິເວນຫົວເຂົ່າເປັນທີ່ຮຽບຮ້ອຍແລ້ວ.

 

ຈອມທັບ ເຣອັນ ລົງຫຼິ້ນຄົບ 90 ນາທີໃນເກມ ຢູຟາ ແຊມປຽນລີກ ທີ່ບຸກໄປສະເໝີ ໂບຣຸສເຊຍ ດອດມຸນ 2-2 ເມື່ອວັນພຸດທີ່ຜ່ານມາແຕ່ຈາກບັນຫາບາດເຈັບດັ່ງກ່າວເຮັດໃຫ້ເຂົາໝົດສິດລົງຫຼິ້ນໃນເກມລີກທີ່ພົບກັບ ເອອິບາ ເມື່ອວັນອາທິດເຮັດໃຫ້ ຊີເນດີນ ຊີດານ ນາຍໃຫຍ່ “ລາຊາຊຸດຂາວ” ຕ້ອງຂາດກຳລັງສຳຄັນໃນແຜງກາງໄປອີກຄົນໜຶ່ງເພາະ ຄາເຊມິໂຣ້ ຫ້ອງເຄື່ອງຄົນສຳຄັນກໍຢູ່ໃນຊ່ວງພັກຟື້ນຈາກການອາການຂໍ່ຂາຊ້າຍຫັກຢູ່.

 

ເຖິງວ່າຈະບໍ່ມີການເປີດເຜີຍໄລຍະເວລາທີ່ຕ້ອງພັກຮັກສາໂຕອອກມາແຕ່ເຊື່ອວ່າ ໂມດຣິດ ອາດຕ້ອງອົດຊ່ວຍທີມຊາດໂຄເອເຊຍໃນລາຍການບານໂລກ 2018 ຮອບຄັດເລືອກໂຊນເອີຣົບ ກຸ່ມ ໄອ ທີ່ຕ້ອງບຸກໄປດວນກັບ ໂຄໂຊໂວ ວັນພະຫັດທີ 6 ຕຸລາ ແລະ ເຢືອນ ຟິນແລນ ວັນອາທິດທີ 9 ຕຸລານີ້ຂ້ອນຂ້າງຈະແນ່ນອນ.

 

ຖະແຫຼງການຂອງ ເຣອັນ ມາດຣິດ ລະບຸວ່າ “ນັກເຕະຂອງເຮົາ ລູກ້າ ໂມດຣິດ ປະສົບຄວາມສຳເລັດໃນການເຂົ້າຮັບການຜ່າຕັດຫົວເຂົ່າຊ້າຍສຳລັບການກຳຈັດກະດູກອ່ອນບາງສ່ວນທີ່ເປັນສາເຫດຂອງການບາດເຈັບອອກໄປ ໂດຍທີ່ ໂມດຣິດ ຈະກັບມາເລີ່ມຟື້ນຟູສະພາບຮ່າງກາຍໃນມື້ອື່ນ”.