ຊາຣາໂປວ້າຍິ້ມ!!!ຫຼຸດໂທດແບນເຫຼືອ 15 ເດືອນສະປອນເຊີ້ກັບມາສະໜັບສະໜູນ

 

ມາເຣຍ ຊາຣາໂປວ້າ ຍິ້ມແກ້ມບານເມື່ອບັນດາສະປອນເຊີ້ພາກັນກັບມາ ຫຼັງຈາກທີ່ໄດ້ຫຼຸດໂທດແບນລົງມາເຫຼືອພຽງ 15 ເດືອນ.

 

ສຳນັກຂ່າວຕ່າງປະເທດລາຍງານຂ່າວວ່າ ມາເຣຍ ຊາຣາໂປວ້າ ນັກເທັນນິດສາວງາມໄດ້ຮັບຂ່າວດີຕໍ່ເນື່ອງຫຼັງຈາກໄດ້ຫຼຸດໂທດແບນເມື່ອບັນດາບໍລິສັດຜູ້ສະໜັບສະໜູນຊື່ດັງຕາງກໍພາກັນກັບມາຍິນດີທີ່ຈະໃຫ້ເງິນເປັນສະປອນເຊີ້ ມາເຣຍ ອີກເທື່ອໜຶ່ງ.

 

ກ່ອນໜ້ານີ້ ມາເຣຍ ຖືກສະຫະພັນເທັນນິດນາໆຊາດ ຫຼື ໄອທີເອຟ ແບນຍາວເຖິງ 2 ປີຈາກກໍລະນີທີ່ກວດພົບສານຕ້ອງຫ້າມເມວໂດນຽມໃນລາຍການ ອອສເຕລຽນ ໂອເພັ້ນ 2016 ແຕ່ເຂົາໄດ້ອຸທອນໄປຫາສານອະນຸຍາໂຕຕຸລາການກິລາໂລກ ເຊິ່ງຕັດສິນຫຼຸດໂທດແບນເຫຼືອ 15 ເດືອນເຮັດໃຫ້ເຂົາຈະກັບມາແຂ່ງຂັນໄດ້ອີກໃນວັນທີ 26 ເມສາຂອງປີໜ້າ.

 

ແທັກ ຮອຍເອີ້ ບໍລິສັດຜູ້ຜະລິດໂມງສະວິດເຊີແລນໄດ້ຍົກເລີກການສະໜັບສະໜູນຊົ່ວຄາວເຊັ່ນດຽວກັບບໍລິສັດເຢຍລະມັນ “ພອດຊ໌” ຫຼັງຈາກທີ່ເຂົາຍອມຮັບວ່າໃຊ້ສານຕ້ອງຫ້າມດັ່ງກ່າວແທ້ ເຖິງວ່າຈະເປັນການຮູ້ເທົ່າບໍ່ເຖິງການ.

 

ຢ່າງໃດກໍຕາມຫຼັງຈາກທີ່ໄດ້ຫຼຸດໂທດ ຖະແຫຼງການຂອງ “ພອດຊ໌” ລະບຸວ່າ “ບໍ່ມີສັນຍາໃດຖືກຍົກເລີກ ເຮົາຈະລົມກັນເລື່ອງນີ້ໃນອະນາຄົດ” ລວມເຖິງ ໄນກີ້ ບໍລິສັດເຄື່ອງກິລາລະດັບໂລກຖະແຫຼງການວ່າ “ເຮົາຍິນດີທີ່ ມາເຣຍ ຈະກັບມາລົງຫຼິ້ນໄດ້ອີກໃນເດືອນເມສາ ແລະ ລໍຖ້າທີ່ຈະເຮັດວຽກຮ່ວມກັນອີກເທື່ອໜຶ່ງ”.

 

ຊາຣາໂປວ້າ ອະດີດແຊມແກຣນສະແລມ 5 ສະໄໝເປັນນັກກິລາຍິງທີ່ມີລາຍຮັບຫຼາຍທີ່ສຸດເມື່ອປີຜ່ານມາ 29.7 ລ້ານໂດລາສະຫະລັດໂດຍທີ່ ຟອບສ໌ ປະເມີນວ່າລາຍຮັບສ່ວນໃຫຍ່ຂອງເຂົາກໍໄດ້ມາຈາກເງິນຂອງຜູ້ສະໜັບສະໜູນຕ່າງໆນັ້ນເອງ.