ຊານເຊດເທບ!!ຄວ້າລາງວັນໂກເດັນບອຍ 2016

 

ເຣນາໂຕ ຊານເຊດ ມິດຟິວດາວລຸ້ງຂອງ ບາເຢິນ ມິວນິກ ຜະຫງາດມາຂຶ້ນຮັບລາງວັນ “ໂກເດັນ ບອຍ” ປີ 2016 ທີ່ມອບໃຫ້ກັບນັກເຕະທີ່ມີອາຍຸຕຳ່ກວ່າ 21 ປີຫຼັງຈາກທີ່ປ່ອຍຟອມເທບໃນລະດູການທີ່ຜ່ານມາໂດຍເອົາຊະນະ 2 ແຄ່ງຄື ມາຄັສ ແຣັສຝອດ ຫົວຫອກຂອງ ແມນເຊສເຕີ ຢູໄນເຕັດ ແລະ ຄິງສະລີ ໂກມອງ ປີກຂອງ ບາເຢິນ ໄດ້ສຳເລັດ.

 

ເຣນາໂຕ ຊານເຊດ ກອງກາງອະນາຄົດໄກຂອງ ບາເຢິນ ມິວນິກ ສະໂມສອນຍັກໃຫຍ່ຂອງ ບຸນເດສລີກາ ໄດ້ລາງວັນ “ຢູໂຣປຽນ ໂກເດັນ ບອຍ” ປະຈໍາປີ 2016 ຫຼັງຈາກທີ່ເຮັດຜົນງານໄດ້ດີເດັ່ນກັບທີມຊາດປັອກຕຸຍການ ແລະ ຕົ້ນສັງກັດໃນລະດູການທີ່ຜ່ານມາ.

 

ລາງວັນນີ້ເລີ່ມຈັດຂຶ້ນໂດຍສື່ຈາກອີຕາລີຄື “ຕຸດໂຕ້ ສະປອດ” ເມື່ອປີ 2003 ໂດຍຈະມອບໃຫ້ກັບນັກເຕະຜູ້ທີ່ມີອາຍຸຕໍ່າກວ່າ 21 ປີທີ່ຫຼິ້ນໃນທະວີບເອີຣົບ ແລະ ເຮັດຜົນງານໄດ້ໂດດເດັ່ນຕະຫຼອດປີນັ້ນໆ ຈາກການໂຫວດຂອງຜູ້ສື່ຂ່າວຈາກສຳນັກຂ່າວຊັ້ນນຳຫຼາຍເຖິງ 30 ສະບັບທົ່ວເອີຣົບລວມທັງ “ເລກິບ” ຂອງຝຣັ່ງ, ມາກ້າ ຈາກສະເປນ ແລະ ເດິ ທາມ ຈາກອັງກິດໂດຍເມື່ອປີ 2015 ອັອງໂຕນີ ມາຊີຢານ ສູນໜ້າຂອງ ແມນ ຢູໄນເຕັດ ເປັນຜູ້ໄດ້ລາງວັນໄປຄອງ.

 

ສຳລັບປີນີ້ ນັກເຕະດາວລຸ້ງຊື່ດັງຫຼາຍຄົນຕາງກໍຕິດໂຜມາຢ່າງຫຼວງຫຼາຍເຊັ່ນ ມາຄັສ ແຣັສຝອດ ຂອງ ແມນເຊສເຕີ ຢູໄນເຕັດ, ເດເລ້ ອາລີ ຂອງ ທັອດແນມ ຮັອດສະເປີ, ມາໂກ ກຣູຢິດ ຂອງ ລີເວີພູ, ອະເລັກ ອີໂວບີ ຂອງ ອາເຊນອນ ແລະ ຈານລຸຍຈິ ດອນນາຣຸມມາ ນາຍທະວານຂອງ ເອຊີ ມິລານ ເປັນຕົ້ນ.

 

ຫຼ້າສຸດຜົນປີນີ້ອອກມາວ່າ ຊານເຊດ ສາມາດເອົາຊະນະຄູ່ແຂ່ງຄື ຄິງສະລີ ໂກມອງ ປີກເລືອດນຳ້ຫອມຂອງ ບາເຢິນ ມິວນິກ ແລະ ແຣັສຝອດ ໄດ້ສຳເລັດ ສ່ວນ ດອນນາຣຸມມາ ມີຊື່ຢູ່ໃນ 10 ອັນດັບທຳອິດ ແລະ ເປັນຕົວແທນໜຶ່ງດຽວຂອງນັກເຕະອີຕາລີ ໂດຍສະຕາທີມຊາດປັອກຕຸຍການຈະເຂົ້າຮັບລາງວັນດັ່ງກ່າວໃນພິທີປະກາດລາງວັນເມື່ອວັນຈັນທີ 24 ຕຸລານີ້.