ຈິງຈອກປັດຂໍ້ສະເໜີປືນດຶງມາເຣດຮ່ວມທັບ

 

ເລກິບ ສື່ດັງຂອງຝຣັ່ງຕີຂ່າວ ເລສເຕີ ຊີຕີ ປັດຂໍ້ສະເໜີທີ່ ອາເຊນອນ ຍື່ນໃຫ້ເພື່ອຂໍຊື້ ຣີຢາດ ມາເຣດ ປີກຄົນສຳຄັນຂອງທີມຮຽບຮ້ອຍເຖິງວ່າຈະໄດ້ຮັບຄ່າໂຕເຖິງ 30 ລ້ານປອນກໍຕາມແຕ່ ປືນໃຫຍ່ ກໍຈະຍື່ນຂໍ້ສະເໜີອີກ.

 

ເລສເຕີ ຊີຕີ ແຊມ ພຣີເມຍລີກ ລະດູການທີ່ຜ່ານມາປະຕິເສດຂໍ້ສະເໜີຈຳນວນ 30 ລ້ານປອນຈາກ ອາເຊນອນ ທີ່ຂໍຊື້ ຣີຢາດ ມາເຣດ ປີກໂຕເກັ່ງຂອງທີມແລ້ວ ຕາມການລາຍງານຂອງ ເລກິບ ສື່ຊື່ດັງຂອງຝຣັ່ງ.

 

ມາເຣດ ເຮັດຜົນງານໄດ້ດີເມື່ອລະດູການທີ່ຜ່ານມາຈົນເປັນໜຶ່ງໃນກຳລັງສຳຄັນທີ່ຊ່ວຍໃຫ້ທີມໄດ້ແຊມລີກສູງສຸດເປັນຄັ້ງທຳອິດໃນປະຫວັດສາດ ຂະນະທີ່ນັກເຕະໄດ້ຮັບເລືອກໃຫ້ເປັນຜູ້ຊະນະລາງວັນນັກເຕະດີເດັ່ນແຫ່ງປີຂອງສະມາຄົມນັກກິລາບານເຕະອາຊີບອັງກິດ (ພີເອຟເອ) ອີກດ້ວຍ.

 

ທັງນີ້ ເລກິບ ລາຍງານວ່າ ອາເຊນອນ ກໍຍັງບໍ່ຍອມງ່າຍໆໂດຍພວກເຂົາຈະຍື່ນຂໍ້ສະເໜີຂໍຊື້ ມາເຣດ ອີກເທື່ອໜຶ່ງກັບຈຳນວນເງິນທີ່ສູງກວ່າເກົ່າໃນອີກບໍ່ດົນຫຼັງຈາກນີ້.