ຈັບຜູ້ຖືກຫາຫຼາຍຄະດີ ທັງມີດ ທັງປືນ ພ້ອມເຄື່ອນໄຫວຄ້າຂາຍຢາເສບຕິດ

       ປກສ ແຂວງບໍລິຄໍາໄຊ ໄດ້ລົງມ້າງຄະດີຄ້າຂາຍຢາເສບຕິດຢູ່ບ້ານ ທ່າບົກ ເມືອງທ່າພະບາດ ໃນອາທິດຜ່ານມາ, ສາມາດກັກຕົວຜູ້ຖືກຫາ2 ຄົນ ພ້ອມຂອງກາງຢາບ້າ243 ເມັດ, ປືນແກັບ 2 ກະບອກ, ປືນປາກກາ ຍິງລູກແວັງ 2 ກະບອກ, ລູກປືນແວັງ 15 ລູກ, ລູກປືນ AK 7ລູກ, ໂທລະສັບ 10 ເຄື່ອງ,ເງິນ1.300.000 ກີບ. 16.980 ບາດ, 9 ໂດລາ, ແຫວນທອງແດງ 2 ວົງ.

        ເຈົ້າໜ້າທີ່ຕຳຫຼວດ ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງບໍລິຄໍາໄຊ ໃຫ້ຮູ້ວ່າ:ໃນເດືອນ ຕຸລາ 2016ໄດ້ຮັບລາຍງານຈາກພົນລະເມືອງດີວ່າ ມີກຸ່ມ ຄົນຈໍານວນໜຶ່ງເຄື່ອນໄຫວຄ້າ-ຂາຍຢາເສບຕິດຢູ່ພາຍໃນບ້ານທ່າບົກ ເມືອງທ່າພະບາດ ຈຶ່ງໄດ້ນໍາໃຊ້ວິຊາສະເພາະລົງຕິດຕາມກວດກາເປົ້າໝາຍ.

        ມາຮອດວັນທີ 10 ມັງກອນ 2017 ກໍສືບຮູ້ວ່າເປົ້າໝາຍມີການເຄື່ອນໄຫວແທ້ ຈຶ່ງໄດ້ທໍາການເຂົ້າກວດຄົ້ນເຮືອນຂອງເປົ້າໝາຍຊື່ທ້າວ ທົງໄຊ ອາຍຸ 25 ປີ ແລະ ທ້າວ ສອນໄຊ ອາຍຸ 33 ປີ ທັງສອງຢູ່ບ້ານທ່າບົກ ເມືອງທ່າພະບາດ, ແຂວງບໍລິຄໍາໄຊ ພົບຢາບ້າ ຈຳນວນ 243 ເມັດ, ປືນແກັບ 2 ກະບອກ, ປືນປາກກາ (ປະດິດ) ຍິງລູກແວັງ 2 ກະບອກ, ລູກປືນແວັງ 15 ລູກ, ລູກປືນອາກາ 7 ລູກ, ໂທລະສັບ 10 ເຄື່ອງ, ເງິນ ຈໍານວນ 1.300.000 ກີບ, ເງິນບາດ ຈໍານວນ 16.980 ບາດ, ເງິນໂດລາ 9 ໂດລາ,ແຫວນທອງແດງ 2 ວົງ. ຈຶ່ງໄດ້ນໍາຕົວມາສອບສວນຂະຫຍາຍຜົນ.

       ທ້າວ ທົງໄຊ ສາລະພາບວ່າ: ໄດ້ເລີ່ມເຄື່ອນໄຫວຄ້າຂາຍຢາບ້າແຕ່ປີ 2016 ເປັນຕົ້ນມາ, ຢາບ້າທີ່ເອົາມາຂາຍແຕ່ລະຄັ້ງແມ່ນຊື້ນໍາຊາຍບໍ່ຮູ້ຊື່ ຈໍານວນ 15 ຄັ້ງ, ຊື້ຄັ້ງລະ 1 ຖົງເທົ່າກັບ 200 ເມັດ; ພາຍຫຼັງໄດຢ້າບ້າມາແລ້ວກໍນຳໄປຂາຍໃຫ້ ໄວລຸ້ນພາຍໃນເທດສະບານເມືອງທ່າພະບາດ. ນອກຈາກນີ້, ຍັງໄດ້ຊື້ຢາບ້າຢູ່ບ້ານ ຜາໂປງ ເມືອງທ່າພະບາດ ແຂວງບໍລິຄໍາໄຊ ຈໍານວນ 10 ຄັ້ງ, ຄັ້ງລະ 1 ຖົງ ແລ້ວກໍນຳໄປຂາຍໃຫໄ້ວລຸ້ນພາຍໃນບ້ານທ່າບົກ ຈໍານວນ 7 ຄັ້ງ, ຄັ້ງລະ 5-20 ເມັດ ແລະ ຂາຍໃຫ້ກັບທ້າວ ສອນໄຊ ຈຳນວນຫຼາຍຄັ້ງ ( ຈົນບໍ່ຈື່ ).

        ສ່ວນທ້າວ ສອນໄຊ ສາລະພາບວ່າ: ໄດ້ເລີ່ມເສບຢາເສບຕິດມາແຕ່ປີ 2016 ຢາບ້າທີ່ນໍາມາເສບແມ່ນຊື້ນໍາທ້າວ ທົງໄຊ, ເສບມື້ລະ 2-3 ເມັດ. ມາຮອດເດືອນສິງຫາ 2016 ກໍເລີ່ມຮັບຢາບ້ານໍາທ້າວ ທົງໄຊ ໄປຂາຍຕໍ່ ໂດຍຮັບເອົາຄັ້ງລະ 50 ເມັດ ພາຍຫຼັງໄດ້ຢາເສບຕິດມາແລ້ວ ກໍນໍາໄປຂາຍໃຫ້ກັບໄວລຸ້ນພາຍໃນບ້ານ ແລະ ບ້ານໃກ້ຄຽງ. ມາວັນທີ 10 ມັງກອນ 2016 ຜູ້ກ່ຽວໄດ້ໄປເຮືອນຂອງທ້າວ ທົງໄຊເພື່ອຈະໄປຮັບເອົາຢາເສບຕິດໄປຂາຍຕໍ່; ໃນເວລານັ້ນ, ໄດ້ມີເຈົ້າໜ້າທີ່ ປກສ ເຂົ້າກັກຕົວໄປດໍາເນີນຄະດີ.

         ຈາກການສະຫຼຸບສໍານວນຄະດີໃນເບື້ອງຕົ້ນ, ເຈົ້າໜ້າທີ່ເຫັນວ່າ: ທ້າວ ທົງໄຊ ແລະ ທ້າວ ສອນໄຊ ໄດ້ມີເຈດຕະນາເຄື່ອນໄຫວຄ້າຂາຍເສບຢາເສບຕິດ ແລະ ມີອາວຸດໄວ້ໃນຄອບຄອງ ທີ່ຜິດກັບລະບຽບກົດໝາຍອາຍາແຫ່ງ ສປປ ລາວ ໄດ້ລະບຸໄວ້. ດັ່ງນັ້ນ, ຈຶ່ງກັກຕົວໄວ້ເພື່ອດໍາເນີນຄະດີຕາມຂັ້ນຕອນຂອງກົດໝາຍ.

ແຫຼ່ງຂ່າວ: ໜັງສືພິມຄວາມສະຫງົບ LSecurity News