ຊວຍຊ້ຳຊາກ!! ວາດີ ຖືກແບນເພີ່ມອົດຊ່ວຍທີມເກມຢາມ ຜີແດງ

ເລສເຕີ ຊີຕີ ຈະໝົດສິດໃຊ້ງານ ເຈມີ ວາດີ ດາວຍິງຄົນສຳຄັນຂອງທີມໃນເກມບຸກໄປຢາມ ແມນເຊສເຕີ ຢູໄນເຕັດ ທ້າຍອາທິດນີ້ຫຼັງຈາກທີ່ ເອຟເອ ສັ່ງແບນເພີ່ມອີກ 1 ນັດພ້ອມກັບໄໝເງິນ 10,000 ປອນຈາກການໄປໃຊ້ຄຳເວົ້າບໍ່ເໝາະສົມກັບກຳມະການຫຼັງຈາກທີ່ຖືກໄລ່ອອກໃນເກມພົບກັບ ເວສແຮມ ເມື່ອອາທິດທີ່ຜ່ານມາ.

 

ສະມາຄົມບານເຕະອັງກິດ ຫຼື ເອຟເອ ປະກາດຢືນຢັນວ່າ ເຈມີ ວາດີ ກອງໜ້າໂຕເກັ່ງຂອງ ເລສເຕີ ຊີຕີ ຈ່າຝູງ ພຣີເມຍລີກ ຈະຖືກແບນເພີ່ມອີກ 1 ນັດຈາກກໍລະນີທີ່ໃຊ້ຄຳເວົ້າບໍ່ເໝາະສົມໃສ່ ຈອນ ມອສ ກຳມະການໃນເກມທີ່ ເລສເຕີ ເປີດບ້ານສະເໝີກັບ ເວສແຮມ 2-2 ເມື່ອວັນອາທິດທີ່ຜ່ານມາ.

ກອງໜ້າທີມຊາດອັງກິດທີ່ຍິງໄປແລ້ວ 22 ເມັດໃນລະດູການນີ້ຫາກໍຈະຖືກແບນເພີ່ມອີກໜຶ່ງນັດໂດຍອັດຕະໂນມັດໃນເກມທີ່ ເລສເຕີ ໄລ່ອັດ ສະວອນຊີ ຊີຕີ 4-0 ເມື່ອທ້າຍອາທິດທີ່ຜ່ານມາ ກ່ອນທີ່ຈະມາຖືກເພີ່ມອີກ 1 ນັດຈາກການສະແດງພຶດຕິກຳທີ່ບໍ່ເໝາະສົມ.

 

ຂະນະດຽວກັນ ເອຟເອ ຍັງສັ່ງປັບເງິນອີກ 10,000 ປອນ ແລະ ຈາກການເພີ່ມໂທດແບນເທື່ອນີ້ສົ່ງຜົນໃຫ້ຫົວຫອກເລືອດຜູ້ດີຈະຕ້ອງອົດລົງຊ່ວຍທີມໃນເກມໄປຢາມ ແມນເຊສເຕີ ຢູໄນເຕັດ ວັນອາທິດທີ 1 ພຶດສະພານີ້ ເຊິ່ງຖ້າທັບ “ຈິງຈອກເງິນ” ບຸກໄປເກັບ 3 ແຕ້ມກໍຈະເຮັດໃຫ້ທີມໄດ້ແຊມລີກສູງສຸດຂອງເມືອງຜູ້ດີໃນລະດູການນີ້ທັນທີ.