ງູໃຫຍ່ເລັງດຶງແວຣັດຕິຈາກເປເອັດເຊ

 

ມາໂກ ແວຣັດຕິ ມິດຟິວຂອງ ເປເອັດເຊ ຕົກເປັນເປົ້າໝາຍໃນການເສີມທັບຂອງ ອິນເຕີ ມິລານ ຫຼັງຈາກທີ່ ງູໃຫຍ່ ຫວັງສວຍໂອກາດທີ່ນັກເຕະມີບັນຫາໂຕ້ຖຽງກັບ ອູໄນ ເອເມຣີ ນາຍໃຫຍ່ຂອງ ເປເອັດເຊ ເມື່ອທ້າຍອາທິດທີ່ຜ່ານມາ.

 

ອິນເຕີ ມິລານ ສະໂມສອນຍັກໃຫຍ່ຂອງ ກັນໂຊ ຊີຣີ ອາ ກຳລັງໃຫ້ຄວາມສົນໃຈ ມາໂກ ແວຣັດຕິ ກອງກາງຂອງ ປາຣີ ແຊັງ-ແຊັກແມັງ ມາເສີມທັບໃຫ້ໄດ້ ຈາກລາຍງານຂອງ ຕຸດໂຕ້ສະປອດ ສື່ດັງເມືອງກະໂລນີເມື່ອວັນພຸດທີ່ຜ່ານມາ.

 

ນັກເຕະອາຍຸ 23 ປີຖືກຈັບພາບໄດ້ວ່າມີບັນຫາໂຕ້ຖຽງກັບ ອູໄນ ເອເມຣີ ນາຍໃຫຍ່ ເປເອັດເຊ ຢ່າງຮຸນແຮງເນື່ອງຈາກວ່າບໍ່ພໍໃຈກັບການຖືກປ່ຽນໂຕອອກໃນເກມລີກທີ່ສະເໝີກັບ ໂອລິມປິກ ມາກແຊ 0-0 ເມື່ອວັນອາທິດທີ່ຜ່ານມາເຊິ່ງທາງນາຍໜ້າຂອງ ແວຣັດຕິ ຢືນຢັນວ່ານັກເຕະບໍ່ຍ້າຍອອກຈາກທີມນີ້ແນ່ນອນ.

 

ຢ່າງໃດກໍຕາມຈາກການທີ່ເຂົາໄດ້ເປັນຕົວຈິງໃນລີກລະດູການນີ້ໄປພຽງ 5 ເກມເຮັດໃຫ້ຈອມທັບທີມຊາດອີຕາລີອາດຈະຢາກເບິ່ງຫາຕົ້ນສັງກັດໃໝ່ກໍເປັນໄດ້ໂດຍນອກຈາກ ງູໃຫຍ່ ແລ້ວກໍຍັງມີ ຢູເວັນຕຸດ ທີ່ໃຫ້ຄວາມສົນໃຈ ແລະ ມີຂ່າວວ່າ ແວຣັດຕິ ຕ້ອງການຄ່າເມື່ອຍປະມານ 6 ລ້ານເອີໂຣຕໍ່ລະດູການ.

 

ບົດຄວາມໃຫມ່ໆ