ງານວາງສະແດງສິນຄ້າລາວ – ຫວຽດເລີ່ມ 29 ມິຖຸນານີ້

 

ງານວາງສະແດງສິນຄ້າລາວ – ຫວຽດນາມ 2017 ຈະຈັດຂຶ້ນແບບພິເສດກວ່າທຸກປີທີ່ຜ່ານມາ ແລະ ຄາດວ່າຈະມີຫົວໜ່ວຍທຸລະກິດເຂົ້າຮ່ວມ 320 ກວ່າຮ້ານ ຈາກທັງສອງປະເທດ.

ທ່ານ ສົມຫວັງ ນິນທະວົງ ກ່າວວ່າ: ງານວາງສະແດງສິນຄ້າລາວ – ຫວຽດນາມ 2017 ນີ້ ຈະເປັນງານທີ່ພິເສດກວ່າປີຜ່ານມາຢ່າງແນ່ນອນ ເນື່ອງຈາກເປັນງານທີ່ຈັດຂຶ້ນເພື່ອສະເຫຼີມສະຫຼອງ 2 ວັນປະຫວັດສາດລາວ – ຫວຽດນາມ ຄື: 1). ວັນສະເຫຼີມສະຫຼອງຄົບຮອບ 40 ປີ ແຫ່ງການເຊັນສົນທິສັນ ຍາມິດຕະພາບ ແລະ ການຮ່ວມມື, 2). ສະເຫຼີມສະຫຼອງຄົບຮອບ 55 ປີ ແຫ່ງການສ້າງຕັ້ງສາຍພົວພັນການທູດລາວ – ຫວຽດນາມ ໂດຍມີກະຊວງປ້ອງກັນປະເທດຂອງທັງສອງຝ່າຍເຂົ້າຮ່ວມ ແລະ ຈະນຳເອົາສິນຄ້າທີ່ກອງທັບຜະລິດໄດ້ນຳມາວາງສະແດງ ແລະ ຈຳໜ່າຍ ພ້ອມທັງພາຍໃນງານມີຫ້ອງວາງສະ ແດງສິນຄ້າເຖິງ 320 ຫ້ອງ ຄາດວ່າສິນຄ້າ ສປປ ລາວ ຈະມີເຖິງ 200 ຫ້ອງ ແລະ ຈາກ ສສ ຫວຽດນາມ 120 ຫ້ອງ.

ທ່ານ ພົນໂທ ຫງວຽນ ແທ໋ງ ເຊີນ ຕາງໜ້າກົມເສດຖະກິດ, ກະຊວງປ້ອງກັນປະເທດແຫ່ງ ສສ ຫວຽດນາມ ກ່າວວ່າ: ໃນງານຄັ້ງນີ້ຈະມີບໍລິສັດຈາກ ສສ ຫວຽດນາມ ເຂົ້າຮ່ວມກວ່າ 120 ຫົວໜ່ວຍ ທີ່ມາຈາກບັນດາແຂວງພາກເໜືອ, ພາກກາງ ແລະ ພາກໃຕ້ ເຊິ່ງຈະນຳເອົາບັນດາສິນຄ້າເຄື່ອງອຸປະໂພກ, ບໍລິໂພກ ເຊັ່ນ: ສິນຄ້າກະເສດ, ສິນຄ້າອຸດສາຫະກຳ ແລະ ການທ່ອງທ່ຽວ ທີ່ເປັນທ່າແຮງຂອງແຕ່ລະພາກເຂົ້າຮ່ວມ ໂດຍຫວັງຢ່າງຍິ່ງວ່າງານດັ່ງກ່າວຈະເປີດກວ້າງໃຫ້ທັງຜູ້ປະກອບການທັງ ສປປ ລາວ ແລະ ທັງ ຫວຽດນາມ ໄດ້ຊອກເຫັນເຖິງທ່າແຮງຂອງສິນຄ້າຂອງກັນ ແລະ ກັນ ເພື່ອໃຫ້ເກີດການຕໍ່ຍອດດ້ານການຮ່ວມມື ນຳເຂົ້າສິນຄ້າຂອງກັນ ແລະ ກັນ ນັ້ນໄປຈຳໜ່າຍລະຫວ່າງປະເທດ ຫຼື ຈຳໜ່າຍບັນດາປະເທດອາຊຽນ.

ດັ່ງນັ້ນ, ຈຶ່ງຂໍເຊີນຊວນບັນດາຜູ້ປະກອບການ ຈົ່ງເຂົ້າຮ່ວມງານວາງສະແດງສິນຄ້າລາວ – ຫວຽດນາມ 2017 ທີ່ຈະຈັດຂຶ້ນໃນລະຫວ່າງວັນທີ 29 ມິຖຸນາ ຫາ ວັນທີ 3 ກໍລະກົດ 2017 ທີ່ສູນການຄ້າລາວ – ໄອເຕັກ, ນະຄອນຫຼວງວຽງຈັນ ແລະ ເພື່ອເປັນການສ້າງຂະບວນການສະເຫຼີມສະຫຼອງ 2 ວັນປະຫວັດສາດ ລະຫວ່າງລາວ – ຫວຽດນາມ ໃຫ້ມີຄວາມພົ້ນເດັ່ນ. ພິທີຖະແຫຼງຂ່າວມີຂຶ້ນໃນວັນທີ 22 ມິຖຸນາ 2017, ທີ່ສະມາຄົມນັກຂ່າວ, ນະຄອນຫຼວງວຽງຈັນ.

Cr: https://laoedaily.com.la