ຈີນໂມໂຫຖືກກ່າວຫາສິນຄ້າປອມເຕັມຕະຫຼາດອີຢູ

 

ລັດຖະບານຈີນປະນາມລາຍງານເມື່ອວັນພະຫັດຂອງຢູໂຣໂພທີ່ກ່າວຫາຈີນເປັນແຫ່ງໃຫຍ່ຂອງສິນຄ້າປອມແປງໃນສະຫະພາບເອີຣົບ (ອີຢູ) ລະບຸວ່າເປັນການກ່າວຫາທີ່ “ຂາດຄວາມຮັບຜິດຊອບ” ພ້ອມກັບປະກາດຈະເດີນໜ້າປາບປາມການລະເມີດຊັບສິນທາງປັນຍາຕໍ່ໄປ.

ສຳນັກຂ່າວຣອຍເຕີລາຍງານຈາກນະຄອນປັກກິ່ງປະເທດຈີນເມື່ອວັນທີ 29 ມິຖຸນາວ່າ ລາຍງານຂອງອົງການຕຳຫຼວດເອີຣົບ (ຢູໂຣໂພ) ຮ່ວມກັບສຳນັກງານຊັບສິນທາງປັນຍາສະຫະພາບເອີຣົບ “ອີຢູ” ເຜີຍແຜ່ເມື່ອວັນພະຫັດກ່າວວ່າ ຈົນຮອດຕອນນີ້ຈີນຍັງຄົງເປັນປະເທດທີ່ໄດ້ຮັບການພິສູດວ່າ ມີສິນຄ້າປອມແປງໃນອີຢູ ໂດຍຮົງກົົງເຮັດໜ້າທີ່ເປັນຈຸດຜ່ານສຳລັບສິນຄ້າທີ່ມີແຫຼ່ງຜະລິດໃນຈີນແຜ່ນດິນໃຫຍ່.

ຊຸນ ຈິ້ເຫວິນ ໂຄສົກກະຊວງການຄ້າຈີນເຜີຍຕໍ່ຜູ່ສື່ຂ່າວໃນກຸງປັກກິ່ງວ່າ ການກ່າວຫາໃນລາຍງານຂອງຢູໂຣໂພຂາດຄວາມຮັບຜິດຊອບ “ຄວາມຖືກຕ້ອງ ແລະ ວັດຖຸປະສົງຂອງສະຖິຕິ ທີ່ນຳສະເໜີໃນລາຍງານຄວນມີການສຶກສາທີ່ເພີ່ມຕື່ມ”.

ລາຍງານອ້າງສະຖິຕິຈາກການສຶກສາຂອງຫໍການຄ້າອາເມລິກາ ເຊິ່ງປະເມີນວ່າ 72% ຂອງສິນຄ້າປອມທີ່ໝູນວຽນຢູ່ໃນຕະຫຼາດສິນຄ້າດັ່ງກ່າວ ຂະໜາດໃຫຍ່ທີ່ສຸດໃນໂລກ 3 ຄື ອີຢູ ຍີ່ປຸ່ນ ແລະ ອາເມລິກາ ຖືກສົ່ງອອກຈາກປະເທດຈີນໃນປີ 2016.

ສິນຄ້າປອມຄອງສ່ວນແບ່ງປະມານ 12.5% ຂອງສິນຄ້າສົ່ງອອກທັງໝົດຂອງຈີນ ແລະ ກວ່າ 1.5% ຂອງຈີດີພີຈີນໃນປີ 2016.

ຊຸນກ່າວອີກວ່າ ຈີນຈະເດີນໜ້າ “ກວາດລ້າງຢ່າງໜັກ” ຕໍ່ການລະເບີດຊັບສິນທາງປັນຍາໂດຍສະເພາະການສົ່ງອອກສິນຄ້າທີ່ກ່ຽວຂ້ອງກັບສຸຂະພາບຂອງຜູ່ບໍລິໂພກ ແລະ ວັດສະດຸສຳລັບການລົງທຶນດ້ານສາທາລະນູປະໂພກຂະໜາດໃຫຍ່.

ລາຍງານຍັງສະແດງຄວາມວິຕົກກ່ຽວກັບການໃຊ້ລົດໄຟຂົນສົ່ງສິນຄ້າຫຼາຍຂຶ້ນລະຫວ່າງຈີນກັບເອີຣົບ ໂດຍປັດຈຸບັນມີລົດໄຟຂົນສົ່ງສິນຄ້າ 39 ຂະບວນເຊື່ອຕໍ່ເອີຣົບກັບ 16 ເມືອງຂອງຈີນ.