ຈົງຮັກພັກດີ!!ກຸນປະຕິເສດຍ້າຍໄປຮ່ວມຜີ

 

ເດລີ ເມວ ສື່ຂອງອັງກິດລະບຸ ເຊຄິໂອ ອະເກວໂຣ ດາວຍິງຂອງ ແມນເຊສເຕີ ຊີຕີ ເມີນທີ່ຈະຍ້າຍໄປຮ່ວມທີມກັບ ແມນເຊສເຕີ ຢູໄນເຕັດ ເຫດເພາະວ່າບໍ່ຢາກເປັນຄົນຮ້າຍໃນສາຍຕາກອງເຊຍຂອງ “ເຮືອໃບສີຟ້າ”.

 

ເຊຄິໂອ ກຸນ ອະເກວໂຣ ກອງໜ້າຄົນສຳຄັນຂອງ ແມນເຊສເຕີ ຊີຕີ ສະໂມສອນຍັກໃຫຍ່ຂອງ ພຣີເມຍລີກ ບໍ່ສົນໃຈທີ່ຈະຍ້າຍໄປຢູ່ກັບ ແມນເຊສເຕີ ຢູໄນເຕັດ ສະໂມສອນຄູ່ແຂ່ງຮ່ວມເມືອງ ແຕ່ຢ່າງໃດ ຕາມການລາຍງານຂອງ ເດລີ ເມວ ສື່ດັງຂອງເມືອງຜູ້ດີ.

 

ແມນ ຢູໄນເຕັດ ສ້າງຄວາມຮືຮາເມື່ອຕົກເປັນຂ່າວວ່າຍື່ນຂໍ້ສະເໜີເງິນ 55 ລ້ານປອນເພື່ອຂໍຊື້ ອະເກວໂຣ ຫຼັງຈາກທີ່ຕຳແໜ່ງຕົວຂອງເຂົາບໍ່ມີຄວາມໝັ້ນຄົງອີກຕໍ່ໄປນັບຕັ້ງແຕ່ທີ່ ກາບຣຽວ ເຮຊຸດ ຫົວຫອກດາວລຸ້ງເລືອດແຊມບາເຂົ້າມາຢູ່ກັບທີມຢ່າງເປັນທາງການເມື່ອຊ່ວງຕົ້ນເດືອນມັງກອນທີ່ຜ່ານມາ.

 

ຈົນຮອດຕອນນີ້ອະນາຄົດຂອງ ອະເກວໂຣ ໃນຖິ່ນ ເອຕິຮັດ ສະເຕດຽມ ຍັງເຕັມໄປດ້ວຍຄວາມບໍ່ແນ່ນອນ ໂດຍທີ່ເຂົາຈະລົມກັບ ເປັບ ກວາດິໂອລາ ຜູ້ຈັດການທີມຫຼັງຈົບລະດູການນີ້ ເຊິ່ງນັ້ນເຮັດໃຫ້ເບິ່ງວ່າ “ຜີສາດແດ”ງ ມີໂອກາດໄດ້ຕົວເຂົາຫຼາຍຂຶ້ນໄປອີກ ແຕ່ຫຼ້າສຸດ ເດລີ ເມວ ລະບຸວ່າຫົວຫອກທີມຊາດອາເຈັນຕິນາອາຍຸ 28 ປີຈະປະຕິເສດທຸກຂໍ້ສະເໜີຈາກ “ຜີສາດແດງ” ແນ່ນອນເພື່ອທີ່ເຂົາຈະໄດ້ບໍ່ຖືກແຟນບານ “ເຮືອໃບສີຟ້າ” ຊັງຂີ້ໜ້າ.

 

ນອກຈາກນີ້ມີຄວາມເປັນໄປໄດ້ສູງທີ່ ແມນ ຊີຕີ ຈະບໍ່ຕອບຮັບຂໍ້ສະເໜີຂອງ ແມນ ຢູໄນເຕັດ ເຊັ່ນກັນເພາະຄາດກັນວ່າທັງສອງທີມຈະລຸ້ນຍາດແຍ່ງແຊມລີກກັນໃນລະດູການໜ້າ ເຊັ່ນນັ້ນກໍຍັງມີໂອກາດທີ່ ອະເກວໂຣ ຈະຍ້າຍທີມໂດຍເວລານີ້ ປາຣີ ແຊງ-ແຊັກແມງ ກັບ ເຣອັນ ມາດຣິດ ໃຫ້ຄວາມສົນໃຈຢູ່.

 

ບົດຄວາມໃຫມ່ໆ