ຊະລາຕັນນັ່ງຢັນທີມໃນລີກຜູ້ດີສົນໃຈຕົນເອງ

 

ຊະລາຕັນ ອິບາຮິໂມວິດ ຫົວຫອກຈອມເກົ໋າຂອງ ປາຣີ ແຊັງ-ແຊັກແມັງ ລະບຸທີມໃນ ພຣີເມຍລີກ ສົນໃຈຢາກໄດ້ເຂົາແທ້ ແຕ່ເຜີຍຍັງບໍ່ໄດ້ຕັດສິນໃຈຫຍັງເທື່ອພ້ອມກັບຊີ້ແຈງ ຕອນນີ້ບໍ່ໄດ້ເຈລະຈາເລື່ອງຕໍ່ສັນຍາກັບ “ເປເອັດເຊ” ອີກ.

 

ຊະລາຕັນ ອິບາຮິໂມວິດ ກອງໜ້າຄົນດັງຂອງ ປາຣີ ແຊັງ-ແຊັກແມັງ ສະໂມສອນມະຫາເສດຖີຈາກເວທີ ລີກແອັງ ຢືນຢັນວ່າມີຫຼາຍສະໂມສອນໃນລີກຜູ້ດີທີ່ສົນໃຈຈະເຊັນສັນຍາກັບເຂົາແທ້.

 

ດາວເຕະສະວີເດັນຈະໝົດສັນຍາກັບຕົ້ນສັງກັດຫຼັງໝົດລະດູການນີ້ ແລະ ເຂົາກໍເຄີຍບອກເອງວ່າຈະບໍ່ຕໍ່ສັນຍາແນ່ນອນເຮັດໃຫ້ຫຼາຍທີມທີ່ຕົກເປັນຂ່າວວ່າຢາກໄດ້ ອິບາຮິໂມວິດ ໄປເສີມຄົມ ເຊັ່ນ ແມນເຊສເຕີ ຢູໄນເຕັດ, ແມນເຊສເຕີ ຊີຕີ, ອາເຊນອນ ແລະ ເຊວຊີ ເປັນຕົ້ນ.

 

ດາວຍິງອາຍຸ 34 ປີເຜີຍວ່າ “ແມ່ນ ມີທີມຈາກ ພຣີເມຍລີກ ສົນໃຈຂ້ອຍ ຂ້ອຍຢືນຢັນໄດ້ ຂ້ອຍຄິດວ່າມັນເປັນລີກທີ່ດັງທີ່ສຸດໃນໂລກ ພວກເຂົາໄດ້ເປັນຂ່າວໃຫຍ່ຢູ່ຕະຫຼອດ ແຕ່ຂ້ອຍຈະຕັດສິນໃຈວ່າຕົນເອງຕ້ອງການຫຍັງກໍຕໍ່ເມື່ອທຸກຢ່າງມັນມາຢູ່ທາງໜ້າຂ້ອຍແລ້ວ ມັນຄືກັບຊີວິດຄູ່ຫັນລະ ມັນຕ້ອງເລືອກສິ່ງທີ່ຈະເຮັດໃຫ້ທັງສອງຝ່າຍມີຄວາມສຸກ”.

 

ອິບາຮິໂມວິດ ຢືນຢັນດ້ວຍຕົນເອງວ່າບໍ່ໄດ້ເຈລະຈາເລື່ອງສັນຍາກັບ ເປເອັດເຊ ເລີຍ “ຂ້ອຍມີສັນຍາຈົນຮອດເດືອນມິຖຸນານີ້ ໃນຕອນນີ້ມັນເບິ່ງວ່າຂ້ອຍຈະບໍ່ສາມາດຢູ່ກັບທີມຕໍ່ໄດ້ (ຫຼັງໝົດສັນຍາແລ້ວ) ເຮົາບໍ່ໄດ້ກຳລັງເຈລະຈາກັນນັ້ນແມ່ນສະຖານະການໃນຕອນນີ້ ເຮົາຈະຖ້າເບິ່ງວ່າມັນມີຄວາມເປັນໄປໄດ້ຫຍັງແນ່ ແລະ ຂ້ອຍຄິດວ່າມັນຈະມີຄວາມເປັນໄປໄດ້ຫຼາຍຢ່າງ ອະນາຄົດມັນດູດີໜ້ອຍໜຶ່ງຊ່ວງຊຳເມີນີ້ຈະມີຫຼາຍຢ່າງເກີດຂຶ້ນ ດັ່ງນັ້ນຕ້ອງອົດທົນໄວ້ໜ້ອຍໜຶ່ງ ພວກເຈົ້າຈະໄດ້ເລື່ອງໄປຂຽນຂ່າວແນ່ນອນ”.