ຊາວໂລກຕ້ອງການໃຫ້ນ້ຳມັນແພງຊ່ວຍຟື້ນຟູເສດຖະກິດ

       ລາຄາ​ນ້ຳມັນ​ໂລກ​ຖືກ​ທີ່​ສຸດ​ໃນ​ລະດັບ 40 ​ໂດ​ລາ​ສະຫະລັດ​ຕໍ່​ບາ​ເຣລຊຶ່ງ​ຢູ່​ລະດັບ​ນີ້​ມາ​ດົນ​ພໍ​ສົມຄວນໜ້າ​ຈະ​ດີ​ຕໍ່​ເສດຖະກິດ​ໂລກເພາະ​ນັ້ນ​ໝາຍ​ເຖິງ​ຜູ້​ບໍລິ​ໂພ​ກຈະ​ມີ​ເງິນ​ເຫຼືອ​ເພື່ອ​ໄປ​ຈັບ​ຈ່າຍ​ໃຊ້​​ອື່ນໆ​ຫຼາຍ​ຂຶ້ນ ​ແຕ່​ຖ້າ​ຫາກ​ເບິ່ງ​ອີກ​ມູມໜຶ່ງ ລາຄາ​ນ້ຳມັນ​ຕໍ່າ​​ເປັນ​ເວລາ​ດົນ​ຄື​ແນວ​ນີ້​ກັບ​ສົ່ງ​ຜົນ​ເສຍ​ຕໍ່​ເສດຖະກິດ.

        ໂກລດ​ແມນແຊກ​ສ​ອອກ​ລາຍ​ງານ​ວ່າລາຄາ​ນ້ຳມັນ​ທີ່​ສູງ​ອາດ​ສົ່ງ​ຜົນ​ດີ​ຕໍ່​ເສດຖະກິດ​ໂລກ​ທີ່​ອ່ອນ​ແອ​ຢູ່​ໃນ​ປະຈຸ​ບັນ​ນີ້ເພາະ​ລາຄາ​ນ້ຳມັນ​ທີ່​ສູງ​ຈະ​ເຮັດ​ໃຫ້​ເງິນ​ທຶນ​ໄຫຼ​ເຂົ້າ​ສູ່​ປະ​ເທດ​ຜູ້​ຜະລິດ​ນ້ຳມັນ​ລາຍ​ໃຫຍ່​ເຊັ່ນ: ຊາ​ອຸ​ດິດອາຣັບບີ​ເມື່ອ​ປະ​ເທດ​ຜູ້​ຄ້າ​ນ້ຳມັນ​ມີ​ຂຶ້ນ​ຫຼາຍ​ກໍຈະ​ສົ່ງ​ເງິນ​ສ່ວນ​ເກີນ​ກັບ​ໄປ​ສູ່​ລະບົບ​ການ​ເງິນ​ໂລກ(ຊຶ່ງ​ກໍຄື​ທະນາຄານ​ຕ່າງໆ),ຈາກ​ນັ້ນ​ທະນາຄານ​ຈະ​ນຳ​ເງິນ​ໄປ​ປ່ອຍ​ກູ້​ເມື່ອ​ຕະຫຼາດ​ມີ​ສະພາບ​ຄ່ອງ​ຫຼາຍ​ຂຶ້ນ​ດອກ​ເບ້ຍ​ຈະ​ຕໍ່າລົງ ມູນ​ຄ່າ​ຊັບ​ສິນຈະ​ສູງ​ຂຶ້ນຜູ້​ບໍລິ​ໂພ​ກກໍຈະ​ມີ​ຄວາມ​ເຊື່ອ​ໝັ້ນ​ຫຼາຍ​ຂຶ້ນ, ​ໃນ​ປີ 2001-2014 ທີ່​ເປັນ​ໄລຍະ​ລາຄາ​ນ້ຳມັນ​ສູງ​ຫຼາຍ ມີ​ເງິນ​ສ່ວນ​ເກີນ​ນອກ​ອາ​ເມ​ລິ​ກາ​ລວມກັນ 1-7 ພັນ​ຕື້​ໂດ​ລາຊຶ່ງ​ຊຸກຍູ້​ໃຫ້​ລາຄາ​ຊັບ​ສິນ​ສູງ​ຂຶ້ນ.ຂໍ້​ສະຫຼຸບ​ຂອງ​ໂກລດ​ແມນແຊກຄ້າຍຄື​ກັບ​ນັກ​ເສດຖະສາດ​ໄອ​ເອັມ​ເອຟທີ່​ເຄີຍ​ສະ​ແດງ​ຄວາມ​ຄິດ​ເຫັນ​ໃນ​ຕົ້ນ​ປີ​ນີ້​ວ່າລາຄາ​ນ້ຳມັນ​ຕໍ່າ​ຈະ​ຊ່ວຍ​ເພີ່ມ​ການ​ເຕີບ​ໂຕ​ຂອງ​ຈີ​ດີ​ພີ​ເພາະ​ເຮັດ​ໃຫ້​ຜູ້​ບໍລິ​ໂພ​ກມີ​ເງິນ​ຫຼາຍ​ຂຶ້ນນັ້ນອາດ​ບໍ່​ເປັນ​ຢ່າງ​ທີ່​ຄິດ​ໄວ້,ຊຶ່ງ 2 ປີ​ທີ່​ຜ່ານ​ມາຕະຫຼາດ​ຮຸ້ນ​ມັກ​ເຄື່ອນ​ໄຫວ​​ໄປ​ໃນ​ທິດ​ທາງ​ດຽວກັບ​ລາຄາ​ນ້ຳມັນ.

        ສາຍ​ເຫດ​ລາຄາ​ນ້ຳມັນ ​ແລະ ຕະຫຼາດ​ຮຸ້ນ​ເຄື່ອນ​ໄຫວ​ໃນ​ທິດ​ທາງ​ດຽວ​ກັນ​ເປັນ​ເພາະ​ນະ​ໂຍບາຍ​ການ​ເງິນ​ຂອງ​ທະນາຄານ​ກາງ​ທົ່ວ​ໂລກໃນ​ອະດີດ​ທະນາຄານ​ຕ່າງໆ​ຈະ​ຕອບ​ສະໜອງ​ຕໍ່​ລາຄາ​ນ້ຳມັນ​ທີ່​ຕົກ​ຕໍ່າ​ດ້ວຍ​ການ​ຫຼຸດ​ດອກ​ເບ້ຍ​ເພື່ອ​ກະ​ຕຸ້ນ​ເສດຖະກິດ​ແຕ່​ປະຈຸ​ບັນອັດຕາ​ດອກ​ເບ້ຍ​ທີ່​ຕໍ່າ​ໃກ້​ສູນທະນາຄານ​ບໍ່​ເຫຼືອ​ເຄື່ອງມື​ທີ່​ມີ​ພະລັງ​ໃນ​ການ​ກະ​ຕຸ້ນ​ເສ​ດຖະກິດ​ອີກ​ຕໍ່​ໄປຂະນະ​ທີ່​ລາຄາ​ນ້ຳມັນ​ຕົກ​ຕໍ່າ​ກໍ່​ໃຫ້​ເກີດ​ເງິນ​ຝືດ​ຜົນ​ຄື​ລາຄາ​ຊັບ​ສິນ​ຫຼຸດ​ລົງ ​ແລະ ​ເມື່ອ​ບໍ່​ມີ​ການ​ປັບ​ຫຼຸດ​ດອກ​ເບ້ຍ​ເພາະ​ບໍ່​ເຫຼືອ​ໃຫ້​ປັບ​ແລ້ວ​ກໍ​ເທົ່າ​ກັບ​ວ່າ​ອັດຕາ​ດອກ​ເບ້ຍ​ແທ້​ທີ່ຈິງ​ສູງ ສົ່ງ​ຜົນ​ເສຍ​ຕໍ່​ເສດຖະ ກິດ.ດ້ວຍ​ເຫດ​ນີ້​ໄອ​ເອັມ​ເອຟຈຶ່ງ​ມີ​ຄວາມ​ເຫັນ​ຄື​ກັນ​ວ່າ ລາຄາ​ນ້ຳມັນ​ທີ່​ສູງ​ຈະ​ຊ່ວຍ​ຊຸກຍູ້​ໃຫ້​ຊັບ​ສິນ​ສູງ​ຂຶ້ນ ​ແລະ ຖ້າ​ທະນາຄານ​ກາງ​ທົ່ວ​ໂລກ​ພະຍາຍາມ​ບໍ່​ຂຶ້ນ​ດອກ​ເບ້ຍ ອາດ​ສົ່ງ​ຜົນ​ບວກ​ຕໍ່​ການ​ເຕີບ​ໂຕ​ຂອງ​ເສດຖະກິດ(ຕາມ​ຂ່າວ​ຕ່າງປະ​ເທດ).

ແຫຼ່ງຂ່າວ: ໜັງສືພິມເສດຖະກິດ-ສັງຄົມ.