ຊັດເຈນ!!! ມູຣາຢືນຢັນຍັງຢູ່ກັບ ປາຣີ ແຊັງ-ແຊັກແມັງ ຕໍ່ໄປ

ລູຄັສ ມູຣາ ປີກໂຕເກັ່ງຂອງ “ເປເອັດເຊ” ຢືນຢັນຊັດເຈນຕອນນີ້ມີຄວາມສຸກກັບຕົ້ນສັງກັດ ແລະ ບໍ່ຕ້ອງການຍ້າຍໄປຫຼິ້ນໃຫ້ທີມອື່ນໃນໄວໆນີ້ເຖິງວ່າຈະມີຂ່າວລືກ່ຽວກັບອະນາຄົດອອກມາຢູ່ຕະຫຼອດກໍຕາມ ແຕ່ຕົນເອງບອກວ່າຢາກຢູ່ກັບ “ເປເອັດເຊ” ໄປອີກຍາວໆ ເນື່ອງຈາກມີຄວາມສຸກກັບຊີວິດໃນເມືອງຫຼວງຝຣັ່ງ.

ລູຄັສ ມູຣາ ກອງກາງ ປາຣີ ແຊັງ-ແຊັກແມັງ ສະໂມສອນຍັກໃຫຍ່ແຫ່ງ ລີກ ແອັງ ຝຣັ່ງ ຕັດສິນໃຈຍຸຕິກະແສຂ່າວລືກ່ຽວກັບອະນາຄົດຂອງຕົນ ໂດຍອອກມາຢືນຢັນວ່າ ເວລານີ້ຕົນເອງມີຄວາມສຸກກັບການໄດ້ຫຼິ້ນໃນຖິ່ນ ປາກ ເດ ແພຣັງ.

ເມື່ອເດືອນ ກໍລະກົດ ປີ 2013 ມິດຟິວທີມຊາດ ບຣາຊິວ ອາຍຸ 23 ປີ ຍ້າຍມາຈາກ ຊາວ ເປົາໂລ ມາຢູ່ກັບ “ເປເອັດເຊ” ດ້ວຍລາຄາ 40 ລ້ານເອີໂຣ ແຕ່ເຂົາຈໍາເປັນຕ້ອງເຮັດວຽກໜັກເພື່ອໄດ້ລົງຫຼິ້ນຢ່າງສະໝໍ່າສະເໝີ ແລະ ເຖິງວ່າ ອັງເກວ ດິມາເຣຍ ປີກທີມຊາດ ອາເຈນຕິນາ ຈະຍ້າຍມາຮ່ວມທີມເມື່ອຊ່ວງພັກລະດູການທີ່ຜ່ານມາແຕ່ ມູຣາ ກໍໄດ້ລົງຫຼິ້ນເປັນໂຕຈິງເຖິງ 7 ນັດ ຈາກ 9 ເກມທຳອິດໃນ ລີກ ແອັງ ແລະ ນັ້ນອາດຈະແມ່ນໜຶ່ງເຫດຜົນທີ່ເຮັດໃຫ້ເຂົາພໍໃຈກັບການໃຊ້ຊີວິດໃນນະຄອນປາຣີ ແລະ ລ່າສຸດ ນັກເຕະແດນ ແຊມບາ ຍັງເປີດເຜີຍວ່າ ບໍ່ມີຄວາມຕັ້ງໃຈທີ່ຈະຍ້າຍອອກຈາກທີມໃນອະນາຄົດອັນໃກ້ນີ້.

ມູຣາ ທີ່ຍິງໄປ 13 ລູກຈາກ 82 ນັດໃນເກມລີກໃຫ້ຕົ້ນສັງກັດ ກ່າວກັບ “ຟຣ້ອງ ຟຸດບອນ” ວາລະສານຊື່ດັງຂອງເມືອງແດນນໍ້ຳຫອມວ່າ “ຂ້ອຍຊີວິດໃນນະຄອນປາຣີ ຂ້ອຍຕ້ອງການສ້າງປະຫວັດສາດ ຂ້ອຍຮູ້ສຶກວ່າຂ້ອຍສາມາດຄວ້າແຊ້ມ ຢູຟາ ແຊມປ້ຽນ ລີກ ກັບ ປາຣີ ແຊັງ-ແຊັກແມັງ ໄດ້ ແຕ່ບໍ່ພຽງແຕ່ກັບສະໂມສອນ ແຕ່ການໃຊ້ຊີວິດໃນນະຄອນ ປາຣີ ເປັນເລື່ອງທີ່ວິເສດເຊັ່ນດຽວກັນ ມັນແມ່ນເຫດຜົນທີ່ຂ້ອຍຕ້ອງູ່ທີ່ນີ້ໄປອີກດົນ”.

...................................................................................................................................................................