ຈຸດເບິ່ງທະເລໝອກທີ່ພູຜາແດງແຂວງບໍ່ແກ້ວ

ພູຜາແດງ ຕັ້ງຢູ່ທາງທິດເໜືອຂອງ ເມືອງຫ້ວຍຊາຍ, ຫ່າງຈາກເທດສະບານແຂວງປະມານ 23 ກິໂລແມັດ. ພູດັ່ງກ່າວ ເປັນພູປະຫວັດສາດ ໃນສະໄໝອາເມລິກາດຳເນີນສົງຄາມຢູ່ລາວ; ຢູ່ໃນນີ້ ຍັງມີເດີ່ນບິນ ແລະ ຂຸມຄອງເກົ່າຂອງທະຫານອາເມລິກາ (CIA), ພູດັ່ງກ່າວ ມີຄວາມສູງເໜືອໜ້ານ້ຳທະເລປະມານ 1500 ແມັດ, ຍັງອຸດົມສົມບູນໄປດ້ວຍຊີວະນາໆພັນເຊັ່ນ: ປ່າໄມ້ໃຫຍ່, ຕົ້ນຊາໃຫຍ່, ຝູງນົກ ແລະ ກະຮອກ. ເມື່ອຍາມ ກາງຄືນໄດ້ຍິນສຽງຮ້ອງຂອງນົກເຄົ້າແມວ, ເປັດປອງ, ແມງຈີລໍ່ ແລະ ໃນຍາມເຊົ້າ ຈະມີນົກຕົ້ງລໍ ແລະ ນົກອື່ນໆ. ພິເສດ ຢູ່ເທິງພູນັກທ່ອງທ່ຽວ ຈະໄດ້ສຳພັດກັບສາຍລົມພັດ ແລະ ມີທະເລໝອກ, ຕອນກາງເວັນ ຈະເບິ່ງເຫັນທິວທັດ ທຳມະຊາດພື້ນທີ່ຫຼາຍເຊັ່ນ: ພື້ນທີ່ເມືອງຕົ້ນເຜິ້ງ, ເມືອງຫ້ວຍຊາຍ, ພື້ນທີ່ປະເທດໄທ (ເມືອງຊຽງແສນ, ສາມຫຼຽມຄຳ), ພື້ນທີ່ປະເທດພະມ້າ ຢູ່ຕິດຊາຍແດນລາວ ແລະ ສາຍແມ່ນ້ຳຂອງ ທີ່ໄຫຼຜ່ານສາມ ປະເທດລາວ, ໄທ ແລະ ມຽນມ້າ.

ພູຜາແດງ ເປັນສະຖານທີ່ທ່ອງທ່ຽວ ທາງທໍາມະຊາດທີ່ສວຍງາມແຫ່ງໜຶ່ງ ທີ່ໄດ້ຮັບການພັດທະນາໃຫ້ກາຍ ມາເປັນແຫຼ່ງທ່ອງທ່ຽວຂຶ້ນໃນປີ 2011. ກິດຈະກຳທີ່ໜ້າສົນໃຈແມ່ນ ການຍ່າງປ່າຊົມທຳມະຊາດ, ການຊົມທະເລໝອກ, ການພັກແຮມຄ້າງຄືນ ແລະ ນອກຈາກການຊົມທຳມະຊາດແລ້ວ ບັນດານັກທ່ອງທ່ຽວ ຍັງໄດ້້ທ່ຽວຊົມຮ່ອງຮອຍ ທາງປະຫວັດສາດ, ຄ້າຍທະຫານເກົ່າຂອງອາເມລິກາ ທີ່ມີຢູ່ເທິງພູຜາແດງເຊັ່ນວ່າ: ຖ້ຳຫີນ ທີ່ເປັນບ່ອນ ປະຈຳການ, ເດີ່ນຍົນ, ປືນໃຫຍ່ ແລະ ຄອງເໝືອງ.

…………………………………………………………

ຂໍຂອບໃຈທີມາ : http://www.laogov.gov.la