ຊາໂກບອກເຈິກັບ ເບັນ ອາຟາ ໜັກໃຈກວ່າ ໂດ-ເມສຊີ

 

ມາມາດູ ຊາໂກ ກອງຫຼັງທີມຊາດຝຣັ່ງເຜີຍຄູ່ແຂ່ງທີ່ສ້າງຄວາມລຳບາກໃຫ້ຕົນເອງຫຼາຍທີ່ສຸດບໍ່ແມ່ນ ໂຣນັນໂດ ຫຼື ເມສຊີ ແຕ່ເປັນ ຮາເຕັມ ເບັນ ອາຟາ ສະໄໝຫຼິ້ນໃຫ້ ໂອລິມປິກ ລີຢົງ ພ້ອມຫວັງຂຸນພົນ “ກາໄກ່” ຈະໄດ້ແຊມ ຢູ່ໂຣ 2016 ໃນບ້ານໄດ້ສໍາເລັດ.

 

ມາມາດູ ຊາໂກ ກອງຫຼັງ ລີເວີພູ ອອກມາສະແດງຄວາມເຫັນວ່າ ຮາເຕັມ ເບັນ ອາຟາ ປີກໂຕເກັ່ງຂອງ ນີດ ສະໂມສອນດັງໃນ ລີກແອັງ ເປັນນັກເຕະທີ່ສ້າງຄວາມລຳບາກໃຫ້ຕົນຫຼາຍກວ່າ ໂຣນັນໂດ ຫຼື ເມສຊີ.

 

ເບັນ ອາຟາ ມັກຈະມີຊື່ສຽງທີ່ບໍ່ດີເທົ່າໃດກ່ຽວກັບພຶດຕິກຳສ່ວນໂຕ ຈົນເຮັດໃຫ້ຫຼາຍຄົນເຄີຍນຶກວ່າເຂົາຈະໝົດອະນາຄົດແລ້ວ ແຕ່ອະດີດດາວເຕະ ໂອລິມປິກ ລີຢົງ, ໂອລິມປິກ ມາກແຊ ແລະ ນິວຄາສເຊິນ ຢູໄນເຕັດ ກັບມາເຮັດຜົນງານໄດ້ດີໃຫ້ກັບ ນີດ ໃນລະດູການນີ້ ຈົນໄດ້ຮັບເລືອກເປັນນັກເຕະດີເດັ່ນຂອງ ລີແອັງ ປະຈຳເດືອນມັງກອນທີ່ຜ່ານມາ.

 

ກອງຫຼັງທີມຊາດຝຣັ່ງກ່າວເຖິງນັກເຕະເພື່ອນຮ່ວມຊາດວ່າ “ຂ້ອຍເຄີຍຫຼິ້ນກັບ ເມສຊີ ແລະ ໂຣນັນໂດ ມາແລ້ວ ບາງເທື່ອພວກເຂົາອາດຈະບໍ່ໄດ້ຢູ່ໃນຟອມທີ່ດີທີ່ສຸດຈອນເຈິກັບຂ້ອຍ ແຕ່ຄູ່ຕໍ່ສູ້ທີ່້ສ້າງຄວາມປະທັບໃຈໃຫ້ຂ້ອຍຫຼາຍກວ່າແມ່ນ ຮາເຕັມ ເບັນ ອາຟາ ຕອນຢູ່ກັບ ລີຢົງ ສິ່ງທີ່ເຂົາເຮັດໃນສະໜາມມັນວິເສດຫຼາຍໆ”.

 

ພ້ອມກັນນີ້ ຊາໂກ ຍັງຫວັງວ່າທີມຊາດຝຣັ່ງຈະປະສົບຄວາມສຳເລັດໃນການເຮັດເສິກບານເຕະຊິງແຊມແຫ່ງຊາດເອີຣົບ “ຢູໂຣ 2016” ລະຫວ່າງວັນທີ 10 ມິຖຸນາຫາ 10 ກໍລະກົດນີ້.

 

“ບານ  ຢູໂຣ ຈະເປັນການແຂ່ງຂັນທີ່ໜ້າຕື່ນເຕັ້ນ ເຮົາບໍ່ແມ່ນພຽງແຕ່ລົງໄປຫຼິ້ນເທົ່ານັ້ນ ແຕ່ເຮົາຍັງຕ້ອງການໃຫ້ຖ້ວຍແຊມຢູ່ທີ່ຝຣັ່ງອີກດ້ວຍ ຈຸດແຂງຂອງເຮົາຄືການຫຼິ້ນເປັນທີມ ເຮົາມີນັກເຕະທີ່ພ້ອມທີ່ທຸ່ມເທທຸກຢ່າງໃຫ້ທີມ” ກອງຫຼັງ ຫົງແດງ ກ່າວ.