ຈົບເລື່ອງຈົບລາວ!!ມາກຊາຍດຶງປາເຢດຮ່ວມທັບ 25 ລ້ານປອນ

 

ຈົບແລ້ວ!! ເລື່ອງລາວຂອງ ດິມິຕຣີ ປາເຢດ ເມື່ອຫຼ້າສຸດ ໂອລິມປິກ ມາກຊາຍ ໄດ້ປະກາດດຶງນັກເຕະເລືອດຝຣັ່ງກັບສູ່ທີມດ້ວຍສັນຍາຍາວ 4 ປີເຄິ່ງມູນຄ່າ 25 ລ້ານປອນລວມໂບນັດຕ່າງໆທີ່ໜ້າຈະຢູ່ທີ່ປະມານ 30 ລ້ານປອນ.

 

“ໂອແອມ” ໂອລິມປິກ ມາກຊາຍ ສະໂມສອນຊັ້ນນໍາຂອງ ລີກແອັງ ຝຣັ່ງ ປະກາດຢືນຢັນແລ້ວວ່າພວກເຂົາໄດ້ເຊັນສັນຍາດຶງ ດິມິຕຣີ ປາເຢດ ປີກທີມຊາດຝຣັ່ງກັບມາຈາກ “ຂຸນຄ້ອນ” ເວສແຮມ ຢູໄນເຕັດ ເປັນທີ່ຮຽບຮ້ອຍແລ້ວເມື່ອວັນອາທິດທີ່ຜ່ານມາດ້ວຍຄ່າຫົວ 25 ລ້ານປອນລວມໂບນັດຕ່າງໆທີ່ອາດຈະຢູ່ທີ່ປະມານ 30 ລ້ານປອນ ໂດຍນັກເຕະຈະຫຼິ້ນໃນຖິ່ນ ສະຕາດ ເວໂລໂດຣມ ຈົນຮອດກາງປີ 2021.

 

ມາກຊາຍ ໂພສຂໍ້ຄວາມລົງ ທະວິດເຕີ ແລະ ຮູບພາບຂະນະທີ່ກອງກາງອາຍຸ 29 ປີກຳລັງຢືນໃສ່ສີເສື້ອຂອງສະໂມສອນວ່າ “ ”ໂອແອມ” ບັນລຸຂໍ້ຕົກລົງກັບ ເວສແຮມ ດຶງນັກເຕະເລືອດນຳ້ຫອມກັບມາສູ່ສະໂມສອນ”.

 

ດ້ານ “ຂຸນຄ້ອນ” ໄດ້ຖະແຫຼງການຜ່ານເວັບໄຊຢ່າງເປັນທາງການຂອງສະໂມສອນວ່າ “ເວສແຮມ ຢູໄນເຕັດ ໄດ້ຂາຍ ດິມິຕຣີ ປາເຢດ ໃຫ້ກັບ ໂອລິມປິກ ມາກຊາຍ ດ້ວຍຄ່າຕົວ 25 ລ້ານປອນ ນັກເຕະຖືກຂາຍຫຼັງຈາກທີ່ມີການຢືນຢັນວ່າເຂົາບໍ່ຫຼິ້ນໃຫ້ ເວສແຮມ ອີກແລ້ວ”.

 

ບົດຄວາມໃຫມ່ໆ