ຈັບແລ້ວຄາດຕະກຳ ພຣະອາຈານ ບົວເງິນ ນະເວີນໄຊ

ພຽງ 3 ວັນເຈົ້າໜ້າທີ່ຕຳຫຼວດສາມາດຈັບຕົວຜູ້ຖືກຫາຄາດຕະກຳພຣະອາຈານ ບົວເງິນ ນະເວີນໄຊພ້ອມຮັບສາລະພາບ
ເກີດການຄາດຕະກຳໂຫດ ພຣະອາຈານ ບົວເງິນ ນະເວີນໄຊ ຫລືຍາບົວ ທີ່ວັດໃຫຍ່ໄຊຍະພູມ ເທສະບານເມືອງ ໄກສອນ ພົມວິຫານ ແຂວງສະຫວັນນະເຂດ ໃນຄ່ຳຄືນຂອງວັນທີ 11 ພະຈິກ 2015 ຫຼັງຈາກນັ້ນ ພຽງ 3 ວັນເຈົ້າໜ້າທີ່ຕຳຫຼວດກໍ່ໄດ້ສົມທົບກັບພາກສ່ວນກ່ຽວຂ້ອງ ຈົນສາມາດນຳຈັບໂຕຜູ້ຖືກຫາມາດຳເນີນຄະດີໄດ້ຕາມລະບຽບກົດໝາຍ.
ພາຍຫລັງເຈົ້າໜ້າທີ່ ປກສ ແຂວງໄດ້ຮັບແຈ້ງຄວາມໃນເວລາ 8 ໂມງຂອງວັນທີ 12/11/2015 ກໍ່ໄດ້ຈັດສົ່ງທິມງານເຈົ້າໜ້າທີ່ລົງສຶບສວນ-ສອບສວນຢ່າງທັນທີທັນໃດ ໂດຍຜ່ານການສັນນະສູດ ແມ່ນພົບເຫັນຊາກສົບພຣະອາຈານ ບົວເງິນ ນະເວີນໄຊ ນອນຫງາຍໜ້າແລະຫົວສຸບເຂົ້າກ້ອງຕຽງນອນ, ບໍລິເວນຄໍຖືກຂອງມີຄົມປາດ ແລະມີມີດແທງສຽບຄາໄວ້ທີ່ຄໍ, ຢູ່ຫົວມີຮອຍກະທົບໃສ່ ວັດຖຸແຂງ ແລະມືທັງສອງເບື້ອງແມ່ນຖືກຂອງມີຄົມປາດແລະຊ້ຳ ຊຶ່ງລວມທັງໝົດມີ 17 ບາດແຜ ແລະຢູ່ບໍລິເວນຝາຫ້ອງນອນມີເລືອດຟົ້ງໃສ່, ຢູ່ຫ້ອງນ້ຳມີການລ້າງຄາບເລືອດ ແລະບໍລິເວນອ້ອມຮອບຊາກສົບພົບເຫັນຊອງບຸນທີ່ຖືກຈີກແລ້ວຖິ້ມລົງໃສ່ຖັງນ້ຳຢູ່ໃນຫ້ອງນ້ຳ.


ຈາກການເກັບກຳຂໍ້ມູນເບື້ອງຕົ້ນຂອງພະຍານອ້ອມຂ້າງຄື ຈົວ ຄຳຮູ້ ໄດ້ໃຫ້ການວ່າ: ໃນເວລາ 20 ໂມງຂອງວັນທີ 11/11/2015 ພະອາຈານ ບົວເງິນ ນະເວີນໄຊ (ຍາບົວ) ໄດ້ຍ່າງ ອອກ ຈາກກຸດຕິຕຶກຕຳ່ທີ່ສ້າງໃໝ່ແລ້ວຍ່າງເຂົ້າໄປກຸດຕິຕຶກເກົ່າ ແລະໃນເວລາທີ່ຍ່າງນັ້ນຍາບົວໄດ້ນຸ່ງຜ້າບ່ຽງ(ບໍ່ໄດ້ຄຸມຜ້າສະບົງ)ສ່ວນໃນມືຂອງຍາບົວແມ່ນໄດຖືໂທລະສັບທັງຍ່າງເຂົ້າມາຫາຈົວ ຄຳຮູ້ ທີ່ນັ່ງຫລິ້ນ ໂທລະສັບຢູ່ໃນຕຶກຫລັງເກົ່າ, ພໍຍ່າງມາຮອດ ຈົວ ຄຳຮູ້ ຍາບົວໄດ້ບອກ ໃຫ້ຈົວຄຳຮູ້ວ່າ: ຈົວມາບີບ ຂາໃຫ້ແດ່ ບີ່ແຄ່ງປັ້ນ, ແລ້ວຈົວຄຳຮູ້ກໍ່ໄດ້ເຂົ້າໄປບີບຂາ, ບີບແຄ່ງໃຫ້ຍາບົວ, ໃນເວລານັ້ນມີ 4 ອົງຢູ່ໃນຫ້ອງ ຄື: 1: ຍາບົວ, 2: ຈົວ ຄຳຮູ້, 3: ຈົວເພັດ 4: ຈົວທອງຈັນ ຫລັງຈາກນັ້ນກໍ່ພາ ກັນບີບຂາ-ບີບແຂ່ງໃຫ້ຍາບົວ ພໍຮອດເວລາ 20 ໂມງ 30 ນາທີ ໄດ້ມີຄົນໂທລະສັບມາຫາຍາບົວ ແຕ່ບໍ່ຮູ້ວ່າ ເປັນໃຜ,ໄດ້ຍິນແຕ່ວ່າອາໂຫລ! ຢູ່ກຸດຕິ ເບິ່ງຈົວນ້ອຍຫຍິບຕົ້ນຢູ່ ແລະໄດ້ຍິນສຽງຍາບົວເວົ້າວ່າ: ຮຽນພາສາບໍ? ຫລັງຈາກນັ້ນກໍ່ວາງສາຍ ຈາກນນັ້ນໄດ້ປະມານ 5 ນາທີ ກໍ່ໄດ້ມີຄົນໂທມາຫາອີກແຕ່ເວົ້າເລື່ອງຫຍັງກໍ່ບໍ່ຮູ້; ພໍຍາບົວລົມໂທລະສັບແລ້ວ ຈົວຄຳຮູ້ກໍ່ ໄດ້ເຫັນແສງໄຟຕາລົດແລ່ນເຂົ້າມາ ແຕ່ໃນເວລານັ້ນແມ່ນບໍ່ຮູ້ວ່າລົດຈອດຢູ່ໃສ? ຫລັງຈາກນັ້ນຍາບົວ ແມ່ນໄດ້ບອກໃຫ້ຈົວຄຳຮູ້ວ່າ: ພວກເຈົ້າເຊົາບີບຂາ ພ້ອມທັງບອກຈົວຄຳຮູ້ຂົນເອົາຕົ້ນຂຶ້ນໄປໄວ້ນຳກັນເດີ ແລ້ວຍາບົວ ກໍ່ໄດ້ຍ່າງລົງອອກໄປຫາຄົນທີ່ຂີ່ລົດຈັກມານັ້ນ, ເວລານັ້ນໄດ້ປະມານ 21 ໂມງກວ່າໆ, ຫລັງຈາກຂົນຕົ້ນຂຶ້ນໄປໄວ້ແລ້ວ ຈົວ ຄຳຮູ້ ກໍ່ໄດ້ຍ່າງລົງມາກໍ່ບໍ່ພົບເຫັນຍາບົວແລ້ວ ຈາກນັ້ນຈົວຄຳຮູ້ ກໍ່ໄດ້ຍ່າງເຂົ້າໄປໃນຫ້ອງນອນ ແລະໄດ້ຫລິ້ນໂທລະສັບ ຈາກນັ້ນ ກໍ່ໄດ້ໂທຫາໝູ່ ແລະກໍ່ຍ່າງອອກໄປຈາກຫ້ອງນອນໄປລົມໂທລະສັບຢູ່ນອກ, ພໍລົມໂທລະສັບແລ້ວ ຈົວຄຳຮູ້ກໍ່ໄດ້ໄປເຂົ້າຫ້ອງນ້ຳ ແລ້ວໄດ້ຍິນສຽງຍາບົວຮ້ອງດັງຂຶ້ນວ່າ: ເອິ! 1 ບາດ, ແລ້ວໄດ້ຍິນສຽງໝາໃນຄອກເຫົ່າຫອນຂຶ້ນໃນເວລາປະມານ 22 ໂມງ 22 ນາທີ ແລະໃນເວລາທີ່ຍາບົວຮ້ອງຈົວຄຳຮູ້ ແມ່ນຍັງນັ່ງຢູ່ໃນຫ້ອງນ້ຳທີ່ຢູ່ຕິດຂ້າງຫ້ອງນອນຂອງຍາບົວ, ພໍເຂົ້າຫ້ອງນ້ຳແລ້ວ ຈົວຄຳຮູ້ກໍ່ຍ່າງອອກມາ ກໍ່ໄດ້ເຫັນລົດຈັກຄິກສີຂາວຈອດຢູ່ຂ້າງຫ້ອງຍາບົວ ສ່ວນລົດຈັກນັ້ນແມ່ນປິ່ນໜ້າເຂົ້າຫ້ອງຂອງຍາບົວ ແຕ່ບໍ່ໄດ້ສັງເກດເບິ່ງປ້າຍ, ຫລັງຈາກນັ້ນ, ຈົວຄຳຮູ້ກໍ່ຍ່າງເຂົ້າໄປຫ້ອງນອນ ແລະໃນເວລາທີ່ລົມໂທລະສັບນັ້ນ ຈົວຕີ໋ກໍ່ຍ່າງອອກມາລົມໂທລະສັບຢູ່ເດີ່ນໜ້າໂຮງຮຽນຄືກັນ ແລະ ຕອນທີ່ຈົວຄຳຮູ້ ຍ່າງເຂົ້າມາກໍ່ບໍ່ເຫັນຈົວຕີ໋ແລ້ວ ພໍຮອດເວລາ 7 ໂມງຂອງວັນທີ 12 ພະຈິກ 2015 ຈົວນ້ອຍບໍ່ເຫັນຍາບົວມາສັນເຂົ້າ, ຈຶ່ງພາກັນໄປເອີ້ນ; ແຕ່ປະຕູຫ້ອງຍັງລ໋ອກໄວ້ ຈຶ່ງໄດ້ພາກັນຫາກະແຈມາໄຂ ຈຶ່ງພົບເຫັນຍາບົວນອນເສຍຊີວິດຢູ່.


ຜ່ານການຊັນນະສູດ ແລະ ເກັບຂໍ້ມູນຫຼັກຖານ ຈຶ່ງສາມາດກຳນົດເປົ້າໝາຍໄດ້. ໂດຍທາງຄະນະພັກ, ຄະນະບັນຊາກອງບັນຊາການ ປກສ ແຂວງສະຫວັນນະເຂດ ຈຶ່ງໄດ້ຊີ້ນຳເລົ່າຮົບວິຊາສະເພາະໃນການໄລ່ຊອກໄລ່ຈັບຮອດເວລາປະມານ 10 ໂມງຂອງວັນທີ 12/11/2015 ເປົ້າ ໝາຍໄດ້ໄປຮອດແຂວງຄຳມ່ວນ ເຊິ່ງເຈົ້າໜ້າທີ່ພວກເຮົາກໍ່ໄດ້ຕິດຕາມໄປ ແລະ ຮອດແຂວງຄຳມ່ວນໃນເວລາ 22 ໂມງ, ແຕ່ເປົ້າໝາຍໄດ້ປະກົດຕົວຢູ່ບ້ານວຽງຈະເລີນ, ເມືອງໄຊເສດຖາ, ນະຄອນຫຼວງວຽງຈັນ. ເຈົ້າໜ້າທີ່ຈຶ່ງໄດ້ຂຶ້ນປະສານກັບ ປກສ ນະຄອນຫຼວງວຽງຈັນ ແລະ ກົມສືບຂ່າວ, ຄະດີອາຍາ ຈົນມາຮອດເວລາ 21 ໂມງ 35 ນາທີຂອງວັນທີ 14/11/2015 ຈຶ່ງສາມາດກັກຕົວທ້າວ ເກດສະໜາ ຫຼືແລັກ ຢູ່ທີ່ໂຮງແຮມສະກາຍໄລ້ ຕັ້ງຢູ່ບ້ານວຽງຈະເລີນ, ເມືອງໄຊເສດຖາ, ນະຄອນຫຼວງວຽງຈັນ. 
ຜ່ານການຄົ້ນຕົນຕົວຜູ້ກ່ຽວພົບເຫັນດັ່ງນີ້: ເງິນໂດລາ ຈຳນວນ 100 ໂດລາ, ເງິນບາດໄທ 950 ບາດ, ເງິນກີບ 434.000 ກີບ. ກວດພົບເຄື່ອງຢູ່ໃນຫ້ອງຜູ້ກ່ຽວພັກເຊົ່າມີ: ເງິນໂດລາ 914 ໂດລາ, ເງິນບາດ 4.500 ບາດ, ເງິນກີບຈຳນວນ 2.733.500 ກີບ.
ຜ່ານການສືບສວນ-ສອບສວນທ້າວ ເກດສະໜາ ຫຼືແລັກ, ອາຍຸ 28 ປີ, ອາຊີບຫວ່າງງານ, ບ້ານທາດອີງຮັງ, ເມືອງໄກສອນພົມວິຫານ, ແຂວງສະຫວັນນະເຂດໄດ້ຮັບສາລະພາບວ່າ: ໄດ້ລົງມືຄາດຕະກຳພຣະອາຈານບົວເງິນ ນະເວີນໄຊ ດ້ວຍວິທີການໃຊ້ຕັ່ງຕີເຂົ້າຫົວຈຳນວນ 3-4 ຈຸດ ແລະ ຕາມຕົນຕົວຈຳນວນ 6 ຈຸດ. ຈາກນັ້ນ ຈຶ່ງໄດ້ຄົ້ນເອົາຊັບສິນທີ່ມີຄ່າຢູ່ໃນຫ້ອງແລ້ວເອົາຕົວຫຼົບໜີ.
ຕໍ່ກັບເຫດການທີ່ເກີດຂຶ້ນໃນຄັ້ງນີ້, ເຈົ້າໜ້າທີ່ຢັງຢືນວ່າ: ຜູ້ກໍ່ເຫດໃນຄັ້ງນີ້ແມ່ນທ້າວ ເກດສະໜາ ຫຼືແລັກ ຍ້ອນເວລາຈັບກຸມ ແມ່ນໄດ້ພົບເຫັນຊອງບຸນຜ້າປ່າ ທີ່ພໍ່ແມ່ປະຊາຊົນໄດ້ສົ່ງໃຫ້ພຣະອາຈານ ບົວເງິນ ຢູ່ຫ້ອງເຊົ່າ(ໂຮງແຮມສະກາຍໄລ້) ທີ່ທ້າວເກດສະໜາ ຫຼືແລັກ ພັກຢູ່.
ພຣະອາຈານ ບົວເງິນ ນະເວີນໄຊ (ຍາບົວ) ກໍ່ແມ່ນພຣະອົງໜຶ່ງ ທີ່ມີບົດບົດສຳຄັນຕໍ່ ຊາວພຸດທັງພາຍໃນ ແລະຕ່າງປະເທດ ປະຈຸບັນມີອາຍຸ 59 ປີ, ໄດ້ 30 ກວ່າພັນສາ ຊຶ່ງເປັນພຣະທີ່ນັບຖືວິໄນສົງຢ່າງເຂັ້ມງວດ ທັງເປັນຜູ້ກວ້າງຂວາງທາງສົງ ແລະທາງຄາຣະວາດ