ຊະລາຕັນຍົກມູເປັນກຸນຊືສຸດເທບ

 

ຊະລາຕັນ ອິບາຮິໂມວິດ ກອງໜ້າຮ່າງຍັກສະວີດິດຖືກປ່ອຍຂ່າວວ່າໃກ້ຈະຍ້າຍໄປຮ່ວມງານ ໂຊເຊ ມູຣິນໂຢ ໃນຮັງຂອງ ແມນຢູ ຫຼັງຈາກທີ່ອອກມາຍົກຍ້ອງ ມູຣິນໂຢ ເປັນໂຄດຄົນເຊັ່ນດຽວກັບ ຄາໂລ ອັນເຊລັອດຕິ ພ້ອມຮັບແບບບໍ່ປິດບັງບໍ່ກິນເສັ້ນກັບ ເປັບ ກວາດິໂອລາ ວ່າທີ່ນາຍໃຫຍ່ ແມນ ຊີຕີ.

 

ຊະລາຕັນ ອິບາຮິໂມວິດ ຍອດດາວຍິງທີມຊາດສະວີເດັນກ່າວຊົມເຊີຍ ໂຊເຊ ມູຣິນໂຢ ຜູ້ຈັດການທີມຄົນໃໝ່ຂອງ ແມນເຊສເຕີ ຢູໄນເຕັດ ຍັກໃຫຍ່ຂອງ ພຣີເມຍລີກ ວ່າເປັນຜູ້ຈັດການທີມທີ່ເລີດ ກັບກະແສຂ່າວວ່າ ດາວເຕະອາຍຸ 34 ປີໃກ້ທີ່ຈະຍ້າຍໄປຢູ່ໃນຖິ່ນ ໂອນ ທຣາຟເຟິດ ແລ້ວ.

 

ກັບຕັນທັບ “ໄວກິງ” ທີ່ເຄີຍຮ່ວມງານກັບອະດີດນາຍໃຫຍ່ ເຊວຊີ ໃນ ອິນເຕີ ມິລານ ກ່າວຜ່ານ “ເດິ ກາດຽນ” ສື່ຂອງເມືອງຜູ້ດີວ່າ “ຂ້ອຍມັກ ຄາໂລ ອັນເຊລັອດຕິ ມູຣິນໂຢ ເປັນຄົນທີ່ເກັ່ງ ຄວາມເກົ໋າເກມ ແລະ ຄວາມທຸ່ນທີ່ພວກເຂົາມີ ການສະແດງອອກທີ່ຈິງຈັງ ຂ້ອຍມີຄວາມສຳພັນທີ່ດີກັບພວກເຂົາທັງ 2 ຄົນຍົກເວັ້ນພຽງຄົນດຽວເທົ່ານັ້ນ”.

 

ຂະນະທີ່ເມື່ອຖາມວ່າ ນາຍໃຫຍ່ພຽງຄົນດຽວທີ່ເວົ້າເຖິງແມ່ນ ເປັບ ກວາດິໂອລາ ວ່າທີ່ຜູ້ຈັດການທີມ ແມນເຊສເຕີ ຊີຕີ ທີ່ເຄີຍຮ່ວມງານກັນໃນຮັງ ບາເຊໂລນາ ແມ່ນ ຫຼື ບໍ່ນັ້ນ ຊະລາຕັນ ຕອບວ່າ “ແມ່ນແນ່ນອນ”.

 

ກ່ອນໜ້ານີ້ ຕານເຄດີ ປັນເມຣີ ນັກຂ່າວຕົນອີຕາລີລາຍງານວ່າ ອິບາຮິໂມວິດ ທີ່ກາຍເປັນນັກເຕະຟຣີເອເຢນຫຼັງຈາກຕັດສິນໃຈແຍກທາງກັບ ເປເອັດເຊ ຫຼັງຈາກໝົດສັນຍາຊ່ວງຊຳເມີນີ້ ຈົດປາກກາເຊັນສັນຍາ 1 ປີກັບ “ຜີສາດແດງ” ຮຽບຮ້ອຍແລ້ວ.