ຊີຣູ ບອກ ປືນໃຫຍ່ ໃຫ້ຮັກສາຟອມເທບຕໍ່ໄປ

ໂອລີວີເຢ ຊີຣູ ຫົວຫອກເລືອດນ້ຳຫອມຂອງ ອາເຊນອນ ລະບຸຕ້ອງຮັກສາຟອມການຫຼິ້ນແບບນີ້ຕໍ່ໄປຫຼັງຈາກທີ່ບຸກໄປຊະນະ ແອສຕັນ ວິນລາ ເມື່ອວັນອາທິດທີ່ຜ່ານມາ ພ້ອມກັບພໍໃຈກັບຜົນງານຂອງຕົນເອງທີ່ຍິງໄດ້ຢ່າງຕໍ່ເນື່ອງ.

ໂອລີວີເຢ ຊີຣູ ກອງໜ້າໂຕໃຫຍ່ຂອງ ອາເຊນອນ ສະໂມສອນຈາກ ພຣີເມຍລີກ ອັງກິດ ເຜີຍຕ້ອງການທີ່ຈະຮັກສາຟອມການຫຼິ້ນທີ່ຮ້ອນແຮງແບບນີ້ຕໍ່ໄປ ຫຼັງຈາກທີ່ເກມລ່າສຸດຍິງ 1 ປະຕູຊ່ວຍໃຫ້ທີມບຸກຊະນະ ແອສຕັນ ວິນລາ ທີ່ສະໜາມ ວິນລາ ພາກ ເມື່ອວັນອາທິດທີ່ຜ່ານມາ.

ຫົວຫອກເລືອດຝຣັ່ງສັງຫານລູກໂທດໃຫ້ “ປືນໃຫຍ່” ຂຶ້ນນຳໄປຕັ້ງແຕ່ເຄິ່ງເວລາທຳອິດ ກ່ອນທີ່ ອາຣອນ ແຣມຊີ ຈະຍິງປະຕູອັດຝາໃຫ້ທີມເກັບ 3 ຄະແນນສຳຄັນ ແລະ ສົ່ງໃຫ້ທີມຂຶ້ນໄປນຳເປັນຈ່າຝູງຊົ່ວຄາວ.

ຊີຣູ ເຊິ່ງຍິງໄປແລ້ວ 50 ປະຕູໃນເກມລີກຂອງເມືອງຜູ້ດີ ສະແດງຄວາມເຫັນວ່າ “ຂ້ອຍພໍໃຈທີ່ຍິງປະຕູໄດ້ຫຼາຍແບບນີ້ ຂ້ອຍບໍ່ຢາກຢຸດສະຖິຕິເອົາໄວ້ບ່ອນນີ້ ຂ້ອຍຢາກຈະເຮັດຜົນງານໄດ້ແບບນີ້ຕໍ່ໄປເລື້ອຍໆ ຂ້ອຍພະຍາຍາມທີ່ຈະເຮັດຜົນງານໄດ້ດີທີ່ສຸດເພື່ອເພື່ອນຮ່ວມທີມ ທີໂອ ເຮັດໄດ້ດີໃນຈັງຫວະທີ່ໄດ້ລູກໂທດ ແລະ ຂ້ອຍເລືອກທີ່ຈະຮັບອາສາສັງຫານ ເຊິ່ງຂ້ອຍກໍເຮັດໄດ້”.

“ເຮົາຈຳເປັນຕ້ອງຫຼິ້ນໃຫ້ອັນຕະລາຍຫຼາຍກວ່ານີ້ເພາະບາງເທື່ອເຮົາມັກຈະຄອງບານດົນເກີນໄປ ເຮົາຕ້ອງການຈົບອາທິດດ້ວຍການຊະນະ ແລະ ຂື້ນເປັນຈ່າຝູງ ມັນເປັນເລື່ອງທີ່ດີ ເຮົາມີຊ່ວງເວລາທີ່ດີ ແລະ ຫວັງວ່າເຮົາຈະເຮັດຜົນງານໄດ້ດີໃນເກມພົບກັບ “ເຮືອໃບ” ແມນ ຊີຕີ ວັນຈັນໜ້າ” ກອງໜ້າເລືອດນ້ຳຫອມ ກ່າວ.

.........................................................................................................................................................