ຈາກຜູ້ຮັບກາຍເປັນຜູ້ໃຫ້ ການແບ່ງປັນນ້ຳໃຈບໍ່ມີມື້ສິ້ນສຸດ

 

   

    ດັ່ງທີ່ພວກເຮົາໄດ້ຍິນເລື່ອງລາວຂ່າວຄາວໃນອາທິດທີ່ຜ່ານມາວ່າ ມີແອນ້ອຍເພດຊາຍທີ່ເກີດໃນວັນທີ 11ມັງກອນ 2016 ຜູ້ມີຄວາມຜິດປົກກະຕິຄືບໍ່ມີຮູທະວານ ເຊິ່ງເປັນລູກທ້າວເຈື້ອຍ ແລະນາງໄລ ປະຊາຊົນແຂວງອຸດົມໄຊທີ່ມີຖານະທຸກຍາກຂາດເຂີນ ຈຶ່ງບໍ່ມີເງື່ອນໄຂທີ່ຈະປິ່ນປົວຮັກສາແອນ້ອຍໄດ້ ແຕ່ເມື່ອຂ່າວຄາວດັ່ງກ່າວຖືກເຜີຍແຜ່ອອກໄປໃນໂຊຊຽວເນັດເວີກເມື່ອວັນທີ 12ມັງກອນ ໄດ້ເຮັດໃຫ້ຊາວເນັດແຫ່ກັນບໍລິຈາກເງິນຊ່ວຍເຫຼືອຜູ້ລະເລັກລະໜ້ອຍ ເຮັດໃຫ້ແອນ້ອຍໄດ້ຖືກສົ່ງຂຶ້ນມາຜ່າຕັດຢູ່ທີ່ໂຮງໝໍມະໂຫສົດ ນະຄອນຫຼວງວຽງຈັນຢ່າງຮີບດ່ວນ ໃນວັນທີ 13ມັງກອນ ເຊິ່ງປັດຈຸບັນນີ້ເດັກໄດ້ພົ້ນຂີດອັນຕະລາຍ ແລະມີສຸຂະພາບແຂງແຮງດີ ໄດ້ກັບຄືນເມືອບ້ານເກີດໃນວັນທີ 19ມັງກອນທີ່ຜ່ານມາ.

ແຕ່ເນື່ອງຈາກຍອດບໍລິຈາກທີ່ໄດ້ຮັບນັ້ນມີມູນຄ່າສູງເກີນຄາດໝາຍ ທາງຄອບຄົວຂອງແອນ້ອຍຈຶ່ງໄດ້ນຳເອົາເງິນທີ່ໄດ້ຈຳນວນໜຶ່ງໄປຊ່ວຍເຫຼືອບັນດາຄົນເຈັບຜູ້ຂາດເຂີນທີ່ເຂົ້າມາປິ່ນປົວຢູ່ໂຮງໝໍມະໂຫສົດ ນອກນັ້ນ ກໍໄດ້ເອົາໄປຊື້ອຸປະກອນການແພດເພື່ອນຳມາມອບໃຫ້ກັບຄະນະອຳນວຍການ ແລະຄະນະແພດຢູ່ທີ່ໂຮງໝໍເມືອງນາໝໍ້ ແຂວງອຸດົມໄຊ ເນື່ອງຈາກທາງໂຮງໝໍເອງກໍຍັງຂາດເຂີນອຸປະກອນເຄື່ອງມີທາງການແພດຫຼາຍຢ່າງ ໂດຍສິ່ງຂອງທີ່ນຳມາມອບໃນຄັ້ງນີ້ມີມູນຄ່າກວ່າ 17ລ້ານກີບ.

 

ທ້າວ ເຈື້ອຍໄດ້ກ່າວວ່າ ປັດຈຸບັນແອນ້ອຍໄດ້ອອກຈາກໂຮງໝໍ ແລະມີສະພາບຮ່າງກາຍທີ່ແຂງແຮງ. ຂໍຂອບໃຈທຸກໆຄົນທີ່ມີຈິດໃຈເມດຕາທີ່ໄດ້ໃຫ້ຊີວິດໃໝ່ແກ່ລູກຊາຍ ຕົນເອງກໍບໍ່ມີສິ່ງໃດຈະຕອບແທນບຸນຄຸນນອກຈາກອວຍພອນໃຫ້ທຸກໆຄົນຈົ່ງມີສຸຂະພາບເຂັ້ມແຂງ, ສຸກກາຍສະບາຍໃຈ ແລະປະສົບຜົນສຳເລັດໃນໜ້າທີ່ວຽກງານ.
 

ນີ້ຄືອີກໜຶ່ງຕົວຢ່າງທີ່ດີໃນສັງຄົມລາວພວກເຮົາ ເຖິງວ່າຫຼາຍໆຄົນທີ່ຮ່ວມບໍລິຈາກອາດຈະບໍ່ໄດ້ລ້ຳລວຍລົ້ນຟ້າ ແຕ່ສິ່ງທີ່ພວກເຮົາມີຢ່າງເຕັມປ່ຽມນັ້ນກໍຄືນ້ຳໃຈ ທ່ານເຊື່ອບໍ່ວ່ານ້ຳໃຈກຸສົນຂອງທ່ານທີ່ຖືກສົ່ງຜ່ານເປັນເງິນບໍ່ພໍເທົ່າໃດສິບເທົ່າໃດຮ້ອຍ ຈາກຈຳນວນນ້ອຍໆໂຮມກັນກໍຫຼາຍຂຶ້ນຈົນສາມາດຊ່ວຍຕໍ່ລົມຫາຍໃຈ, ຊ່ວຍໃຫ້ຊີວິດແກ່ເດັກນ້ອຍຕາດຳໆຜູ້ໜຶ່ງ ແລະທີ່ສຳຄັນຍັງໄດ້ແຈກຈ່າຍນ້ຳໃຈອັນປະເສີດເຫຼົ່ານີ້ສູ່ໃຜອີກຫຼາຍໆຄົນ. ນີ້ແຫຼະ! ຈຶ່ງເອີ້ນວ່າການແບ່ງປັນທີ່ແທ້ຈິງ. ການເປັນຜູ້ໃຫ້ ບໍ່ແມ່ນເພາະວ່າເຮົາມີຈົນເຫຼືອເຟືອ ແຕ່ເປັນເພາະເຮົາຮູ້ວ່າລົດຊາດຂອງຄຳວ່າບໍ່ມີນັ້ນມັນທຸກຍາກລຳບາກຂະໜາດໃດ! ຂໍສະໜັບສະໜູນໃຫ້ສັງຄົມລາວເປັນສັງຄົມແບ່ງປັນຢ່າງແທ້ຈິງ, ຈິງໃຈ ແລະແຜ່ຂະຫຍາຍກວ້າງຂວາງອອກໄປເລື້ອຍໆ.

 

 

ບົດຄວາມໃຫມ່ໆ