ຊາວປະມົງຈີນ ທີ່ເຂົ້າໄປຫາປາ ໃນ​ເຂດ​ນ້ຳທະ​ເລ ຟີລິບປິນ ເປັນການຂົ່ມຂູ່ ຕໍ່ຄວາມໝັ້ນຄົງ

ຕຳຫຼວດ ຍາມ​ຝັ່ງ​ທະ​ເລ ຟີ​ລິບ​ປິນ ລາດຕະ​ເວນຢູ່​ຕາມ ຝັ່ງອ້ອມ ໝູ່​ເກາະ​ແຂວງ​ປາ​ລາ​ວັນ.ພວກ​ເຂົາ ສິ້ງຊອມ​ເບິ່ງ ພວກລັກລອບ​ຫາ​ປາ​ຕ່າງ​ຊາດ ​ເຊັ່ນ​ພວກທີ່​ດຳ​ເນີນ​ການ​ ດ້ວຍເຮືອ ຫາ​ປາອັນ​ນີ້ ທີ່​ຈອດ​ຢູ່​ທ່າ​ເຮືອ​ ຂອງ​ສະຖານີ​ຕຳຫຼວດ ດຽວ​ນີ້. ຮ້ອຍ​ເອກ Philip Suarez ອະທິບາຍໃຫ້​ຟັງ ​ວິທີຈັບ​ກຸມ​ເຮືອ​ລຳ​ດັ່ງກ່າວ.

ຮ້ອຍ​ເອກ Philip Suarez ​ເຈົ້າໜ້າ​ທີ່​ຕຳຫລວດ​ຢາມ​ຝັ່ງທະ​ເລ ຟີ​ລິບ​ປິນ ​ເວົ້າວ່າ ພວກ​ເຮົາ​ໄດ້​ເຫັນ​ເຮືອຫາ​ປາ​ລຳ​ນີ້ ​ເຊິ່ງ​ມັນ​ແຕກ​ຕ່າງ​ກັບ​ເຮືອ​ຂອງ​ທ້ອງ​ຖິ່ນ​. ພວກ​ເຮົາຈຶ່ງເຂົ້າ​ໄປ​ເບິ່ງໃກ້ໆ ​ແລະ ສາມາດ​ບອກ​ໄດ້ວ່າ​ ເປັນ​ເຮືອຫາ​ປາຊາວ​ຫວຽດນາມທີ່​ເຂົ້າມາ​ໃນ​ນ່ານ​ນ້ຳຂອງ​ຟີ​ລິບ​ປິນ ​ເພື່ອຫາ​ປາ​ ແບບຜິດ​ກົດໝາຍ.


 

ຮ້ອຍ​ເອກ Suarez ກ່າວ​ວ່າ ຂອບ​ໃຈ ທີ່​ມີ​ກອງ​ກຳລັງ​ຕຳຫຼວດເຮືອ​ໄວ ໝູ່​ນ້ອຍ​ນີ້ ​ຊຶ່ງພວກລັກລອບ​ຫາ​ປາ ​ເຫຼົ່ານີ້ ບໍ່​ສາມາດ​ຫລົບຫຼີກສາຍຕາ​ໄດ້ ຢ່າງ​ງ່າຍດາຍ.ຮ້ອຍ​ເອກ Suarez ​ເວົ້າອີກວ່າ ບາງ​ຄັ້ງບາງ​ຄາວ ​ໃນ​ເມື່ອ​ພວກ​ເຮົາ​ພົບ​ເຫັນ​ພວກ​ເຂົາ​ເຈົ້າ ຢູ່​ຫ່າງໄກ ພວກ​ເຂົາ​ ກໍພະຍາຍາມ ຈະ​ຫລົບໜີ​ພວກ​ເຮົາ. ​ແຕ່​ເຮືອ​ໄວ​ຂອງ​ພວກ​ເຮົາ ​ແມ່ນ​ໄວ​ກວ່າ​ ເຮືອຂອງ​ພວກ​ເຂົາ​ເຈົ້າ ສະນັ້ນ ພວກເຂົາ​ ຈຶ່ງບໍ່​ສາມາດ ໜີ​ໄປ​ໄດ້.

ສະຫະລັດ ​ໄດ້​ມອບ​ເຮືອ​ໄວ​ດັ່ງກ່າວ ຈຳ​ນວນ 6 ລຳ ​ໃຫ້​ແກ່​ຕຳຫລວດ​ຍາມ​ຝັ່ງ​ທະ​ເລ ຟີ​ລິບ​ປິນ ​ເພື່ອ​ຊ່ວຍ​ພວກ​ເຂົາ​ເຈົ້າ ​ໄລ່​ຈັບ​ຊາວ​ປະ​ມົງ ທີ່​ຫາ​ປາ​ແບບ​ຜິດ​ກົດໝາຍ​.​ເມື່ອ​ປີ​ກາຍ​ນີ້ ຮ້ອຍ​ເອກ Suarez ​ແລະ ທິມງານ​ຂອງ​ລາວ ຈັບ​ຊາວ​ຈີນໄດ້ 11 ຄົນ​ ທີ່ຫາ​ຈັບເຕົ່າ ຊະນິດທີ່ກຳລັງ​ຈະ​ສູນພັນ.ຮ້ອຍ​ເອກ Suarez ກ່າວ​ວ່າ ພວກ​ລັກລອບ​ຫາ​ປາ ຊາວ​ຈີນ​ບາງ​ຄົນ ​ເຂົ້າມາ ​ໃກ້​ຝັ່ງຂອງ​ແຂວງປາ​ລາ​ວັນ ​ທີ່​ສຸດ ​ເຖິງ 15 ກິ​ໂລ​ແມັດ.

ຫົວໜ້າ​ຕຳຫຼວດຍາມ​ຝັ່ງ​ທະ​ເລ ທ່ານ John Labunog Aller ກ່າວ​ວ່າ ພວກ​ຊາວ​ປະ​ມົງ​ເຫຼົ່ານີ້ ​ເຄື່ອນ​ໄຫວ ​ໃນ​ບາດ​ກ້າວ ຂອງ​ກອງ​ທັບ​ຈີນ ຊຶ່ງ ​ໄດ້​ກໍ່ສ້າງຄ້າຍ​ທະຫານ ​ໃສ່​ເກາະ​ທີ່​ຖົມ​ຂຶ້ນມາ ​ໃນ​ທະ​ເລ​ຈີນ​ໃຕ້. ທ່ານ​ກ່າວ​ຕໍ່​ໄປ​ວ່າ ມັນ​ເປັນ​ການ​ຂົ່ມ​ຂູ່ ຕໍ່​ຄວາມ​ໝັ້ນຄົງ​ຂອງ​ຟີ​ລິບ​ປິນ.

ທີ່ມາ http://lao.voanews.com/