ຈະອອກແບບ ແລະ ພັດທະນາເທດສະບານແຂວງຊຽງຂວາງໃຫ້ທັນສະໄໝ

ຊຽງຂວາງກຳລັງວາງແຜນໃໝ່ເພື່ອພັດທະນາເທດສະບານແຂວງໃຫ້ມີຄວາມທັນສະໄໝໂດຍສະເພາະເຂດພັດທະນາເສດຖະກິດຢູ່ໂພນສະຫວັນໃຫ້ມີການເຊື່ອມຈອດກົມກືນກັນໃນດ້ານແຜນຜັງ ແລະຮູບການກໍ່ສ້າງຕ່າງໆ.

ແຫຼ່ງຂ່າວຈາກແຂວງຊຽງຂວາງລາຍງານວ່າ: ໃນຕອນເຊົ້າວັນທີ 3 ກໍລະກົດ 2017 ນີ້ ຢູ່ທີ່ຫ້ອງວ່າການປົກ ຄອງແຂວງ ທ່ານ ຫວາງ ລຸ່ຍ ຢູ ປະທານບໍລິສັດຢຸນນານໂຮບລ່ອງກຼຸບຈຳກັດ ພ້ອມດ້ວຍ ຄະນະ ໄດ້ເຂົ້າພົບປະແລກປ່ຽນຄວາມຄິດເຫັນກັບທ່ານ ສີວອນ ອ່ອນລາວົງ ຫົວໜ້າພະແນກການຕ່າງປະເທດແຂວງຊຽງຂວາງ ພ້ອມດ້ວຍພາກສ່ວນທີ່ກ່ຽວຂ້ອງ ເນື້ອໃນຂອງການປຶກສາຫາລືແມ່ນເນັ້ນໜັກໃສ່ການຈັດສັນ ອອກແບບຕົວເມືອງແປກ ໂດຍສະເພາະອອກແບບອ່າງນ້ຳກັດໃຫ້ເຊື່ອມໂຍງກັບອ່າງນ້ຳຫງຳ, ໜອງນ້ຳ, ຕະຫຼາດ, ສວນພູຄຳ ແລະສະໜາມບິນທົ່ງໄຫຫີນ ເພາະເຂດນີ້ເປັນເຂດສູນລວມເສດຖະກິດຂອງແຂວງ ເພື່ອສ້າງເປັນແຫຼ່ງທ່ອງທ່ຽວ, ສະຖານທີ່ພັກຜ່ອນ ການບໍລິການ ເຮັດໃຫ້ຕົວເມືອງມີຄວາມໂດດເດັ່ນອາກາດດີເປັນຈຸດດຶງດູດ ນັກລົງທຶນຈາກຕ່າງປະເທດເຂົ້າມາແຂວງຊຽງຂວາງໃຫ້ຫຼາຍຂຶ້ນ.

ໂຄງການນີ້ຕາມເນື້ອໃນຈິດໃຈຂອງແຂວງແມ່ນຢາກໃຫ້ກໍ່ສ້າງໄວ ເພື່ອຕ້ອນຮັບງານມະຫາກຳກິລາແຫ່ງຊາດຄັ້ງທີ 11 ທີ່ແຂວງຊຽງຂວາງເປັນເຈົ້າພາບໃນປີ 2018 ແລະ ເປັນການຕ້ອນຮັບການປະກາດທົ່ງໄຫຫີນເປັນມໍລະດົກໂລກໃນປີ 2019.

Cr: ຂ່າວປະຈຳວັນ