ຊາວບ້ານຈອມຮາດ ພົບວັດຖຸບູຮານເກົ່າແກ່

ເມື່ອບໍ່ດົນຜ່ານມານີ້ປະຊາຊົນ ບ້ານຈອມຮາດ ເມືອງອາດສະພອນ ແຂວງສະຫວັນນະເຂດໄດ້ພົບເຫັນວັດຖຸບູຮານທີ່ ເກົ່າແກ່ຄາດວ່າຈະມີອາຍຸຫຼາຍຮ້ອຍໆປີ ຂະນະທີ່ຜູ້ພົບເຫັນນຳມາໄວ້ເຮືອນພັດເກີດອາການຝັນຮ້າຍທຸກຄືນ.


ຕາມການລາຍງານຫ້ອງການຖະແຫຼງຂ່າວ, ວັດທະນະທຳ ແລະທ່ອງທ່ຽວເມືອງອາດສະພອນແຈ້ງໃຫ້ຮູ້ວ່າ: ໃນ ເມື່ອວັນທີ 20 ມິຖຸນາ ມີປະຊົນຄົນໜຶ່ງຊື່ວ່າລຸງໃບອາຍຸ 40 ປີປະຈຸບັນຢູ່ບ້ານຈອມຮາດ ຊຶ່ງພວມກຳລັງໄຖນາຂອງຕົນ ເອງແລ້ວໄຖໄປໄດ້ໄລຍະໜຶ່ງໄຖເລີຍໄດ້ໄປຕໍາປາກໄຫຢູ່ຂ້າງຄັນນາຈົນປາກໄຫແຕກແລ້ວປາກົດເຫັນວ່າຢູ່ປາກໄຫມີ ໝາກກະດິງ 1 ໜ່ວຍຄາດວ່າເປັນກະດິງຊ້າງ ພ້ອມກັບຍັນຫຼອດຈຳນວນໜຶ່ງດັ່ງນັ້ນຜູ້ກ່ຽວຈຶ່ງເອົາກະດິງດັ່ງກ່າວເມືອ ໄວເຮືອນຕົນເອງແຕ່ວ່າຕົນເກີດຝັນຮ້າຍທຸກມື້ຈຶ່ງແຈ້ງຕໍ່ອຳນາດການປົກຄອງບ້ານ ແລະເອົາກະດິງດັ່ງກ່າວໄປໄວ້ຄືນ ບ່ອນເກົ່າ.


ຕໍ່ມາໃນວັນທີ 12 ກໍລະກົດ 2017 ທ່ານ ບຸນທະວີ ດວງມາລາ ຫົວໜ້າຫ້ອງການ ຖວທ ເມືອງອາດສະພອນ ພ້ອມກັບຄະນະຈຶ່ງໄດ້ລົງໄປສົມທົບກັບອຳນາດການປົກຄອງບ້ານ ແລະເຮັດພິທີກວດສອບພີສູດວັດຖຸບູຮານດັ່ງກ່າວເຫັນວ່າພາຍໃນປາກໝໍ້ມີກະດິງຊ້າງ 1 ໜ່ວຍ, ຂໍຊ້າງ 1 ອັນ, ຍັນຫຼອດ 174  ອັນ ແຕ່ພາຍໃນໄຫດັ່ງກ່າວຍັງບໍ່ທັນໄດ້ຄົ້ນຂຶ້ນໝົດເນື່ອງຈາກອໍານາດການປົກຄອງ ແລະພໍ່ແມ່ປະຊາຊົນຍັງບໍ່ເຫັນດີໃຫ້ຄົ້ນຂຶ້ນມາເຖິງຢ່າງໃດກໍ່ຕາມວັດຖຸບູຮານທີ່ຄົ້ນພົບນີ້ຍັງບໍ່ມີໃຜຮູ້ທີ່ມາເທື່ອ ແລະມີ ອາຍຸດົນນານປານໃດດັ່ງນັ້ນທາງອໍານາດການປົກຄອງບ້ານຈຶ່ງໄດ້ປົກປັກຮັກສາໄວ້ບ່ອນເກົ່າເພື່ອຮັກສາສິ່ງທີ່ສັກສິດຂອງປະເພນີບ້ານ.

Cr: http://www.sedthakid.la