ງານວາງສະແດງສິນຄ້າ ວຽງຈັນ 2015 ຈະຈັດຂຶ້ນຢູ່ທີ່ສູນການຄ້າໄອເຕັກມໍຊັ້ນ 7

ໃນຕອນບ່າຍວັນທີ 18 ພະຈິກ 2015 ນີ້, ທີ່ສະມາຄົມນັກຂ່າວລາວ ນະຄອນຫຼວງວຽງຈັນ ກະຊວງອຸດສາຫະກຳ ແລະ ການຄ້າ ໄດ້ຈັດພິທີຖະແຫຼງຂ່າວການກະກຽມຈັດ ງານວາງສະແດງສິນຄ້າ ວຽງຈັນ 2015 ຊຶ່ງຈະຈັດຂຶ້ນຢູ່ທີ່ສູນການຄ້າໄອເຕັກມໍຊັ້ນ 7, ຈະຈັດຂຶ້ນແຕ່ວັນທີ 28 ພະຈິກ - 7 ທັນວາ 2015 ນີ້. ເພື່ອໃຫ້ຜູ້ປະກອບການ ແລະ ຫົວໜ່ວຍທຸລະກິດ ທັງພາຍໃນ ແລະ ຕ່າງປະເທດ ໄດ້ນຳເອົາຜະລິດຕະພັນຂອງຕົນມາວາງສະແດງ ແລະຂາຍ, ເພື່ອເປັນການຕ້ອນຮັບ ສປປ ລາວ ຄົບຮອບ 40 ປີ. ໂດຍມີຜູ້ຕາງໜ້າຈາກສະມາຄົມນັກຂ່າວ ແຫ່ ສປປ ລາວ, ຕາງໜ້າຈາກ ສະພາການຄ້າ ແລະ ອຸດສາຫະກຳແຫ່ງຊາດລາວ.

ທ່ານ ສົມຈິດ ອິນທະມິດ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ກ່າວວ່າ: ງານວາງສະແດງສິນຄ້າ ວຽງຈັນ 2015 (Vientiane Expo 2015) ເປັນງານສະແດງສິນຄ້າລະດັບພາກພື້ນ ແລະ ສາກົນ ຈຸດປະສົງຫຼັກແມ່ນເພື່ອເປັນການສະຫຼອງການສະຖາປະນາ ສປປ ລາວ ຄົບຮອບ 40 ປີ. ພ້ອມທັງເປັນການເປີດໂອກາດໃຫ້ແກ່ຫົວໜ່ວຍທຸລະກິດ ຫຼື ອົງການຈັດຕັ້ງທັງພາຍໃນ ແລະ ຕ່າງປະເທດໄດ້ວາງສະແດງ ແລະ ໂຄສະນາຜະລິດຕະພັນຂອງຕົນເອງ ແລະ ຂາຍໃຫ້ແກ່ແຂກທີ່ເຂົ້າມາຮ່ວມຊົມ ດັ່ງນັ້ນ ເພື່ອເຮັດໃຫ້ການວາງສະແດງ ມີບັນຍາກາດຟົດຟື້ນ ແລະ ສິນຄ້າປະເພດຕ່າງໆມາວາງສະແດງເປັນຈຳນວນຫຼວງຫຼາຍ ຄະນະຈັດງານໄດ້ສົມທົບກັບພາກສ່ວນກ່ຽວຂ້ອງ ຈະໄດ້ສົ່ງຈົດໝາຍເຊື້ອເຊີນເຖິງຫົວໜ່ວຍທຸລະກິດ ແລະ ອົງການຈັດຕັ້ງພາຍໃນ ແລະ ຕ່າງປະເທດ ເພື່ອເຂົ້າຮ່ວມງານວາງສະແດງສິນຄ້າໃນຄັ້ງນີ້.ປັດຈຸບັນມີຜູ້ສະໝັກເຂົ້າມາຮ່ວມງານທັງໝົດຫຼາຍກວ່າ 360 ຫ້ອງ ເຊິ່ງມາຈາກພາກສ່ວນພາຍໃນປະເທດຫຼາຍກວ່າ 300 ຫ້ອງ ແລະ ຕ່າງປະເທດ ຈຳນວນ 60 ຫ້ອງ. ທີ່ສຳຄັນໃນງານດັ່ງກ່າວ ຈະມີຫ້ອງວາງສະແດງພິເສດ ເພື່ອວາງສະແດງ ແລະ ນຳສະເໜີຜະລິດຕະພັນນີ້ເປັນທ່າແຮງ ແລະ ໂດດເດັ່ນ ຈາກທົ່ວປະເທດລາວ ທີ່ສະແດງໃຫ້ເຫັນເຖິງການພັດທະນາກ່ອນປີ 1975 ແລະ ຫຼັງປີ 1975. ຕະຫຼອດໄລຍະ 40 ປີຜ່າມມາ. ນອກຈາກນີ້ຍັງມີກິດຈະກຳສາທິດການຜະລິດສິນຄ້າທີ່ເປັນເອກະລັກຂອງລາວເຊັ່ນ: ຕໍ່າຫູກ, ສາວໄໝ, ການຈັກສານ, ແກະສະຫຼັກ ແລະ ອື່ນໆ.
ງານວາງສະແດງສິນຄ້າ ວຽງຈັນ 2015 ຈະໄດ້ຈັດຂື້ນແຕ່ວັນທີ 28 ພະຈິກ - 7 ທັນວາ 2015 ນີ້ ທີ່ສູນການຄ້າໄອເຕັກມໍຫຼັງໃໝ່.