ຄົບຮອບ 33ປີ ຄຳພູວົງແຈກຄຳ 70 ບາດ ຄືນກຳໄລໃຫ້ລູກຄ້າ

 ໃນເວລາ 15:30 ໂມງຂອງວັນທີ 6 ເມສາ 2016 ທີ່ຜ່ານມາ ຢູ່ທີ່ສູນການຄ້າໄອເຕັກມໍ ຊັ້ນ2 ໄດ້ມີການຈັດຖະແຫຼງຂ່າວກ່ຽວກັບການຫວນຄືນເຖິງວັນສ້າງຕັ້ງຮ້ານຄໍາພູວົງຈົນເຖິງປັດຈຸບັນ ໝູນວຽນມາຄົບຮອບ 33 ປີ ແລະ ເພື່ອເປັນການສົມມະນາບຸນຄຸນໃຫ້ແກ່ລູກຄ້າ ທາງຮ້ານເພິ່ນຈຶ່ງໄດ້ມີການຈັດກິກຈະກຳແຈກໂຊກ 3 ຊັ້ນຂຶ້ນ.

    ທ່ານ ພູວົງ ພະມີສິດ ເຈົ້າຂອງຮ້ານຄໍາພູວົງ ໄດ້ກ່າວຕໍ່ສື່ມວນຊົນວ່າ: ຮ້ານຄໍາພູວົງ ແມ່ນຮ້ານຄໍາທີ່ມີຄຸນນະພາບ ແລະ ມີປະຫວັດຍາວນານກວ່າ 30 ປີ ພາຍໃຕ້ສະໂລແກນທີ່ວ່າ: "ຄິດເຖິງຄໍາຄຸນນະພາບໃຫ້ຄິດເຖິງ ຮ້ານຄໍາພູວົງ" ການດຳເນີນທຸລະກິດຄ້າຂາຍເຄື່ອງປະດັບ ໂດຍສະເພາະກໍແມ່ນຄໍາເປັນສ່ວນໃຫຍ່ ແລ້ວກໍໄດ້ການຕອບຮັບຈາກສັງຄົມດ້ວຍດີ ແລະ ຖືໄດ້ວ່າປະສົບຜົນສໍາເລັດເລື້ອຍໆມາ ໂດຍລໍາດັບຈາກແຕ່ກ່ອນເປັນຮ້ານນ້ອຍໆ ຈົນກາຍມາເປັນທຸລະກິດຫຼັກຂອງຄອບຄົວ. ນອກຈາກນັ້ນພວກເຮົາຍັງຊ່ວຍສົ່ງເສີມສະໜັບສະໜູນ, ອະນຸລັກຮັກສາຮີດຄອງປະເພນີ ແລະ ມີສ່ວນຮັບຜິດຊອບກັບຫຼາຍໆກິດຈະກຳຂອງສັງຄົມດ້ວຍດີຕະຫຼອດມາ. 

     ເພື່ອເປັນການສະເຫຼີມສະຫຼອງຮ້ານຄຳພູວົງຄົບຮອບ 33 ປີ  ພວກເຮົາກໍຕ້ອງຂໍຂອບໃຈລູກຄ້າທີ່ໄວ້ວາງໃຈ ແລະ ໃຫ້ການອຸດໜູນພວກເຮົາດ້ວຍດີຕະຫຼອດມາ. ດັ່ງນັ້ນພວກເຮົາຈຶ່ງໄດ້ຈັດກິດຈະກໍາ ສົມມະນາບຸນຄຸນໃຫ້ແກ່ລູກຄ້າດ້ວຍການມອບໂຊກ 3 ຊັ້ນລວມມູນຄ່າຫຼາຍກວ່າ 70 ບາດຄໍາ. ໂດຍກະຕິກາງ່າຍໆພຽງແຕ່ທ່ານຊື້ຄໍາຢູ່ຮ້ານຄໍາພວກເຮົາຄົບ 1 ບາດ ກໍມີສິດທີ່ຈະລຸ້ນຮັບໂຊກ 3 ຊັ້ນໄດ້ແລ້ວ.

# ໂຊກຊັ້ນທີ 1: ຊື້ຄໍາຄົບ 1 ບາດ ລູກຄ້າຈະໄດ້ຮັບເຄື່ອງສົມມະນາບຸນຄຸນທັນທີບໍ່ວ່າຈະເປັນ ເສື້ອໂປໂລ, ຈອກແກ້ວ, ຄັນຮົ່ມ, ໝວກ, ເຄື່ອງໃຊ້ໄຟຟ້າ ແລະ ອື່ນໆ ຢ່າງຫຼວງຫຼາຍ.

# ໂຊກຊັ້ນທີ 2: ໄດ້ບັດຊີງໂຊກ ເຊິ່ງລູກຄ້າສາມາດຂຽນຊື່, ທີ່ຢູ່ ແລະ ເບີໂທລະສັບ ເພື່ອລຸ້ນຮັບໂຊກປະຈໍາເດືອນຈໍານວນ 2 ລາງວັນຄື:

- ລາງວັນທີ 1: ຄໍານ້ຳໜັກ 1 ບາດ ຈໍານວນ 1 ລາງວັນ.

- ລາງວັນທີ 2: ຄານ້ຳໜັກ 2 ສະຫຼຶງ ຈໍານວນ 1 ລາງວັນ.

ແລະ ໃນເດືອນສິງຫາພວກເຮົາຍັງໄດ້ແຈກຄໍານ້ຳໜັກ 5 ບາດ ຈໍານວນ 1 ລາງວັນ ແລະ ຄຳນ້ຳໜັກ 2 ບາດ ຈຳນວນ 1 ລາງວັນ.

# ໂຊກຊັ້ນທີ 3: ບັດຊີງໂຊກທຸກໃບແມ່ນຈະຖືກເອົາມາໂຮມກັນອີກເທື່ອໜຶ່ງ ເພື່ອທີ່ຈະຈັບສະຫຼາກໃນທ້າຍເດືອນທັນວາ 2016 ເຊິ່ງລາງວັນລວມມີ:

- ລາງວັນທີ1: ຊຸດອອກງານຍິງ-ຊາຍ ນ້ຳໜັກຄາລວມ 33 ບາດ ຈໍານວນ 1 ລາງວັນ.

- ລາງວັນທີ2: ຄຳນ້ຳໜັກ 5 ບາດ ຈຳນວນ 1 ລາງວັນ.

- ລາງວັນທີ3: ຄຳນ້ຳໜັກ 2 ບາດ ຈຳນວນ 2 ລາງວັນ.

- ລາງວັນທີ4: ຄຳນ້ຳໜັກ 1 ບາດ ຈຳນວນ 2 ລາງວັນ.

- ລາງວັນທີ5: ຄຳນ້ຳໜັກ 1 ສະຫຼຶງ ຈຳນວນ 33 ລາງວັນ.

----------------------------------------------------