ງານມະຫາກຳ ສີມືຫັດຖະກຳລາວ ຄັ້ງທີ 14 ຈັດຂຶ້ນລະຫວ່າງວັນທີ 30 ຕຸລາ ຫາທີ 3 ພະຈິກ

ພິທີເປີດງານຫັດຖະກຳສີມືຫັດຖະກຳລາວ ໄດ້ຈັດຂຶ້ນໃນຕອນບ່າຍຂອງວັນສຸກ ທີ 30 ຕຸລາ ທີ່ ສູນການຄ້າລາວ ໄອເຕັກ ໃຫ້ກຽດເປັນປະທານເປີດງານ ໂດຍທ່ານ ບຸນມີ ມະນີວົງ, ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ, ທ່ານ ສີສະຫວາດ ທິຣະວົງ, ປະທານສະພາການຄ້າ ແລະ ອຸດສາຫະກຳແຫ່ງຊາດ, ທ່ານ ຫານຊະນະ ສີສານ, ປະທານ ສະມາຄົມຫັດຖະກຳລາວ, ບັນດາທ່ານ ລັດຖະມົນຕີ, ລັດຖະມົນຕີຊ່ວຍວ່າການ, ບັນດາຫົວໜ້າກົມ, ຮອງກົມກະຊວງຕ່າງໆ, ບັນດາເອກອັກຄະຣັດຖະທູດ, ຜູ້ຕ່າງໜ້າຈາກອົງການຈັດຕັ້ງສາກົນ ປະຈຳ ສປປ ລາວ, ໄດ້ເຂົ້າຮ່ວມພິທີເປີດງານ.
ທ່ານ ຫານຊະນະ ສີສານ, ປະທານສະມາຄົມ ຫັດຖະກຳລາວ ໄດ້ກ່າວວ່າ: ງານມະຫາກຳ ສີມືຫັດຖະກຳລາວ ຖືວ່າເປັນງານປະເພນີຂອງຊາວຊ່າງຫັດຖະກຳລາວ, ເປີດຂຶ້ນທຸກໆປີ ສຳລັບປີນີ້ ເປັນຄັ້ງທີ່ 14 ແລ້ວ. ຈຸດປະສົງຫຼັກຂອງງານຄືເພື່ອສ້າງໂອກາດໃຫ້ຊາວຊ່າງຫັດຖະກຳໃນທົ່ວປະເທດໄດ້ມາພົບປະແລກປ່ຽນບົດຮຽນນຳກັນ, ພ້ອມນີ້ກໍຍັງນຳເອົາຜະລິດຕະພັນຂອງຕົນມາວາງສະແດງ ແລະ ຂາຍເພື່ອເຮັດການຕະຫຼາດຄືການຊອກຫາຄູ່ຄ້າ ຫຼື ຜູ້ຮ່ວມທຶນ, ຮ່ວມທຸລະກິດນຳກັນ. ນອກນີ້ ໃນງານມະຫາກຳ ສີມືຫັດຖະກຳລາວ ຍັງມີກິດຈະກຳສຳມະນາ ໃຫ້ຄວາມຮູ້ແກ່ຊາວຊ່າງຫັດຖະກຳລາວ, ງານສາທິດຜະລິດເຄື່ອງຫັດຖະກຳ, ງານປະກວດ ຜະລິດຕະພັນດີເດັ່ນ ເພື່ອສົ່ງເສີມເຄື່ອງຫັດຖະກຳ ໃຫ້ມີຄວາມຫຼາກຫຼາຍທັງປະລິມານ ແລະ ຄຸນນະພາບ.


ທ່ານ ຫານຊະນະ ສີສານ ຍັງໄດ້ກ່າວອີກວ່າ: ຜົນງານອັນດີເດັ່ນອີກອັນໜຶ່ງຂອງສະມາຄົມຫັດຖະກຳລາວ ກໍ່ຄືການສ້າງຊື່ສຽງໃຫ້ກັບປະເທດຊາດຄື: ໄດ້ນຳເອົາການຕ່ຳຫູກພື້ນເມືອງລາວໄປສາທິດຕ່ຳຫູກໃນງານ Milano Expro 2015 ປະເທດ ອີຕາລີ, ເຮັດໃຫ້ຜູ້ຊົມສົນໃຈ ແລະ ຍ້ອງຍໍຫຼາຍ. ໃນປີນີ້ ສະມາຄົມຫັດຖະກຳລາວ ຍັງໄດ້ຮັບລາງວັນສາກົນນຳອີກຄື: ບໍລິສັດ ການຈະນາ ຜ້າໄໝລາວ, ບໍລິສັດ ປູກມອນ ລ້ຽງມ້ອນ ແລະ ສາວໄໝ, ສູນຫັດຖະກຳ ນິກອນ, ພົມມະຫັດສະຈັນ, ສູນຝຶກອົບຮົມ ວິຊາຊີບຫ້ວຍຫົງ ສຳລັບແມ່ຍິງ ໄດ້ຮັບລາງວັນການອອກແບບຍອດຍ້ຽມ G Mark ຈາກປະເທດຍີ່ປຸ່ນ.
ພາຍໃນງານມະຫະກຳ ສີມືຫັດຖະກຳລາວ ຄັ້ງທີ 14 ນີ້ໄດ້ມີແຕ່ລະຫ່າງຮ້ານ ແລະ ຫົວໜ່ວຍທຸລະກິດຕ່າງໆ ໄດ້ນຳເອົາຜະລິດຕະພັນຂອງຕົນມາວາງສະແດງ ແລະ ຈຳໜ່າຍເພື່ອບໍລິການລູກຄ້າ.
ນອກຈາກນີ້, ສະຖານທູດຈີນ ປະຈຳລາວ ກໍ່ໄດ້ມີສ່ວນຮ່ວມເຂົ້າໃນງານມະຫະກຳໃນຄັ້ງນີ້ ເຊິ່ງຈັດໃຫ້ວິທະຍຸສາກົນແຫ່ງປະເທດຈີນ ປະຈຳລາວ ສູນວັດທະນະທຳຈີນ ປະຈຳລາວ ແລະ ສະຖາບັນຂົງຈື ຂອງມະຫາວິທະຍາໄລ ແຫ່ງຊາດລາວ ນຳເອົາວາລະສານພາເພີນ ສີມືຕັດເຈ້ຍ ແກະສະຫຼັກ, ກາປະທັບ ແລະ ອື່ນໆ ເຊິ່ງໄດ້ຮັບຄວາມນິຍົມຊົມຊອບຂອງແຕ່ລະພາກສ່ວນ, ບັນດານັກທຸລະກິດ ແລະ ຊາວຊ່າງຫັດຖະກຳທຸກທ່ານໃຫ້ກຽດເຂົ້າຮ່ວມ.