ຄ່າໄຟຟ້າແພງຂຶ້ນຜິດປົກກະຕິ ໄຟຟ້າລາວຈະວ່າແນວໃດ ມາເບິ່ງນຳກັນ

         ໃນ​ວັນ​ທີ 30 ພຶດສະພາ 2016 ທ່ານ ສີ​ສະຫວາດ ທິ​ຣະວົງ ຜູ້ອຳນວຍການ​ໃຫຍ່ ລັດ​ວິສາ​ຫະ​ກິດ​ໄຟຟ້າ​ລາວ ໄດ້​ໃຫ້​ສຳພາດ​ຕໍ່ຂ່າວສານ​ປະເທດ​ລາວ ເພື່ອ​ສະແດງ​ຄວາມ​ຮັບຜິດຊອບຕໍ່​ກໍລະນີ​ຄ່າ​ໄຟຟ້າ​ແພງ​ຂຶ້ນ​ຢ່າງຜິດ​ປົກກະຕິ​ວ່າ: ນັ້ນ​ບໍ່​ແມ່ນ​ຍ້ອນການ​ຂຶ້ນ​ລາຄາ​ຂອງ​ໄຟຟ້າ​ໂດຍລຳພັງ ຊຶ່ງ​ແມ່ນ​ຍ້ອນ​ຄວາມ​ຜິດພາດ​ທາງ​ດ້ານ​ເຕັກນິກ​ ການ​ພິມໃບ​ເກັບ​ເງິນຄ່າ​ໄຟຟ້າ​ປະຈຳເດືອນ​ຂອງ​ລັດ​ວິ​ສາ​ຫະ​ກິດ​ໄຟຟ້າລາວ​ເອງ​ ທີ່​ບໍ່​ແທດເໝາະ​ກັບ​ບໍ​ລິມາດ​ການ​ນຳ​ໃຊ້​ກະແສ​ໄຟຟ້າ​ຕົວຈິງ ແລະ ຍ້ອນ​ຄວາມ​ລະ​ເລີງຕໍ່ໜ້າ​ທີ່​ວຽກ​ງານ​ຂອງ​ພະນັກງານ​ຈຳນວນ​ໜຶ່ງ ບວກ​ກັບ​ສະພາບ​ອາກາດ​ຮ້ອນ​ແຮງ​ຂຶ້ນ ໄດ້ເຮັດ​ໃຫ້ການ​ນຳ​ໃຊ້​ກະແສ​ໄຟຟ້າຂອງ​ສັງຄົມ​ເພີ່ມ​ຫຼາຍ​ຂຶ້ນ​ສອງເທົ່າ ​ເມື່ອ​ທຽບ​ກັບ​ໄລຍະ​ປົກກະຕິ ຈຶ່ງ​ເຮັດ​ໃຫ້​ມີ​ຫາງ​ສຽງ​ຕ່າງໆຂອງ​ສັງຄົມ​ເກີດ​ຂຶ້ນ.

         ຕໍ່​ບັນຫາ​ນີ້ ທ່ານ​ຜູ້​ອຳນວຍການ​ໃຫຍ່​ ກໍ່​ໄດ້​ສະແດງ​ຄວາມ​ຂໍໂທດ​ຢ່າງ​ຈິງ​ໃຈ​ຕໍ່​ຜູ້ນຳ​ໃຊ້​ໄຟຟ້າ ແລະ ສັງຄົມ​ວ່າ: ໃນ​ນາມ​ຜູ້​ຮັບຜິດ​ຊອບ​ລັດ​ວິ​ສາ​ຫະ​ກິດ​ໄຟຟ້າລາວ ​ຈະ​ອອກແຮງ​ກໍ່ສ້າງ​ວຽກງານ​ຕົນ​ໃຫ້​ມີ​ຄຸນະພາບ ແລະ ປະ​ສິດທິ​ຜົນ​ດີ​ຂຶ້ນ ເພື່ອ​ຮັບ​ໃຊ້​ປະຊາ​ຊົນ ແລະ ສັງຄົມ​ໃຫ້​ດີ​ຂຶ້ນກວ່າ​ເກົ່າ ຊຶ່ງ​ສະເພາະ​ໜ້າ​ນີ້ ໂດຍ​ປະຕິບັດ​ຕາມ​ຄຳ​ສັ່ງ​ແນະນຳຂອງ​ທ່ານ​ລັດຖະມົນຕີ​ວ່າການ​ກະຊວງ​ພະລັງງານ ແລະ ບໍ່​ແຮ່ ໃຫ້ຈັດ​ຕັ້ງ​ກັນ​ລົງ​ກວດກາ​ສະພາບຄວາມ​ເປັນ​ຈິງ ​ຂອງ​ກົງ​ເຕີ​ໄຟຟ້າ​ຢູ່ແຕ່​ລະ​ຄົວ​ເຮືອນ​ທີ່​ມີ​ການ​ສົງ​ໃສ ໃຫ້​ສຳເລັດ ແລະ ແກ້​ໄຂ​ໃຫ້​ຖືກຕ້ອງ ​ເພື່ອ​ບໍ່​ອັບ​ປະໂຫຍດ​ຂອງ​ທັງສອງ​ຝ່າຍຄື: ຜູ້​ສະໜອງ ແລະ ຜູ້ຊົມໃຊ້​ໄຟຟ້າ ຊຶ່ງ​ປັດຈຸບັນ ໄຟຟ້າລາວ​ໄດ້​ລົງ​ສົມທົບ​ກັບໄຟ​ຟ້າ​ນະຄອນ​ຫຼວງ ແລະ ພາກສ່ວນ​ກ່ຽວຂ້ອງ​ຕ່າງໆ ເລີ່ມ​ລົງ​ກວດກາ​ໃນເບື້ອງ​ຕົ້ນ ແລະ ສາມາດ​ແກ້​ໄຂຄວາມ​ຜິດພາດ​ເກີດ​ຂຶ້ນ​ຕໍ່​ຜູ້​ໃຊ້ໄຟຟ້າ​ແລ້ວ​ເກືອບ 50 ກໍລະນີ ໃນ​ນັ້ນ ຫຼາຍ​ກວ່າ​ໝູ່​ແມ່ນ​ຢູ່​ເມືອງສີ​ໂຄດ​ຕະບອງ ຖັດ​ລົງ​ມາ​ແມ່ນເມືອງ​ຈັນທະ​ບູ​ລີ ແລະ ເມືອງສີ​ສັດຕະ​ນາກ ຕໍ່​ມາ​ແມ່ນ​ເມືອງໄຊ​ເຊດ​ຖາ ທ່ານ​ຜູ້ອຳນວຍການໄດ້​ເນັ້ນ​ວ່າ: ໃນ​ໂອກາດ​ນີ້ ກໍ່​ຂໍຮຽກຮ້ອງ​ໃຫ້​ປະຊາຊົນ​ຜູ້​ໃຊ້​ໄຟຟ້າ ​ທີ່​ເຫັນ​ວ່າ​ບິນ​ເກັບ​ເງິນ​ຄ່າກະແສ​ໄຟຟ້າ​ທີ່​ມີ​ຄວາມ​ຜິດ​ປົກກະຕິ​ດັ່ງກ່າວ ​ກໍ່​ຈົ່ງ​ຮີບ​ຮ້ອນ​ນຳເຂົ້າ​ມາ​ສະເໜີ​ຕໍ່​ຂະແໜງ​ກ່ຽວຂ້ອງ​ຂອງ​ລັດ​ວິ​ສາ​ຫະ​ກິດ​ໄຟຟ້າລາວ​ໂດຍ​ໄວ ແລະ ພ້ອມ​ນີ້ ເບື້ອງ​ຄະນະ​ກວດກາ​ສະເພາະກິດ ​ກໍ່​ຈະ​ລົງ​ກວດກາ​ຄວາມ​ເປັນຈິງ​ດັ່ງກ່າວ​ໃຫ້​ສຳເລັດ​ໂດຍ​ໄວ​ທີ່ສຸດ ເພື່ອ​ບໍ່​ໃຫ້​ມີ​ຫາງ​ສຽງ​ທີ່​ບໍ່​ດີເກີດ​ຂຶ້ນ ແລະ ໃນ​ຂະນະ​ດຽວ​ກັນ ກໍ່​ໄດ້​ຕັກເຕືອນ​ໃຫ້​ພະນັກງານໄຟຟ້າ​ຈຳນວນ​ໜຶ່ງ ​ຈົ່ງ​ມີ​ການ​ປະພຶດ​ທີ່​ດີ​ຕໍ່​ປະຊາຊົນ​ຜູ້​ມາ​ໃຊ້​ບໍ​ລິການ​ໃຫ້​ດີ​ກວ່າ​ເກົ່າ.

ແຫຼ່ງຂ່າວ: ໜັງສືພິມ ວຽງຈັນໃໝ່