ຊັອກ!!!ຕໍເຣສສະຫຼົບຄາສະໜາມ

 

ເຟີນານໂດ ຕໍເຣສ ຫົວຫອກຂອງ ແອັດເລຕິໂກ ມາດຣິດ ເກືອບເປັນຕຳນານຫຼັງຈາກທີ່ຖືກຄູ່ແຂ່ງປະທະໜັກຈົນສະຫຼົບຄາສະໜາມໃນເກມສະເໝີກັບ ລາ ກໍຣຸນຢາ 1-1 ເມື່ອວັນພະຫັດທີ່ຜ່ານມາ ຍັງບຸນຫຼາຍທີ່ເພື່ອນຮ່ວມທີມເຂົ້າມາຊ່ວຍດຶງຊີວິດໄວ້ທັນ.

 

ເຟີນານໂດ ຕໍເຣາສ ກອງໜ້າປະສົບການສູງຂອງ ແອັດເລຕິໂກ ມາດຣິດ ສະໂມສອນດັງຂອງລີກ ລາ ລີກາ ສະເປນ ເກືອບສິ້ນຊີບຫຼັງຈາກທີ່ໄດ້ຮັບບາດເຈັບທີ່ຫົວຈາກການປະທະກັບຄູ່ແຂ່ງແຕ່ໂຊກດີທີ່ເພື່ອນຮ່ວມທັບ “ກາໝີ” ເຂົ້າມາຊ່ວຍຊີວິດໄວ້ໄດ້ທັນໃນເກມທີ່່ສະເໝີກັບ ເດປໍຕິໂບ ລາ ກໍຣຸນຢາ 1-1 ເມື່ອວັນພະຫັດທີ່ຜ່ານມາ.

 

ເຫດການດັ່ງກ່າວເກີດຂຶ້ນໃນຊ່ວງນາທີ 84 ເມື່ອ ຕໍເຣສ ຖືກນັກເຕະຄູ່ແຂ່ງຕຳຢ່າງແຮງຈາກດ້ານຫຼັງກ່ອນທີ່ “ເອວ ນິນໂຢ” ຈະຕົກລົງມາຫົວຟາດກັບພື້ນສະຫຼົບທັນທີ ໂດຍໃນເວລານັ້ນເພື່ອນຮ່ວມສັງກັດພະຍາຍາມເຂົ້າມາດຶງລິ້ນອອກມາປ້ອງກັນລິ້ນອັດຄໍປິດກັ້ນການຫາຍໃຈ.

 

ລາຍງານຫຼ້າສຸດ ແອັດ ມາດຣິດ ແຈ້ງວ່າອະດີດຫົວຫອກ “ຫົງແດງ” ແລະ ເຊວຊີ ຮູ້ສຶກຕົວແລ້ວຂະນະທີ່ຢູ່ລົດໂຮງໝໍທີ່ກຳລັງເດີນທາງໄປໂຮງໝໍເຊິ່ງເຂົາຈະຕ້ອງເຂົ້າຮັບການກວດເຊັກຮ່າງກາຍເພີ່ມຕື່ມທັນທີ.