ງານວາງສະແດງຜົນສຳເລັດການພັດທະນາເສດຖະກິດ-ສັງຄົມ ແລະ ສິນຄ້າ ວຽງຈັນ 2015

ໃນຕອນເຊົ້າຂອງວັນທີ 28 ພະຈິກ 2015 ນີ້, ຢູ່ໄອເຕັກມໍ ຊັ້ນ 7 ກະຊວງອຸດສາຫະກຳ ແລະ ການຄ້າ ໄດ້ຈັດງານວາງສະແດງສິນຄ້າວຽງຈັນ 2015 ຂື້ນຢ່າງເປັນທາງການເພື່ອສະຫຼອງວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 40 ປີ ໂດຍເປັນກຽດເຂົ້າຮ່ວມຂອງທ່ານ ທອງສິງ ທໍາມະວົງ ນາຍົກລັດຖະມົນຕີ ລາວ, ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ, ບັນດາລັດຖະມົນຕີວ່າການ, ຊ່ວຍວ່າການ ຈາກບັນດາກະຊວງ, ບັນດາທຸຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳລາວ ພ້ອມດ້ວຍພາກລັດເອກະຊົນເຂົ້າຮ່ວມຢ່າງພ້ອມພຽງ.


ທ່ານນາງ ເຂັມມະນີ ພົນເສນາ ລັດຖະມົນຕີວ່າການ ກະຊວງອຸດສາຫະກຳ ແລະ ການຄ້າ ກ່າວວ່າ: ການໄຂງານວາງສະແດງຄັ້ງນີ້, ມີ 3 ຈຸດປະສົງຄື: ເພື່ອປະກອບສ່ວນເຂົ້າໃນການສະຫຼອງວັນສະຖາປະນາ ສປປ ລາວ ຄົບຮອບ 40 ປີ, ເພື່ອສະທ້ອນໃຫ້ເຫັນຜົນສຳເລັດຂອງການພັດທະນາ ປະເທດຊາດໃນ 40 ປີຜ່ານມາ ພາຍໃຕ້ການນຳພາຂອງພັກປະຊາຊົນປະຕິວັດລາວ ໂດຍສະເພາະແມ່ນວາງສະແດງຜະລິດຕະພັນສິນຄ້າທີ່ໄດ້ກາຍເປັນແຫຼ່ງລາຍຮັບຂອງເສດຖະກິດແຫ່ງຊາດ ແລະ ບັນດາໂຄງການສະໜັບສະໜູນທີ່ປິ່ນອ້ອມ ໂອດ໊ອບ( ODOP ) , ສ້າງໂອກາດໃຫ້ແກ່ພາກທຸລະກິດລາວ ແລະ ຕ່າງປະເທດ ໄດ້ມີການຕິດຕໍ່ພົວພັນແລກປ່ຽນຊື້-ຂາຍ ສິນຄ້າແລກປ່ຽນບົດຮຽນປະສົບການທາງທຸລະກິດນຳກັນ.

ໃນງານວາງສະແດງ ຄັ້ງນີ້, ມີ 209 ຫົວຫນ່ວຍທຸລະກິດທີ່ມາຈາກທັງພາຍໃນ ແລະ ຕ່າງປະເທດ , ຫ້ອງວາງສະແດງ 350 ກວ່າຫ້ອງ,ມາຈາກພາຍໃນປະເທດ 159 ຫົວໜ່ວຍ, ຕ່າງແຂວງ 23 ຫົວໜ່ວຍ ແລະ ສິນຄ້າ ( ODOP) ໜຶ່ງເມືອງໜຶ່ງຜະລິດຕະພັນ ມີ 18 ຫົວໜ່ວຍ, ມາຈາກຕ່າງປະເທດ ແລະ ອົງການຈັດຕັ້ງສາກົນ 50 ຫົວໜ່ວຍ. ປະເພດສິນຄ້າຕົ້ນຕໍທີ່ນຳມາສະແດງໃນຄັ້ງນີ້ແມ່ນ ເຄື່ອງຫັດຖະກຳ, ເສື້ອຜ້າ, ອັນຍະມະນີ, ເຟີນີເຈີ, ເຄື່ອງຕົບແຕ່ງເຮືອນ, ເຄື່ອງສຳອາງ, ຢາປົວພະຍາດ, ອາຫານ, ການບໍລິການທະນາຄານ, ການສຶກສາ, ການທ່ອງທ່ຽວ ແລະ ອື່ນໆ. ງານດັ່ງກ່າວຈະດໍາເນີນໄປ 10 ວັນ ນັບແຕ່ວັນທີ 28 - 7 ທັນວາ 2015.