ງານແຂ່ງຂັນເຕັ້ນຊຸມຊົນໄວໜຸ່ມ ທີ່ຮັກໃນການເຕັ້ນ ຄັ້ງທີ 3 ຈະຈັດຂື້ນຢູ່ນະຄອນຫຼວງວຽງຈັນ

ວັນທີ 1 ກັນຍານີ້, ທີ່ສະມາຄົມນັກຂ່່າວລາວ, ບໍລິສັດຟັງລາວ ຮ່ວມກັບບໍລິສັດ Hoppin ໄດ້ຈັດພິທີຖະແຫຼງຂ່າວ ງານແຂ່ງຂັນຊຸມຊົນໄວໜຸ່ມ ທີ່ຮັກໃນການເຕັ້ນ ຄັ້ງທີ 3 ໃນຫົວຂໍ້ວ່າ: The Show Case ເຊິ່ງຈະຈັດຂື້ນລະຫວ່າງວັນທີ 11-12 ກັນຍານີ້, ທີ່ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ, ມີທ່ານ ອຸ່ນຫຼ້າ ຜາອຸດົມ ນັກເຕັ້ນ ກາກາ ຜູ້ຮັບຜິດຊອບຈັດງານແຂ່ງຂັນຊຸມຊົນໄວໜຸ່ມ ທີ່ຮັກໃນການເຕັ້ນຄັ້ງທີ 3, ທ່ານ ສົມສະນຸກ ມີໄຊ ຮອງປະທານສະມາຄົມນັກຂ່າວລາວ, ທ່ານ ນາງ ນຸດນະພາ ຕາງໜ້າບໍລິສັດຟັງລາວ, ທ່ານ ຕຸລາ ຕົວແທນກອງທຶນປະເທດສະວິດເຊີແລນປະຈໍາລາວ ມີບັນດານັກເຕັ້ນ 12 ທີມ ຈາກທົ່ວປະເທດ ແລະ ສື່ມວນຊົນທຸກພາກສ່ວນເຂົ້າຮ່ວມ.
ການແຂ່ງຂັນຄັ້ງນີ້, ໄດ້ຄັດເລືອກເອົາ 12 ທີມ. ໃນນັ້ນ, ຈາກນະຄອນຫຼວງວຽງຈັນ 10 ທີມ, , ຕົວແທນຈາກພາກເໜືອ 1 ທີມ ແລະ ພາກໄຕ້ 1 ທີມ, ເພື່ອເຂົ້າໄປແຂ່ງຂັນໃນຮອບສຸດທ້າຍ ທີ່ຈະຈັດຂື້ນວັນທີ 12 ກັນຍາ 2015. ສ່ວນທີ 11 ກັນຍາ ຈະເປີດໃຫ້ມວນຊົນເຂົ້າຊົມໂດຍບໍ່ໄດ້ເສຍຄ່າ, ໃນງານຈະມີກາສະແດງນັກຮຽນເຕັ້ນຈາກບໍລິສັດຟັງລາວ, ການສະແດງເຕັ້ນທີ່ເຂົ້າຮ່ວມໂຄງການສ້າງນັກເຕັ້ນໃຫ້ເປັນມືອາຊີບ, ການແຂ່ງຂັນເຕັ້ນບີບອຍ 3 ຕໍ່ 3. ສ່ວນວັນທີ 12 ກັນຍາ 2015 ເລີ່ມແຕ່ 15 ໂມງ ເປັນຕົ້ນໄປຈະມີການແຂ່ງຂັນເຕັ້ນ 12 ທີມຈາກ 5 ແຂວງ ທີ່ຄັດເລືອກຈາກທົ່ວປະເທດ ເພື່ອຂັດ ທີມນັກເຕັ້ນທີ່ເດັ່ນທີ່ສຸດ ສໍາລັບທີມຊະນະເລີດຈະໄດ້ຮັບລາງວັນ 15,000,000 ກີບ. ສ່ວນຜູ້ເຂົ້າຊົມຈະໄດ້ເສຍຄ່າຜ່ານປະຕູ 28,000 ກີບຕໍ່ຄົນ ).


ໃນພິທີ, ທ່ານ ອຸ່ນຫຼ້າ ຜາອຸດົມ ນັກເຕັ້ນ ກາກາ ຜູ້ຮັບຜິດຊອບຈັດການແຂ່ງຂັນຊຸມຊົນໄວໜຸ່ມ ທີ່ຮັກໃນການເຕັ້ນຄັ້ງທີ 3 ກ່າວວ່າ: ຈຸດປະສົງຂອງການຈັດງານຄັ້ງນີ້, ເພື່ອເປັນການສົ່ງເສີມໄວໜຸ່ມກ້າສະແດງຄວາມສາມາດສູ່ສາຍຕາສັງຄົມລາວ, ໃຊ້ເວລາຫວ່າງໃຫ້ເປັນປະໂຫຍດ ແລະ ຫຼີກລ້ຽງຈາກສິ່ງເສບຕິດຕ່າງໆ, ໃຫ້ໄວໜຸ່ມລາວໄດ້ພັດທະນາວົງການເຕັ້ນຂອງລາວ ໃຫ້ທຽບເທົ່າສາກົນ ແລະ ເປັນການສົ່ງເສີມການບັນເທີງໃຫ້ມີສີສັນເພີ່ມຂື້ນ. ນອກຈາກນັ້ນ, ພາຍໃນງານຍັງຈະເປີດຮັບບໍລິຈາກເຄື່ອງນຸ່ງຫົ່ມຕ້ານໄພໜາວ, ອຸປະກອນການຮຽນ, ການສຶກສາ ແລະ ກີລາ ເພື່ອບໍລິຈາກໃຫ້ໂຮງຮຽນມໍຕົ້ນເຂດຊົນນະບົດ ແຂວງວຽງຈັນ.

ທີ່ມາ CRI-FM93