ຈະສະເໜີເອົາພູ​ຫີນ​ໜາມ​ໜໍ່ ​ໃຫ້ຈະເຂົ້າ​ບັນຊີ​ມໍລະດົກ​ໂລກໃນໄວໆນີ້

ປັດຈຸບັນເຈົ້າໜ້າທີ່ກ່ຽວຂ້ອງຂອງ ສປປ ລາວ ພວມເລັ່ງຄົ້ນຄວ້າ ກະກຽມເອກະສານທີ່ຈຳເປັນເພື່ອສົ່ງໃຫ້ອົງການອຸຍແນັສໂກພິຈາລະນາຮັບເອົາປ່າສະຫງວນພູຫີນໜາມໜໍ່ ເຂົ້າບັນຊີຂອງມໍລະດົກໂລກທາງທຳມະຊາດ ໂດຍມີການປະຊຸມຄັ້ງຫຼ້າສຸດເມື່ອວັນທີ 11 ພືດສະພາ 2017 ທີ່ຜ່ານມາ ຢູ່ແຂວງຄຳມ່ວນ.

      ເນື້ອໃນການປະຊຸມກໍເພື່ອປຶກສາຫາລືກ່ຽວກັບການປະກອບເອກະສານ ເຮັດ​ໃຫ້​ຂັ້ນ​ຕອນ​ຂອງ​ການສະ​ເໜີ​ເອົາປ່າ​ສະຫງວນ​ແຫ່ງ​ຊາດພູ​ຫີນ​ໜາມ​ໜໍ່​ເຂົ້າ​ເປັນ​ມໍລະດົກ​ໂລກ​ໄດ້​ຖືກ​ຈັດ​ຕັ້ງ​ປະຕິບັດ​ຢ່າງ​ເປັນ​ຮູບ​ປະ​ທໍາ ​ແລະ ມີຜົນ​ສໍາ​ເລັດ​ຕາມ​ລະດັບ​ຄາດໝາຍ​ທີ່​ວາງ​ໄວ້ ທັງນີ້ ກົມ​ມໍລະດົກ ກະຊວງຖະແຫຼງຂ່າວ ວັດທະນະທຳ ແລະທ່ອງທ່ຽວ (ຖວທ) ​ໂດຍຮ່ວມ​ກັບພະ​ແນ​ກ ຖວທ ​ແຂວງ​ຄໍາ​ມ່ວນ ​ ພາຍໃຕ້​ການ​ເປັນ​ປະທານ​ຮ່ວມຂອງ ທ່ານ ທອງ​ໃບ ​ໂພທິ​ສານ ຫົວໜ້າ​ກົມ​ມໍລະດົກ ​ແລະ ທ່ານ ບົວຜັນ ພັນທະ​ວົງ ຮອງ​ຫົວໜ້າ​ກົມ​ປ່າ​ໄມ້ ກະຊວງ​ກະສິກໍາ ແລະປ່າ​ໄມ້ ມີ​ຕາງ​ໜ້າອຳນາດການປົກຄອງທ້ອງຖິ່ນ ແລະ ພະນັກງານ ວິຊາການທີ່ກ່ຽວຂ້ອງ ​ພ້ອມດ້ວຍຊ່ຽວຊານ​ຈາກ​ອົງການ​ອຸຍ​ແນັ​ສ​ໂກກໍໄດ້ເຂົ້າ​ຮ່ວມ.

      ກອງປະຊຸມໄດ້ພ້ອມກັນ​ຄົ້ນຄວ້າ ປຶກສາ​ຫາລື​ກ່ຽວ​ກັບ​ຄວາມ​ຮັບຜິດຊອບ​ຂອງ​ແຕ່​ລະ​ພາກສ່ວນ​ໃນ​ການຈັດ​ຕັ້ງ​ປະຕິບັດ​ແຜນ​ງານ​ກະກຽມ​ຄໍາ​ຮ້ອງ​ເພື່ອ​ສະ​ເໜີ​ເອົາ​ປ່າ​ສະຫງວນ​ແຫ່ງ​ຊາດ​ພູ​ຫີນ​ໜາມ​ໜໍ່ ​ເມືອງ​ບົວລະພາ​ ແຂວງຄໍາມ່ວນ ເຂົ້າ​ໃນ​ບັນຊີ​ມໍລະດົກ​ໂລກ​ທາງ​ດ້ານ​ທໍາ​ມະ​ຊາດ​ຂອງ​ອົງການ​ອຸຍ​ແນ​ສ​ໂກ ເນື້ອ​ໃນ​ເອກະສານ​ທີ່​ນໍາ​ມາ​ຄົ້ນຄວ້າ​ປຶກສາ​ຫາລື​ປະກອບ​ມີ​ຂັ້ນ​ຕອນ​ການ​ກະກຽມ​ຄໍາ​ຮ້ອງ​ຂໍ​ເປັນ​ມໍລະດົກ​ໂລກ​ຂອງ​ອົງການ​ອຸຍ​ແນ​ສ​ໂກ ບັນດາ​ຄວາມ​ພ້ອມ  ຮ່າງ​ແຜນ​ງານ ການຈັດ​ແບ່ງ​ຄວາມ​ຮັບຜິດຊອບ ວຽກ​ງານ​ຕົ້ນຕໍ ​ແລະ ງົບປະມານ ຮ່າງ​ການ​ກໍ່​ຕັ້ງ​ໜ່ວຍ​ງານ ​ແລະ ກໍານົດ​ພາລະ​ໜ້າທີ່​ຄວາມ​ຮັບຜິດຊອບ​ໃນ​ການຈັດ​ຕັ້ງ​ປະຕິບັດ​ວຽກ​ງານ​ໂຕ​ຈິງ​ຂອງ​ແຕ່​ລະ​ພາກສ່ວນແຕ່​ສູນ​ກາງລົງເຖິງທ້ອງ​ຖິ່ນ.

Cr: http://www.abclaosnews.com