ຊັດເຈນ!! ຊີດານ ບອກ ໂຣນັນໂດ້ ແລະ ເບວ ບໍ່ໄດ້ມີໄວ້ຂາຍ

ຊີເນດີນ ຊີດານ ອະດີດນັກເຕະທີມຊາດ ຝຣັ່ງ ແລະ ເຣອັນ ມາດຣິດ ຢືນຢັນ ເຣອັນ ມາດຣິດ ຈະບໍ່ມີທາງຂາຍ ຄຣິສຕຽນໂນ້ ໂຣນັນໂດ້ ແລະ ແກເຣັດ ເບວ 2 ສຸດຍອດນັກເຕະຂອງທີມອອກໄປແນ່ນອນ ຫຼັງຈາກທີ່ທັງສອງຄົນມີຂ່າວຍ້າຍທີມກ່ອນໜ້ານີ້ ພ້ອມກັບຍົກເອົາທັງສອງຄົນເປັນນັກເຕະທີ່ສຸດຍອດທີ່ສຸດຂອງໂລກ.

ຊີເນດີນ ຊີດານ ຕຳນານມິດຟິວທີມຊາດ ຝຣັ່ງ ອອກມາເປີດເຜີຍວ່າ ຄຣີສຕຽນໂນ້ ໂຣນັນໂດ້ ແລະ ແກເຣັດ ເບວ ນັກເຕະຂອງ ເຣອັນ ມາດຣິດ ສະໂມສອນຍັກໃຫຍ່ຈາກ ລາ ລີກາ ສະເປນ ຈະຢູ່ໃນຖິ່ນ ຊານດິເອໂກ້ ເບີນາເບວ ຕໍ່ໄປຢ່າງແນ່ນອນ.

ໂຣນັນໂດ້ ມີຂ່າວໜາຫູກັບການອຳລາ “ລາຊາຊຸດຂາວ” ກັບມາຫຼິ້ນໃຫ້ກັບສະໂມສອນທີ່ຕົນເອງເຄີຍສ້າງຊື່ຄື ແມນເຊສເຕີ ຢູໄນເຕັດ ທີມດັງຈາກ ພຣີເມຍລີກ ອັງກິດ ເມື່ອໄວໆນີ້ແຕ່ ຊີດານ ທີ່ກຳລັງເປັນເທຣນເນີ້ ມາດຣິດ ກາສຕີຢາ ແລະ ເຄີຍນຳທີມໄດ້ຊະນະເລີດລາຍການ ຢູຟາ ແຊມປ້ຽນລີກ ເມື່ອປີ 2002 ຢືນຢັນວ່າ ນັກເຕະທັງສອງຈະບໍ່ຍ້າຍອອກຈາກທີມແນ່ນອນ.

“ບໍ່ ເຂົາ (ໂຣນັນໂດ້) ບໍ່ໄດ້ມີໄວ້ຂາຍ ມັນຈະບໍ່ເຂົ້າທ່າເລີຍ ນັກເຕະຊື່ດັງເປັນສິ່ງທີ່ຜູ້ຄົນຕ້ອງການທີ່ຈະອ່ານ ມັນຈຶ່ງເປັນເຫດຜົນວ່າເປັນຫຍັງພວກເຂົາຈຶ່ງຖຽງມັນ ແຕ່ເປັນຫຍັງ ເຣອັນ ມາດຣິດ ຈະຕ້ອງສົນໃຈທີ່ຈະຂາຍຜູ້ຫຼິ້ນທີ່ດີທີ່ສຸດໃນໂລກ? ໂຣນັນໂດ້ ເປັນນັກເຕະທີ່ດີທີ່ສຸດໃນໂລກໃນໄລຍະຫຼາຍປີທີ່ຜ່ານມາ ແລະ ເຂົາຮູ້ວ່າເຂົາເກັ່ງທີ່ສຸດ”

“ມັນບໍ່ໄດ້ໝາຍຄວາມວ່າເຂົາບໍ່ໄດ້ເຮັດວຽກໜັກ ຫຼື ເຂົາບໍ່ຕ້ອງການພັດທະນາ ແລະ ເຮັດໃຫ້ດີຂຶ້ນອີກ ແຕ່ເຂົາມີຄວາມເຊື່ອວ່າເຂົາມີດີແບບໃດ ຂ້ອຍບໍ່ໄດ້ເປັນຄົນທີ່ເຮັດປະຕູໄດ້ຫຼາຍ ແຕ່ຂ້ອຍຮູ້ວ່າຂ້ອຍມີດີຫຍັງແນ່ ຂ້ອຍຮູ້ວ່າຂ້ອຍສາມາດອ່ານເກມ ແລະ ບາງສິ່ງໄດ້ໄວກວ່າຄົນອື່ນ 1 ຫຼື 2 ວິນາທີສະເໝີ” ຕໍານານນັກເຕະ ຝຣັ່ງ ກ່າວ.

ເບວ ມີປະສົບການທັງດີ ແລະ ບໍ່ດີໃນການມາຫຼິ້ນກັບ ເຣອັນ ມາດຣິດ ຫຼັງຈາກທີ່ຕ້ອງພົບກັບອາການບາດເຈັບ ແລະ ຟອມການຫຼິ້ນທີ່ຕ່ຳກວ່າມາດຕະຖານໃນລະດູການທີ່ຜ່ານມາ ເຊິ່ງກໍ່ໃຫ້ເກີດການຄາດເດົາກ່ຽວກັບອະນາຄົດຂອງເຂົາກັບສະໂມສອນ ໂດຍທີ່ ຊີດານ ລະບຸວ່າ “ແນ່ນອນວ່າສະໂມສອນຕ່າງໆກຳລັງຕ້ອງການ ເບວ ເຂົາເປັນໜຶ່ງໃນນັກເຕະທີ່ດີທີ່ສຸດໃນໂລກ ແຕ່ຂ້ອຍບໍ່ໝັ້ນໃຈເຖິງຄວາມຊັດເຈນທີ່ເຮົາຈະເປັນຫຼາຍເທົ່າໃດ ເບວ ເຮັດໃຫ້ມັນຊັດເຈນ ເອເຢນ ຂອງເຂົາກໍຊັດເຈນເຊັ່ນກັນ ເຮົາໄດ້ເຮັດໃຫ້ມັນຊັດເຈນ ອະນາຄົດຂອງເຂົາທີ່ ເຣອັນ ມາດຣິດ ເຮົາເຊັນສັນຍາກັບນັກເຕະທີ່ດີທີ່ສຸດໃນໂລກເຂົ້າມາ ເຮົາຈະບໍ່ຂາຍພວກເຂົາແນ່ນອນ”.

............................................................................................................................................................................