ງານມະຫະກໍາບຸນຊ້າງ ໄຊຍະບູລີ ປະຈໍາປີ 2016 ດຶງດູດນັກທ່ອງທ່ຽວ.

ແຂວງໄຊຍະບູລີ ຈັດງານມະຫາກໍາບຸນຊ້າງປະຈໍາປີ ຄັ້ງທີ 10 ເລີ່ມແຕ່ວັນທີ 19-21 ກຸມ ພາ ນີ້ ເພື່ອຊຸກຍູ້ສົ່ງເສີມການທ່ອງທ່ຽວໃຫ້ຮັບຮູ້ຢ່າງກວ້າງຂວາງ ຈາກນັກທ່ອງທ່ຽວພາຍໃນ ແລະ ຕ່າງ ປະເທດ. ພິທີດັ່ງກ່າວ, ໄດ້ຈັດຂຶ້ນຢ່າງເປັນທາງການໃນວັນທີ 20 ກຸມພາ ນີ້ ທີ່ສະໜາມຫລວງໂດຍ ມີ ທ່ານ ອາຊາງ ລາວລີ ຮອງນາຍົກລັດຖະມົນຕີ, ທ່ານ ພົງສະຫວັນ ສິດທະວົງ ເຈົ້າແຂວງໆ ໄຊຍະບູລີ, ມີບັນດາມ່ວນຊົນຊາວແຂວງໄຊຍະບູລີ, ພ້ອມດ້ວຍແຂກພາຍໃນ ແລະ ຕ່າງປະເທດເຂົ້າຮ່ວມ.

ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ທັງເປັນປະທານຄະນະກໍາມະການຈັດງານ ມະຫາກໍາບຸນຊ້າງປະຈໍາປີ ກ່າວວ່າ: ງານມະຫາກໍາບຸນຊ້າງ ຖືເປັນງານເທດສະການບຸນໃຫຍ່ຂອງແຂວງ ໄຊຍະບູລີ ທີ່ສ່ອງແສງເຖິງປະຫວັດສາດຄວາມເປັນມາຂອງສປປ ລາວ ໃນອະດີດທີ່ມີປະຊາກອນຊ້າງ ຈໍານວນຫລວງຫລາຍ ຕິດພັນກັບການດໍາລົງຊິວີດຂອງປະຊາຊົນລາວບັນດາເຜົ່າ. ພ້ອມນັ້ນ, ກໍເພື່ອສືບ ຕໍ່ການປົກປັກຮັກສາ ເສີມຂະຫຍາຍຮີດຄອງປະເພນີອັນດີງາມຂອງຊາດຂອງປະຊາຊົນລາວບັນດາເຜົ່າ ທີ່ ເປັນເອກະລັກຫລາຍສີສັນ ບວກກັບມູນເຊື້ອຄວາມດຸໝັ່ນຂະຫຍັນພຽນ ແລະ ພິລາອາດຫານໃນການປົກ ປັກຮັກສາ ແລະ ສ້າງສາພັດທະນາແຂວງກ້າວຂຶ້ນຢ່າງບໍ່ຢຸດຢັ້ງ ດັ່ງຄໍາຂັວນທີ່ວ່າ: "ແຂວງໄຊຍະບູລີ ເປັນດິນແດນຍາວສຸດຫລ້າ, ດ່ານໜ້າທີ່ແຂງແກ່ນແດນພູເຂົາແຫ່ງຄໍາຂຽວຊ້າງຄໍາຮູ້ພູໄຟ, ດອກຝ້າຍຈັນ, ວັດທະນະທໍາເຜົ່າຫລາຍສີສັນ ພະລັງດັນສູ່ຄວາມມັ່ງຄັ່ງ".

ທ່ານ ກ່າວຕື່ມວ່າ: ງານຄັ້ງນີ້ຈັດຂຶ້ນເປັນຄັ້ງທີ 10 ໂດຍເລີ່ມແຕ່ປີ 2007 ເປັນຕົ້ນມາ. ສະເພາະ ປີນີ້ໄດ້ມີຊ້າງເຂົ້າຮ່ວມທັງໝົດ 67 ເຊືອກ, ພາຍໃນງານຍັງມີຫລາຍກິດຈະກໍາເຊັ່ນ: ປະກວດຊ້າງງາມ ປະຈໍາປີ 2016, ພິທີບາສີສູ່ຂັວນຊ້າງ, ຂະບວນຂີ່ຊ້າງອ້ອມຕົວເມືອງ, ກິດຈະກໍາການສະແດງກ່ຽວກັບ ຊ້າງຄໍາຮູ້ ແລະ ອື່ນໆ. ນອກນັ້ນ, ຍັງມີງານວາງສະແດງສິນຄ້າປະເພດຕ່າງໆເຊິ່ງເລີ່ມແຕ່ວັນທີ 15 ກຸມ ພາ, ຈາກຫລາຍພາກສ່ວນທັງພາຍໃນ ແລະ ຕ່າງປະເທດ ປະມານ 150 ຮ້ານ, ການສະແດງສິລະປະ, ຟ້ອນມວຍລາຍລາວ, ການປະສານສຽງເພັງ, ສຽງລໍາແຕ່ລະເຜົ່າຂອງບັນດາເມືອງ, ການສະແດງຄອນ ເສີດ, ກາຍະສິນຈາກສູນກາງ, ພິເສດ ປີນີ້ຍັງມີການສະແດງພາລາມໍເຕີ ແລະ ອື່ນໆຢ່າງຄຶກຄື້ນມ່ວນຊື່ນ

Pathedlao Lao