ຊຸດຂາວຈໍ່ດຶງເຊສຮ່ວມທັບ

 

“ລາຊາຊຸດຂາວ” ເຣອັນ ມາດຣິດ ລັອກເປົ້າດຶງຕົວ ເຊສ ຟາເບຣກັສ ຫ້ອງເຄື່ອງຂອງ ເຊວຊີ ມາຮ່ວມທັບເພາະວ່າ ຊີດານ ກຳຕ້ອງການມິດຟິວຕົວສ້າງສັນເກມ.

 

ເຣອັນ ມາດຣິດ ສະໂມສອນຍັກໃຫຍ່ຂອງ ລາ ລີກາ ສະເປນກຳລັງພິຈາລະນາທີ່ຈະລ່າໂຕ ເຊສ ຟາເບຣກັສ ກອງກາງເລືອດກະທິງຂອງ ເຊວຊີ ສະໂມສອນຈ່າຝູງຂອງ ພຣີເມຍລີກ ມາເສີມທັບໃນຊ່ວງຊຳເມີນີ້ ຕາມການລາຍງານຈາກ ດິອາຣິໂອ ໂກ ສື່ກະທິງເມື່ອວັນອັງຄານທີ່ຜ່ານມາ.

 

ລະດູການນີ້ ຟາເບຣກັສ ບໍ່ສາມາດຍາດຕຳແໜ່ງຕົວຈິງໃນທັບ “ສິງບລູ” ພາຍໃຕ້ການນຳທີມຂອງກຸນຊື ອັນໂຕນີໂອ ຄອນເຕ ໄດ້ໂດຍຫາກໍລົງຫຼິ້ນເປັນ 11 ຄົນທຳອິດໃນເກມລີກພຽງແຕ່ 5 ເກມເທົ່ານັ້ນເຊິ່ງຫຼ້າສຸດ ດິອາຣິໂອ ໂກ ລະບຸວ່າ ຊີເນດີນ ຊີດານ ນາຍໃຫຍ່ຂອງ ເຣອັນ ມາດຣິດ ຢາກໄດ້ເຂົາມາຮ່ວມທັບເພາະກຳລັງຕ້ອງການມິດຟິວຕົວປັ້ນເກມທີ່ມີດີເອັນເອຂອງ ບາເຊໂລນາ.

 

ທັງນີ້ ຟາເບຣກັສ ຍ້າຍຈາກ ບາຊາ ມາຮ່ວມທັບ ເຊວຊີ ເມື່ອຊ່ວງຊຳເມີປີ 2014 ໂດຍລົງຫຼິ້ນໃຫ້ທີມໄປແລ້ວທັງໝົດ 114 ນັດຍິງໄດ້ 15 ປະຕູ.