ຄົນລາວເສຍຊີວິດ ຍ້ອນການສູບຢາ 4 ພັນຄົນຕໍ່ປີ

ເນື່ອງໃນໂອກາດວັນງົດ ສູບຢາໂລກ ວັນທີ 31 ພຶດສະພາ 2018, ທ່ານ ບຸນກອງ ສີຫາວົງ ລັດຖະມົນຕີກະຊວງ ສາທາລະນະສຸກ ໄດ້ຖະແຫຼງຂ່າວຕໍ່ສື່ມວນຊົນ ເມື່ອວັນທີ 29 ພຶດສະພາ. ທີ່ກະຊວງສາທາລະນະສຸກວ່າ ໃນທຸກໆປີ ກະຊວງສາທາລະນະສຸກ ໄດ້ຮ່ວມກັບອົງການອະນາໄມໂລກ, ສະມາພັນຄວບຄຸມຢາສູບອາຊຽນ ແລະ ປະຊາຊົນລາວໃນຂອບເຂດທົ່ວປະເທດໄດ້ຮ່ວມກັນສະເຫຼີມສະຫຼອງ ‘’ວັນງົດສູບຢາໂລກ’’ ຊຶ່ງປີນີ້ແມ່ນ ເປັນຄັ້ງທີ 30 ສຳລັບ ສປປ ລາວ ຂອງພວກເຮົາ ແມ່ນຄົບຮອບ 9 ປີ, ປີນີ້ ການສະເຫຼີມສະຫຼອງວັນດັ່ງກ່າວ ແມ່ນພາຍໃຕ້ຫົວຂໍ້ “ຢາສູບເປັນສາເຫດພາໃຫ້ເກີດພະຍາດຫົວໃຈແລະເສັ້ນເລືອດ” ຊຶ່ງແມ່ນພະຍາດທີ່ເຮັດໃຫ້ຄົນເສຍຊີວິດຫຼາຍທີ່ສຸດ. ອົງການອະນາໄມໂລກໄດ້ແຈ້ງໃຫ້ຮູ້ວ່າ ໃນທົ່ວໂລກມີຈຳນວນຜູ້ ເສຍຊີວິດຍ້ອນພະຍາດຫົວໃຈແລະເສັ້ນເລືອດທີ່ມີສາເຫດມາຈາກການສູບຢາກວມເອົາ 12%, ສ່ວນຜູ້ເສຍຊີວິດທັງໝົດຍ້ອນການສູບຢາແມ່ນສູງເຖິງ 7 ລ້ານຄົນຕໍ່ປີ.

ສຳລັບ ສປປ ລາວ ອີງຕາມການສຳຫຼວດແຫ່ງຊາດ ກ່ຽວກັບການສູບຢາໃນກຸ່ມຄົນ ອາຍຸ 15 ປີຂຶ້ນໄປພົບວ່າຄົນ ສູບຢາເພີ່ມຂຶ້ນຈາກ 26%, ໃນປີ 2012 ມາເປັນ 28%,ໃນປີ 2015 ແລະ ຈາກການສຳຫຼວດ ດັ່ງກ່າວ ໄດ້ພົບເຫັນວ່າມີຄົນລາວເສຍຊີວິດຍ້ອນການສູບຢາ 13 ຄົນຕໍ່ມື້, 4 ພັນກວ່າຄົນ ຕໍ່ປີ ຊຶ່ງຖືວ່າເປັນໂຕເລກທີ່ສູງ ແລະ ໜ້າຕົກໃຈ. ນອກຈາກນີ້ ການສຳຫຼວດກ່ຽວກັບການສູບຢາຂອງໄວໜຸ່ມລາວໃນກຸ່ມຄົນທີ່ມີອາຍຸ 13-15 ປີ. ໃນປີ 2016 ພົບວ່າໄວໜຸ່ມລາວສູບຢາສູບທີ່ຜະລິດຈາກໂຮງງານຜູ້ຊາຍກວມເອົາ 10,7% ແລະ ຜູ້ຍິງ 2,1%, ຍັງພົບວ່າ ໜຸ່ມໃນກຸ່ມນີ້ໄດ້ສູບຢາສູບໄຟຟ້າ ຫຼື E-cigarettes ຊຶ່ງກວມເອົາອັດຕາປະມານ 5%, ໃນກຸ່ມໄວໜຸ່ມຊາຍ ແລະ 3,7% ໃນກຸ່ມໄວໜຸ່ມຍິງ.

Cr:  Tonamcha